4-ാം മുറ

ദുബായിൽ നിന്ന് അവധിക്ക്  നാട്ടിലേക്ക് വരുന്ന ജയേഷിനെ DySP ജയരാജും സംഘവും എയർപോർട്ടിൽ നിന്ന് തന്ത്രപൂർവം പിടികൂടുന്നു. അനൗദ്യോഗിക നടപടി ആയതിനാൽ നഗരപ്രാന്തത്തിലുള്ള ഒരു പഴയ ആർട്ട് ഗ്യാലറിയിലേക്കാണ് ജയേഷിനെ അവർ കൊണ്ടു പോകുന്നത്. പോകുന്ന വഴിയിൽ, തന്നെ അറസ്റ്റ് ചെയ്തത് എന്തിനാണെന്ന് ജയേഷ് ചോദിക്കുന്നെങ്കിലും അന്വേഷണ സംഘം പ്രതികരിക്കുന്നില്ല.

ദുബായിലേക്ക് പോകുന്നതിനു മുൻപ് ഏതെങ്കിലും കേസിൽ പെട്ടിട്ടുണ്ടോ എന്ന് ജയരാജും സംഘവും ജയേഷിനോട് ചോദിക്കുന്നു. ആദ്യമൊക്കെ  മറുപടി പറയുന്നില്ലെങ്കിലും പിന്നീട് താനുൾപ്പെട്ട ഒരു വാഹനാപകടത്തെക്കുറിച്ച് അയാൾ പറയുന്നു. 

രണ്ടു വർഷം മുൻപ്,  രാത്രിയിൽ മദ്യപിച്ചിട്ട് ജീപ്പൊടിച്ചു വരുമ്പോൾ എതിരെ വന്ന ബൈക്കിൽ ജയേഷിൻ്റെ ജീപ്പ്  ഇടിക്കുന്നു.  വാഹനം ഓടിച്ചയാൾ കൊല്ലപ്പെടുകയും പിറകിലുള്ളയാൾക്ക് പരിക്കേൽക്കുകയും ചെയ്യുന്നു. മദ്യപിച്ച് വാഹനം ഓടിച്ചതായതിനാൽ ജയേഷ് വാഹനം നിറുത്താതെ പോകുന്നു. എന്നാൽ, പിന്നീട്, പരിക്കേറ്റയാൾ തൻ്റെ ക്ലാസ്മേറ്റായ പെൺകുട്ടിയുടേ സഹോദരനാണെന്നറിയുമ്പോൾ, ഇൻഷുറൻസ് ക്ലെയിം കിട്ടാൻ  വേണ്ടി  തൻ്റെ  വണ്ടിയാണ് ഇടിച്ചതെന്ന് അയാൾ പോലീസിനെ അറിയിക്കുന്നു.

എന്നാൽ ആ സംഭവവും അതിൻ്റെ തുടർച്ചയും പോലീസനറിയാം. ദുബായിലേക്ക് പോകുന്നതിനു മുൻപ് നാട്ടിൽ അസാധാരണമായി എന്തെങ്കിലും നടന്നിട്ടുണ്ടായിരുന്നോ എന്ന ചോദ്യത്തിന് സുമ എന്നൊരു വിധവ വീട്ടിനുള്ളിൽ തലയ്ക്കടിയേറ്റ്  കൊല്ലപ്പെട്ടെന്നും അവരുടെ മകൻ്റെ കൂട്ടുകാരനായ അഖിലിനെയാണ് പോലീസ് സംശയിച്ചതെന്നും ജയേഷ് പറയുന്നു. സുമയുടെ instagram പോസ്റ്റുകളിൽ കമൻ്റിടുമെന്നല്ലാതെ തനിക്ക് അവരെ പരിചയമില്ലെന്ന് അയാൾ പറയുന്നു. 

അയാൾക്കെതിരെ പൊലീസിന് ചില സാഹചര്യത്തെളിവുകൾ മാത്രമാണുള്ളത്. കൊല നടന്ന സമയത്തിനടുത്ത്  അയാൾക്കുള്ളതു പോലെയുള്ള  കറുത്ത ബൈക്കിൽ ഒരാൾ സുമയുടെ വീട്ടിനു മുന്നിലുള്ള വഴിയിലൂടെ പോകുനതു കണ്ടു എന്നൊരു നഴ്സ് മൊഴി നല്കുന്നു. പത്രത്തിൻ്റെ വരിസംഖ്യ വാങ്ങാൻ പോയപ്പോൾ സുമയുടെ  അടഞ്ഞുകിടക്കുന്ന വീട്ടിൻ്റെ പോർച്ചിൽ കറുത്ത ബൈക്ക് കണ്ടെന്ന് ഒരു പത്രംഏജൻറും മൊഴി നല്കിയിട്ടുണ്ട്. എന്നാൽ താൻ ആ സമയത്ത് എറണാകുളത്തായിരുന്നു എന്ന് ജയേഷ് പറയുന്നു. എന്നാൽ ഫോൺ രേഖകൾ പ്രകാരം അയാൾ സ്ഥലത്തു തന്നെയുണ്ടായിരുന്നു.

ഇതിനിടയിൽ ജയേഷിൻ്റെ അമ്മ എംഎൽഎയെ കാണുന്നു. അയാളുടെ  സമ്മർദ്ദം കാരണം ജയേഷിനെ വിടാൻ SP റീന ജയരാജിന് നിർദ്ദേശം നല്കുന്നു.  എന്നാൽ അറസ്റ്റ് രേഖപ്പെടുത്തിയ ശേഷം പോലീസ് ക്ലബിൽ കൊണ്ടുവന്ന ജയേഷിനെ ജയരാജ് വീണ്ടും ചോദ്യം ചെയ്യുന്നു. അയാൾ, താനല്ല സുമയെ കൊന്നതെന്ന വാദത്തിൽ ഉറച്ചു നില്ക്കുന്നു.

ഇതിനിടെ, വീണ്ടും മുകളിൽ നിന്ന് സമ്മർദ്ദമുണ്ടായതിനെത്തുടർന്ന്, രാവിലെ പോലീസ് ക്ലബിലെത്തുന്ന SP, ജയേഷിനെ വീട്ടിൽ കൊണ്ടാക്കാൻ ജയരാജിനോടു പറയുന്നു. അതനുസരിച്ച് സംഘം അയാളുമായി പുറപ്പെടുന്നു.

എന്നാൽ പൊലീസ് അയാളെ കൊണ്ടു പോകുന്നത് വീട്ടിലേക്കായിരുന്നില്ല. അതു ചോദ്യം ചെയ്യുന്ന ജയേഷിനോട് അയാൾ ദുബായിൽ നിന്ന് സ്ഥിരമായി വിളിക്കാറുള്ള മിനി ആരാണെന്നു ജയരാജ് ചോദിക്കുന്നു. അന്ന് ആശുപത്രിയിൽ വച്ചു കണ്ടത് മിനിയെ ആണെന്നും ദുബായിൽ പോകുന്നതിനു മുൻപ് അവളുമായി  ഗാഢമായ പ്രണയത്തിലായെന്നും അയാൾ പറയുന്നു.  അവളെ സ്വന്തമാക്കാനാണ് അയാളുടെ പദ്ധതി.

എന്നാൽ, വാഹനം മിനിയുടെ വീട്ടിലേക്കാണ് പോകുന്നതെന്നറിയുമ്പോൾ ജയേഷ് അസ്വസ്ഥനാകുന്നു.