മഞ്ഞവെയിൽ വന്നു

 

മഞ്ഞവെയിൽ വന്നു നുള്ളി വിളിച്ചപ്പോൾ
കൊഞ്ഞനം കാട്ടിയ പൂവേ
കൊച്ചു കുസൃതിക്കുരുന്നു പൂവേ
നിന്നെ പൊട്ടിച്ചിരിപ്പിച്ചതാരേ

ശാന്ത മധുരനിറനിലാവായ്
ശാരദാകാശമലിഞ്ഞൂ
നീയതു കണ്ടുണർന്നൂ പിന്നെ
നീ മിഴി ചിമ്മി നിന്നൂ
തേടിയലഞ്ഞതെന്തോ നിന്നെ
ത്തേടി വന്നോമനിച്ചൂ

താന്തതരള ദലങ്ങളേതോ
താളത്തിലാടി വിടർന്നൂ
നീയൊരാഹ്ലാദമായ് വീണ്ടും
നീയതിൻ ജ്വാലയായ്
ഏതോ സ്നേഹക്കുളിരലയായ്
പാടിത്തഴുകുവതാരോ