ദൃശ്യം 2

മുൻ ഐജി  ഗീത പ്രഭാകറിൻ്റെ  (ആശാ ശരത്)  മകൻ വരുൺ പ്രഭാകറിൻ്റെ തിരോധാനവുമായി ബന്ധപ്പെട്ട കേസന്വേഷണം, മതിയായ തെളിവുകൾ ഇല്ലാത്തതിനാലും വരുണിൻ്റെ മൃതദേഹം കണ്ടെത്താൻ കഴിയാത്തതിനാലും,   പാതി വഴിയിൽ മുടങ്ങിയിട്ട് 6 വർഷങ്ങളായി.  ആ കേസിൽ കുറ്റവിമുക്തനാക്കപ്പെട്ട ജോർജ്കുട്ടി (മോഹൻലാൽ) ഇപ്പോൾ തീയറ്റർ ഉടമയാണ്. കൂടാതെ പുതിയൊരു സിനിമ ചെയ്യാനുള്ള തയ്യാറെടുപ്പിലുമാണ്.

തൻ്റെ മകൾ അബദ്ധത്തിൽ കൊന്ന വരുണിൻ്റെ മൃതദേഹം, 2013 ആഗസ്റ്റ് 3 ന് രാത്രി,  പണി നടന്നു കൊണ്ടിരുന്ന രാജാക്കാട് പോലീസ്റ്റേഷൻ്റെ തറയിലാണ് താൻ കുഴിച്ചിട്ടതെന്ന രഹസ്യം ജോർജ്കുട്ടി ഒരാളോടുപോലും പറഞ്ഞിട്ടില്ല. എന്നാൽ, അന്നു രാത്രി അയാൾ  മൺവെട്ടിയുമായി പോലീസ് സ്റ്റേഷൻ കെട്ടിടത്തിൽ നിന്നു പുറത്തേക്കു വരുന്നത് കണ്ട ഒരാളുണ്ടായിരുന്നു:  തൻ്റെ ഭാര്യാസഹോദരനെ കൊന്ന കേസിൽ പോലീസിനു പിടികൊടുക്കാതെ ഓടുന്നതിനിടയിൽ സ്റ്റേഷൻ കെട്ടിടത്തിൻ്റെ സമീപമെത്തിയ ജോസ് (അജിത് കൂത്താട്ടുകുളം). അയാളെ, പക്ഷേ, പിന്നീട്  പൊലീസ് പിടികൂടുന്നു.

ജോർജ്കുട്ടിയുടെ മകൾ അഞ്ജു  (അൻസിബ) പഴയ സംഭവത്തിൻ്റെ പേടിപ്പെടുത്തുന്ന ഓർമ്മകളിൽ നിന്ന് ഇനിയും മുക്തയായിട്ടില്ല. അതു കാരണം അപസ്മാര രോഗവും അവളെ പിടികൂടിയിട്ടുണ്ട്. മകളുടെ വിവാഹം നടക്കാത്തതിൽ ജോർജ്കുട്ടിയുടെ ഭാര്യ റാണി (മീന) ദുഃഖിതയാണ്. അയല്ക്കാരിയായ സരിതയാണ് (അഞ്ജലി നായർ) അവരുടെ ആശ്വാസം. 

ജോർജ്കുട്ടി പലപ്പോഴും വീട്ടിലുണ്ടാവാറില്ല. താനെഴുതി പ്രസിദ്ധീകരിച്ച ദൃശ്യം എന്ന നോവൽ സിനിമയാക്കുന്നതുമായി ബന്ധപ്പെട്ട ചർച്ചകൾക്കായി തിരക്കഥാകൃത്തായ വിനയചന്ദ്രനെ (സായ്കുമാർ) കാണുവാനും മറ്റുമായി അയാൾ ഇടയ്ക്കിടെ പോകും. അയാളില്ലാത്തപ്പോഴൊക്കെ  സരിത, റാണിക്ക് കൂട്ടുകിടക്കാൻ രാത്രിയിൽ വരാറുണ്ട്. തൻ്റെ ദുഃഖങ്ങൾ പറയുന്ന കൂട്ടത്തിൽ, അഞ്ജു വരുണിനെ കൊന്ന കാര്യം ഒരിക്കൽ റാണി അബദ്ധത്തിൽ  സരിതയോടു പറയുന്നു. 

ഗീതാ പ്രഭാകറിൻ്റെ ആവശ്യപ്രകാരം,  ജോർജ്കുട്ടിയുടെ കുടുംബത്തെ നിരീക്ഷിക്കാനും വരുണിൻ്റെ മൃതദേഹം എവിടെയാണ് കുഴിച്ചിട്ടതെന്ന് ജോർജ്കുട്ടിയിൽ നിന്ന് ചോർത്താനും, അവരുടെ സുഹൃത്തും IG യുമായ തോമസ് ബാസ്റ്റിൻ (മുരളി ഗോപി) നിയമിച്ച ഷാഡോ പൊലീസുകാരാണ് സരിതയും ഭർത്താവും.  ജോർജ്കുട്ടിയുടെ വീട്ടിൽ വോയ്സ് റെക്കോർഡറുകളും അവർ സ്ഥാപിച്ചിട്ടുണ്ട്. എന്നാൽ ബുദ്ധിമാനായ ജോർജ്കുട്ടി ആ രഹസ്യം റാണിയോടു പോലും പറയുന്നില്ല.

ഇതിനിടയിൽ, ജയിൽ മോചിതനായ ജോസ്,  സുലൈമാൻ്റെ (കോഴിക്കോട് നാരായണൻ നായർ) ചായക്കടയിൽ നടക്കുന്ന ചർച്ചകളിൽ നിന്ന്, പഴയ കഥകൾ അറിയുകയും താൻ ജോർജ്കുട്ടിയെ കണ്ട രാത്രിയിൽ അയാൾ  പോലീസ് സ്റ്റേഷൻ്റെ തറയിൽ   മൃതദേഹം കുഴിച്ചിടുകയായിരുന്നെന്ന് അനുമാനിക്കുകയും ചെയ്യുന്നു. ഗീത പ്രഭാകർ നല്കിയ പണത്തിനു പകരമായി അയാൾ ആ രഹസ്യം പോലീസിനു കൈമാറുന്നു. 

പോലീസ് സ്റ്റേഷൻ്റെ തറ കുഴിക്കുമ്പോൾ ലഭിക്കുന്ന  മൃതദേഹാവശിഷ്ടങ്ങൾ ഫോറൻസിക് പരിശോധനയിൽ വരുണിൻ്റെതാണെന്ന് സ്ഥിരീകരിക്കുന്നു. തുടർന്ന് അടുത്ത ദിവസം അമശിഷ്ടങ്ങൾ DNA ടെസ്റ്റിന് അയയ്ക്കുന്നു. ജോർജ്കുട്ടിയെ അറസ്റ്റ് ചെയ്ത്   കോടതിയിൽ ഹാജരാക്കുന്നു.  എന്നാൽ അതോടെ  കാര്യങ്ങൾ മാറിമറിയുന്നു.