ഗോപി സുന്ദർ

Gopi Sundar
ഗോപീ സുന്ദർ​
എഴുതിയ ഗാനങ്ങൾ: 3
സംഗീതം നല്കിയ ഗാനങ്ങൾ: 313
ആലപിച്ച ഗാനങ്ങൾ: 57

പുതുതലമുറ സംഗീത സംവിധായകരില്‍ മുന്‍നിരയില്‍ സ്ഥാനമുള്ള ആളാണ്‌ ഗോപി സുന്ദര്‍. പാട്ടിന്‍റെ സംഗീതത്തിനൊപ്പം സാങ്കേതികതയില്‍ ഉള്ള പൂര്‍ണ്ണതയാണ് ഗോപി സുന്ദറിനെ വ്യത്യസ്തന്‍ ആക്കുന്നത്.

സുരേഷ് ബാബു- ലിവി ദമ്പതികളുടെ മകനായി 1977 മെയ് 30തിന് കൊച്ചിയിലാണ് ഗോപിയുടെ ജനനം. സ്കൂൾ പാഠഭാഗങ്ങളേക്കാള്‍ തബല, കീബോർഡ് എന്നീ സംഗീത ഉപകരണങ്ങളോട് ആയിരുന്നു കുട്ടിക്കാലം മുതൽ തന്നെ ഗോപിയ്ക്ക് കൂടുതല്‍ താല്പര്യം. പത്താം ക്ളാസ് പൂർത്തിയാക്കാതെ സ്കൂൾ വിട്ട ഗോപിക്ക് തുണയായത് സംഗീത സംവിധായകൻ ഔസേപ്പച്ചനുമായുള്ള തന്റെ അച്ഛന്റെ പരിചയമാണ്. ഔസേപ്പച്ചന്റെ ക്ലാസ് മേറ്റായിരുന്ന സുരേഷ് ബാബു മകൻ ഗോപിയെ ഔസേപ്പച്ചന്റെ അടുത്ത് എത്തിച്ചു. തുടർന്ന് ഗോപി ഔസേപ്പന്റെയൊപ്പം തബലിസ്റ്റായി ജോലി ചെയ്തു. ഒപ്പം  ഓർക്കസ്ട്രേഷനിലും കീബോര്‍ഡ് പ്രോഗ്രാമിംഗിലും പരിശീലനം നേടി.  വൈകാതെ മ്യൂസിക് പ്രോഗ്രാമർ എന്ന നിലയിൽ അറിയപ്പെട്ട് തുടങ്ങിയ ഗോപി ബോളിവുഡിലെ വിശാൽ-ശേഖർ സഖ്യത്തിന്റെ ഹിറ്റുകളായ ഓം ശാന്തി ഓം, ബ്ലഫ് മാസ്റ്റർ തുടങ്ങിയ ചിത്രങ്ങൾക്ക് മ്യൂസിക് പ്രോഗ്രാമിംഗ് ചെയ്തിരുന്നു. രാജീവ് മേനോൻ ഉൾപ്പടെയുള്ള പ്രസിദ്ധ സംവിധായകർക്ക് വേണ്ടി പരസ്യജിഗിളുകളും കമ്പോസ് ചെയ്തു. 5000ത്തിൽപ്പരം പരസ്യജിംഗിളുകൾക്ക് ഗോപി സംഗീതം നിർവ്വഹിച്ചിട്ടുണ്ട്.

ഉദയനാണ് താരം എന്ന ചിത്രത്തിന് പ്രോഗ്രാമിംഗ് നിർവ്വഹിച്ച പരിചയമാണ് റോഷൻ ആൻഡ്രൂസിന്റെ അടുത്ത ചിത്രമായ നോട്ട് ബുക്കിന്റെ പശ്ചാത്തല സംഗീതമൊരുക്കാൻ ഗോപിക്ക് അവസരമൊരുക്കിയത്. തുടർന്ന് അമൽ നീരദിന്റെ  ബിഗ് ബിക്ക് വേണ്ടി പശ്ചാത്തലമൊരുക്കുകയും ചെയ്ത ഗോപി സുന്ദർ മലയാളത്തിൽ സ്വതന്ത്രസംഗീത സംവിധാനം നിർവ്വഹിക്കുന്നത് സിബി മലയിലിന്റെ മോഹൻലാൽ ചിത്രമായ ഫ്ലാഷിലാണ്. അമൽ നീരദിന്റെ തന്നെ അൻവർ എന്ന ചിത്രത്തിന് ശേഷം ഗോപിക്ക് മലയാളത്തിൽ പിൻതിരിഞ്ഞ് നോക്കേണ്ടി വന്നില്ല. അൻവറിൽ  ഗോപി സുന്ദർ സംഗീത സംവിധാനം ചെയ്ത് പുറത്തിറക്കിയ പാട്ടുകൾ മലയാളത്തിലെ സൂപ്പർ ഹിറ്റ് ഗാനങ്ങളായി മാറിയിരുന്നു.

തുടര്‍ന്ന് വളരെപെട്ടെന്ന് തന്നെ ഗോപി സുന്ദറിന്റെ സംഗീതം മലയാള ജനപ്രിയ ചിത്രങ്ങളുടെ ഘടകമായി മാറി. ഉസ്താദ് ഹോട്ടല്‍, ലെഫ്റ്റ് റൈറ്റ് ലെഫ്റ്റ്, സൗണ്ട് തോമ, സലാല മൊബൈല്‍സ്, 1983, ചാര്‍ളി, വിശുദ്ധന്‍, ഹൌ ഓള്‍ഡ്‌ ആര്‍ യൂ, ബംഗ്ലൂര്‍ ഡേയ്സ്, ചാര്‍ളി, ടൂ കണ്ട്രീസ്, പുലിമുരുകന്‍, കായംകുളം കൊച്ചുണ്ണി അടക്കം 115ല്‍ അധികം ചിത്രങ്ങള്‍ക്ക് ഗാനങ്ങള്‍ ഒരുക്കിയിട്ടുണ്ട്.

സിനിമാ പശ്ചാത്തല സംഗീതം ഒരുക്കുന്നതിലും അഗ്രഗണ്യനായ ഗോപി സുന്ദറിന് 1983 എന്ന ചിത്രത്തിലൂടെ മികച്ച പശ്ചാത്തല സംഗീത സംവിധായകനുള്ള ദേശീയ പുരസ്കാരവും 2017ല്‍ ടെയ്ക്ക് ഓഫ്‌ എന്ന ചിത്രത്തിലൂടെ കേരള സംസ്ഥാന പുരസ്കാരവും നേടിയിട്ടുണ്ട്. ഗാനങ്ങള്‍ ആയാലും പശ്ചാത്തല സംഗീതം ആയാലും മികവുറ്റ സൗണ്ട് ക്വാളിറ്റി നല്‍കുന്നു എന്നതാണ് ഗോപി സുന്ദറിന്റെ വിജയം.

മലയാളത്തിന് പുറകെ തെലുങ്കിലും തമിഴിലും ഗാനങ്ങള്‍ ഒരുക്കിയിട്ടുണ്ട് ഗോപി സുന്ദര്‍.

ചെന്നയിൽ ഭാര്യയോടും രണ്ട് കുട്ടികളോടുമൊപ്പം താമസിക്കുന്നു.