പാപ്പൻ

പുലിമലക്കാട്ടിൽ  ചാക്കിൽ പൊതിഞ്ഞ് മരത്തിൽ കെട്ടിത്തൂക്കിയ നിലയിൽ,  മുറിവേറ്റു വികൃതമായ ഒരു ശവശരീരം കാണപ്പെടുന്നു.  രവിവർമ്മൻ (രാഹുൽ മാധവ്) എന്ന നടൻ്റെ ഡ്രൈവറായ ''ബുളളറ്റ് " രാജൻ്റെ (ശ്രീജിത്ത് രവി)  ശവശരീരമാണെന്ന്  ASP വിൻസി എബ്രഹാമിൻ്റെ (നീത പിള്ള)  നേതൃത്വത്തിലുള്ള പൊലീസ് സംഘം കണ്ടെത്തുന്നു.  

മൃതദേഹത്തിലെ മുറിവടയാളങ്ങൾ ഇരട്ടത്തലക്കത്തി കൊണ്ടുണ്ടായതാണെന്ന് തിരിച്ചറിഞ്ഞതോടെ, പണ്ട് സമാനമായ രീതിയിൽ കൊലകൾ നടത്തിയിട്ടുള്ള, അടുത്ത കാലത്ത് ജയിൽമോചിതനായ ഇരുട്ടൻ ചാക്കോയിലേക്ക് (ഷമ്മി തിലകൻ)  സംശയത്തിന്റെ മുന നീളുന്നു. 

വർഷങ്ങൾക്കു മുൻപ്, വിൻസിയുടെ അപ്പനും പോലീസ് ഓഫീസറുമായ എബ്രഹാം മാത്യു മാത്തന് (സുരേഷ് ഗോപി),  ഒരാളെ കൊല്ലാൻ   ശ്രമിക്കുന്ന ഇരുട്ടൻ ചാക്കോയെ കീഴടക്കുന്ന തിനിടയിൽ സ്വന്തം ഭാര്യയുടെ (നൈല ഉഷ) ദാരുണമരണം കാണേണ്ടി വരുന്നു. തുടർന്ന്, ചാക്കോയെ പൂട്ടാൻ തൊണ്ടിയായ  ഇരട്ടത്തലക്കത്തി കൃത്രിമമായി ഉണ്ടാക്കിയതിൻ്റെ പേരിൽ മാത്തൻ സർവീസിൽ നിന്നു പുറത്താകുന്നു.  അമ്മയുടെ കൊലയുടെ പേരിലുണ്ടായ തെറ്റുദ്ധാരണ കാരണം മകളും അപ്പനും അകൽച്ചയിലുമാണ്. 

ഇരുട്ടൻ ചാക്കോക്കേസ് പണ്ട് അന്വേഷിച്ച ആളെന്ന നിലയിൽ,  എബ്രഹാം മാത്തനെ അന്വേഷണ സംഘത്തിൽ ഉൾപ്പെടുത്തുന്നു. കണ്ടെത്തിയ കത്തി ചാക്കോയുടേതല്ലെന്ന് മാത്തൻ തിരിച്ചറിയുന്നു.

അന്വേഷണ സംഘാംഗമായ സോമൻ (ടിനി ടോം)  തിരുവനന്തപുരത്തു വച്ച്, രാജൻ്റേതിന് സമാനമായ രീതിയിൽ കൊല്ലപ്പെടുന്നു.  കേസന്വേഷണത്തിൽ സഹായിക്കുന്ന പൊലീസ് സർജൻ ഷേർളിയുടെ (ആശാ ശരത് )  വീട്ടിൽ  അതിക്രമിച്ചു കടന്നയാളെ തിരിച്ചറിയാനും പിടികൂടാനുമുള്ള വിൻസിയുടെ ശ്രമം പരാജയപ്പെടുന്നു.

 ചാക്കോ ജയിലിൽ നിന്നിറങ്ങുന്നതിനു മുൻപ് അയാളെ സന്ദർശിച്ച ഐഷാ ഫാത്തിമയേയും (മാളവിക മേനോൻ) അവർ വഴി ചാക്കോയുടെ അമ്മയേയും (സാവിത്രി ശ്രീധരൻ) അങ്ങനെ ചാക്കോ താമസിക്കുന്ന സ്ഥലവും  പോലീസ് കണ്ടെത്തുന്നു. അവിടെയെത്തുന്ന വിൻസിയും സംഘവും കാണുന്നത് ചങ്ങലയിൽ ആരോ തടവിലാക്കിയ ചാക്കോയെയാണ്.

ചാക്കോയെ പ്രതിയായി അവതരിപ്പിച്ച് യഥാർത്ഥ കൊലയാളിയെ പുറത്തെത്തിക്കാൻ പോലീസ് തീരുമാനിക്കുന്നു. ഇതിനിടയിൽ. എഴുത്തുകാരിയായ ഡോ. പ്രിയ നളിനിയുടെ (ജുവൽ മേരി) ഭർത്താവ് ജയശങ്കർ (ബെൻസി മാത്യു) കാറിനു തീപിടിച്ച്   കൊല്ലപ്പെടുന്നു.  ജയശങ്കറിൻ്റെ പോസ്റ്റ്മാർട്ടം നടത്താൻ പുറപ്പെടുന്ന ഡോ.ഷേർളിയെ മാത്തൻ്റെ വളർത്തുപുത്രൻ മൈക്കിൾ തട്ടിക്കൊണ്ടു പോകുന്നു.