രാഹുൽ രാജ്

Rahul Raj


If you are unable to play audio, please install Adobe Flash Player. Get it now.

Date of Birth: 
വെള്ളി, 17/03/1978
സംഗീതം നല്കിയ ഗാനങ്ങൾ: 90
ആലപിച്ച ഗാനങ്ങൾ: 20

കൊച്ചി സ്വദേശി. 1978 മാർച്ച് 17ന് അഡ്വക്കേറ്റ് ഇ തങ്കപ്പന്റെയും ‌എൻ എസ് കുഞ്ഞൂഞ്ഞമ്മയുടെയും മകനായി ജനിച്ചു. കൊച്ചിയിലെ ഭാവൻസ് വിദ്യാ മന്ദിറിൽ നിന്ന് സ്കൂളിംഗ് പൂർത്തിയാക്കി. ആറാമത്തെ വയസ്സ് മുതൽ തന്നെ സംഗീതമന്നൻ മധുസൂദന മേനോൻ എന്ന ഗുരുവിൽ നിന്ന്  ശാസ്ത്രീയ സംഗീതം പഠിച്ച് തുടങ്ങിയ രാഹുൽ കലാമണ്ഡലം കൃഷ്ണൻകുട്ടിയിൽ നിന്ന് മൃദംഗവും അഭ്യസിച്ചിരുന്നു. വായ്പാട്ടിന്റെ താളമുറപ്പിക്കാൻ സഹായകമായിരുന്നു ഈ പഠനം. കൊച്ചിൻ CUSATൽ നിന്ന് ഐടിയിൽ ബിരുദം പൂർത്തിയാക്കിയ ശേഷം ബംഗളൂരു നിന്നും കമ്പ്യൂട്ടർ നെറ്റ്‌വർക്കിംഗിൽ സർട്ടിഫിക്കേഷനുകളെമെടുത്ത രാഹുൽ ഔദ്യോഗിക ജീവിതത്തിന്റെ ഭാഗമായി ലണ്ടനിൽ താമസമാക്കി. കുട്ടിക്കാലത്ത് അച്ഛൻ വാങ്ങിക്കൊടുത്ത ഒരു റോളന്റ് പിയോനോയിൽ സംഗീതം ചെയ്ത് പരിചയിച്ചിരുന്നതും പിന്നെ എ ആർ റഹ്മാൻ ഇന്ത്യയിൽക്കൊണ്ടു വന്ന സംഗീതവിപ്ലവവുമൊക്കെ സംഗീത സംവിധാനത്തിന്റെ വഴികളിൽ കൂടുതൽ ശ്രദ്ധ പതിപ്പിക്കാൻ കാരണമായിരുന്നു. ലണ്ടനിൽ ജോലി നോക്കുന്നതിനിടയിൽ ‌എ ആർ റഹ്മാനെത്തന്നെ ഒരു ഷോപ്പിൽ വച്ച് കാണാനിടയായതാണ് നാട്ടിലേക്ക് തിരികെ വന്ന് മുഴുവൻ സമയ സംഗീതജ്ഞനായി മാറാൻ ശരിക്കുമുള്ള പ്രേരകശക്തിയായത്.  

ലണ്ടനിൽ ജോലി ചെയ്യുന്നതിനിടെ ഇലക്ട്രോണിക് സൗണ്ട് പ്രൊഡക്ഷനിൽ പഠനം നടത്തിയിരുന്ന രാഹുലിന് പ്രദീപ് മേനോനെന്ന വ്യക്തിയുടെ ഒരു പഴയ അയ്യപ്പ ഭക്തിഗാന ആൽബം റീമിക്സ് ചെയ്യാൻ അവസരമായിരുന്നു. ഇത് സംഗീതമേഖലയിൽ അക്കാലത്ത് പേരെടുത്ത ശിവമണി, പ്രവീൺ മണി, സരോജ തുടങ്ങിയ സംഗീതജ്ഞർക്കൊപ്പം വർക്ക് ചെയ്യാനുള്ള അവസരം കൂടിയായിരുന്നു. റഹ്മാൻ പ്രചോദനമായത് നാട്ടിലേക്ക് തിരികെ വരാൻ കാരണമായെങ്കിലും സിനിമയെന്ന സ്വപ്നം ആദ്യകാലങ്ങളിൽ അകന്നു നിന്നിരുന്നു. . ഇക്കാലയളവിൽ ഏകദേശം നൂറോളം പരസ്യ ജിംഗിളുകൾ മലയാളം, തമിഴ്, ഹിന്ദി, തെലുങ്ക്  തുടങ്ങിയ ഭാഷകളിൽ പൂർത്തിയാക്കിയിരുന്നു. ടെലിവിഷൻ ചാനലുകൾക്ക് സംഗീതമൊരുക്കുകയും ആൽബങ്ങൾ സംഗീതം നിർവ്വഹിക്കുകയും ചെയ്തു. 2007ൽ സുഹൃത്തായ ഡിമൽ ഡെന്നിസ് വഴി സംവിധായകനായ അൻവർ റഷീദിനെ പരിചയപ്പെടുന്നതാണ് രാഹുൽ രാജിന് മലയാള സിനിമയിൽ തുടക്കമിടാൻ ‌കാരണമാവുന്നത്. അൻവറിന്റെ ഛോട്ടാ മുംബൈയിലൂടെ മലയാള സിനിമാ സംഗീത സംവിധാന രംഗത്ത് തുടക്കമിട്ട രാഹുൽ ഛോട്ടാ മുംബൈ മുതൽ ഋതു, കോഹിനൂർ, എസ്ര തുടങ്ങി നാല്പതോളം സിനിമകളും 100ൽപ്പരം പാട്ടുകളും ഒടുവിൽ പ്രിയദർശൻ - മോഹൻലാൽ കൂട്ടുകെട്ടിന്റെ ചരിത്രാഖ്യായികയായ  മരക്കാർ അറബിക്കടലിന്റെ സിംഹത്തിന്റെ പശ്ചാത്തല സംഗീതം വരെയെത്തി നിൽക്കുന്നു.

ബെർക്ക്‌ലീ സ്കൂൾ ഓഫ് മ്യൂസിക്കിൽ നിന്ന് ഓർക്കസ്ട്രൽ സ്റ്റഡീസിൽ നടത്തിയ പഠനം ലണ്ടനിലെ AIR സ്റ്റുഡിയോയിൽ 60 പീസ് ഓർക്കസ്ട്ര കണ്ടക്റ്റ്  ചെയ്യാൻ രാഹുലിനെ സഹായിച്ചിരുന്നു. പല ഗുരുക്കൻമാരുടെ കീഴിൽ ഇന്ത്യൻ ശാസ്ത്രീയ സംഗീതവും അഭ്യസിച്ചിരുന്ന രാഹുലിന്റെ നിലവിലെ ഗുരു ശ്രീമാൻ കെ എം ഉദയൻ മാസ്റ്ററാണ്. 

ജർമ്മനി സ്വദേശിനിയായ മിറിയമാണ് രാഹുലിന്റെ വധു. അക്ഷൈനി ലേയ എന്ന മകളും അമ്മയുമടങ്ങുന്ന കുടുംബവുമൊത്ത് കൊച്ചിയിൽ താമസിക്കുന്നു. രാഹുലിന്റെ സംഗീത സ്വപ്നങ്ങൾക്ക് ഏറെ സഹായവും പ്രേരകശക്തിയുമായിരുന്ന സഹോദരി രഹ്നാ രാജ് 2016ൽ കാൻസർ ബാധിതയായി മരിച്ച് പോയിരുന്നു.