സൂഫിയും സുജാതയും

മുല്ലബസാറും കാവും അമ്പലവുമുള്ള കുന്നിൻ ചെരുവിലെ ഒരു ഗ്രാമത്തിലേക്കും അവിടെയുള്ള ജിന്ന് പള്ളിയിലേക്കും അവിടെയുള്ള തന്റെ ഗുരുവിന്റെ ഖബറിലേക്കും ഒരു അർധരാത്രിയിൽ പുഴ കടന്ന് നടന്ന് കയറി വരുന്ന സൂഫിയിലൂടെയാണ് കഥയുടെ തുടക്കം. സൂഫിയുടെ മനോഹരമായ വാങ്ക് വിളിയിലൂടെ ആളുകൾ ജിന്ന് പള്ളിയിലേക്ക് കടന്ന് വരുന്നു.  രാത്രിയുടെ അന്ത്യ യാമങ്ങളിൽ ഫജ്ർ നമസ്കാരത്തിനിടയിൽ ചില അപ്രതീക്ഷിതമായ സംഭവങ്ങൾ ജിന്ന് പള്ളിയിൽ അരങ്ങേറുന്നു. സൂഫിയേപ്പറ്റിയുള്ള ഒരു സന്ദേശം കേൾക്കുന്ന സുജാതയേയും ഭർത്താവ് രാജീവിനെയുമാണ് പിന്നീട് സിനിമയിൽ കാണിക്കുന്നത്. ഭൂതകാലവും വർത്തമാനകാലവുമായി ഇഴുകിച്ചേരുന്ന സിനിമ ഭൂതകാലത്തിലേക്ക് സഞ്ചരിക്കുന്നു. സുന്ദരിയും ഊമയായ സുജാതയും സൂഫിയും കണ്ട് മുട്ടുന്നത് ഒരു ബസ് യാത്രയിലൂടെയാണ്. ബസിൽ നിന്ന് നഷ്ടമാവുന്ന സൂഫിയുടെ തസ്ബീഹ് ജപമാല സുജാതക്ക് ലഭ്യമാവുന്നു. അവളത് കൊണ്ട് സൂഫിയുടെ ഗുരുവും അവളുടെ സുഹൃത്തുമായ സംഗീതജ്ഞനുമായ അബൂബിന്റെ അടുത്ത് ചെല്ലുന്നു. സൂഫിയുടെ വാങ്ക് വിളിയിലും ശാന്തമായ സന്യാസപ്രകൃതത്തിലും ആകർഷിതയാവുന്ന സുജാതയും,  ഊമയായ സുജാതയുടെ സൌന്ദര്യത്തിലും നൃത്തത്തിലും താല്പര്യം തോന്നുന്ന സൂഫിയും അനുരാഗബദ്ധരാവുന്നു. കണ്ണുകൾ കൊണ്ട് തന്നെ ജീവനോളം പ്രണയിക്കുന്ന സുജാതക്ക് തന്റെ ഏറ്റവും പ്രിയങ്കരമായ തസ്ബീഹ് മാല (ജപമാല) മഹറായി കൊടുക്കുന്ന സൂഫിക്കൊപ്പം ജീവിക്കാൻ സുജാത തയാറാകുന്നു. എന്നാൽ പ്രണയം വീട്ടിലറിയുന്നതോടെ മറ്റ് തലങ്ങളിലേക്ക് കഥ വികസിക്കുന്നു. 

പത്ത് വർഷത്തിനിപ്പുറം വർത്തമാന കാലത്തിൽ ദുബായിൽ ഭർത്താവ് രാജീവിനും മകൾക്കുമൊപ്പം താമസിക്കുന്ന സുജാതയ്ക്ക് കിട്ടുന്ന സൂഫിയേപ്പറ്റിയുള്ള ഒരു അപ്രതീക്ഷിതമായ സന്ദേശമറിയാൻ കഴിയുന്നു. ഭർത്താവ് രാജീവിന്റെ നിർദ്ദേശത്തേത്തുടർന്ന് അവർ നാട്ടിലേക്ക് പുറപ്പെടുന്നു. തുടർന്നുള്ള സംഭവങ്ങളിലൂടെയാണ് സിനിമ പുരോഗമിക്കുന്നത്.