മാടമ്പി

ഗോപാലകൃഷ്ണപിള്ള ഇലവുംതിട്ട എന്ന ഗ്രാമത്തിൽ പലിശയ്ക്ക് പണം നൽകുന്ന പ്രമുഖനായ പണമിടപാടുകാരനാണ്. പണത്തിനു മാത്രം വില കല്പിക്കുന്ന, അമ്മ ദേവകിയുമായോ ഇളയ സഹോദരൻ രാമകൃഷ്ണ പിള്ളയുമായോ വൈകാരികമായ അടുപ്പം കാണിക്കാത്ത ആളെന്ന നിലയിലാണ് ഗോപാലകൃഷ്ണപിള്ളയെ എല്ലാവരും പരിഗണിച്ചിരുന്നത്. ഗോപാലകൃഷ്ണപിള്ള തന്റെ കൗമാര കാലത്ത് പിതാവ് മാധവമേനോനെ വഴിവിട്ട ജീവിതശൈലിയുടെ പേരും പറഞ്ഞ് പുറത്താക്കിയതിനാൽ അമ്മ അവനെ വെറുത്തിരുന്നു.തനിക്ക് സ്വാതന്ത്ര്യം നൽകാത്ത സ്വന്തം സ്വപ്നം പിന്തുടരാൻ അനുവദിക്കാത്ത ഏട്ടനെ അനിയനും വെറുത്തു.

 ഗോപാലകൃഷ്ണ പിള്ളയുടെ പ്രധാന ശത്രുവായിരുന്നു ശ്രീധരൻ. എന്നിരുന്നാലും ആ കുടുംബത്തിലെ ഒരു പെൺകുട്ടിയുമായി രാമകൃഷ്ണ പിള്ള പ്രണയത്തിലായപ്പോൾ അവരുടെ വിവാഹം നടത്തിക്കൊടുക്കാൻ ഗോപാലകൃഷ്ണ പിള്ള മടിച്ചില്ല.പക്ഷെ വിവാഹശേഷം നവദമ്പതികളെ ഒരുമിച്ചുറങ്ങാൻ സമ്മതിക്കാതെ സഹോദരനോട് വിവാഹച്ചെലവ് തിരികെ നൽകാൻ അയാൾ ആവശ്യപ്പെടുന്നു. ഇതോടെ സഹോദരനും അമ്മയ്ക്കും അയാളോടുള്ള വെറുപ്പിന്റെ ആഴം കൂടുന്നു.വീടു വീട്ടിറങ്ങിയ രാമകൃഷ്ണപിള്ള ശ്രീധരന്റെ കുടുംബത്തോട് ചേരുകയും ഗോപാലകൃഷ്ണപിള്ളയുടെ ബിസിനസ്സ് നിയമവിരുദ്ധമാണെന്ന് ആരോപിച്ച് ആദായനികുതി വകുപ്പിന് തെറ്റായ വിവരങ്ങൾ നൽകി കോടതിയിൽ കേസ് ഫയൽ ചെയ്യുകയും ചെയ്യുന്നു.