മാണിക്യക്കല്ല്

മലയോരഗ്രാമമായ വണ്ണാൻ‌മല അറിയപ്പെടുന്നത് SSLC പബ്ലിക്ക് പരീക്ഷക്ക് മുഴുവൻ കുട്ടികളും എട്ടുനിലയിൽ പൊട്ടി ‘സം‌പൂജ്യരായി‘ വർഷാവർഷം പത്രത്താളുകളിൽ ഇടം നേടുന്ന ഗവ: മോഡൽ ഹൈസ്കൂളിന്റെ പേരിലാണു. അവിടേക്ക് ഒരു ദിനം ഒരു പുതിയ മാഷ് എത്തുന്നു. വിനയചന്ദ്രൻ മാഷ് (പൃഥ്വി രാജ്). മാഷ് സ്കൂളിലെ വിദ്യാർത്ഥികളെയും പ്രധാന അധ്യാപകനടക്കം (നെടുമുടി വേണു) മറ്റു അധ്യാപകരിലും (സംവൃത സുനിൽ, ജഗദീഷ്, അനിൽ മുരളി,കോട്ടയം നസീർ, അനൂപ് ചന്ദ്രൻ) പുതിയ രീതികൾ കടുത്ത എതിർപ്പിനിടയിലും മാഷ് പ്രാവർത്തികമാക്കുന്നു. കുട്ടികളുടെയും നാട്ടുകാരുടെയും അധ്യാപകരുടെയും പരിഹാസത്തിനും കളിയാക്കലിനും പാത്രമാകുന്ന വിനയ ചന്ദ്രൻ മാസ്റ്റർ പിന്നീട് ഇവരുടെയൊക്കെ പ്രിയ മിത്രവും നാടിനു ഒരു മാതൃകാ പുരുഷനും ആയി മാറുന്നു.

വഴിവിട്ട രീതിയിൽ ജീവിതം മുന്നോട്ടുനയിക്കുന്ന വിദ്യാർത്ഥികളെ നേർവഴിക്കു കൊണ്ടുവരാൻ വിനയചന്ദ്രന്മാഷിനു കഴിയുന്നു. പോലീസിനും നാട്ടുകാർക്കും മാഷ് ഒരു സഹായിയാകുന്നു. വിദ്യാർത്ഥികളിൽ ഒളിഞ്ഞുകിടക്കുന്ന ചില കഴിവുകൾ മാഷ് പുറത്തുകൊണ്ടുവരുന്നു. പഠനത്തിൽ തീരെ താല്പര്യം കാണിക്കാത്ത വിദ്യാർത്ഥികളും പഠിപ്പിക്കാൻ തീരെ താല്പര്യം കാണിക്കാത്ത അധ്യാപകരും പിന്നീട് മാഷിന്റെ രീതികളുമായി പൊരുത്തപ്പെട്ടുപോകുമ്പോൾ ആ സ്കൂളിനും നാടിനും പുതിയ ഒരു മുഖം കൈവരുന്നു.

ചിട്ടയായ പാഠ്യക്രമത്തിലൂടെ SSLC പരീക്ഷക്ക് ആ വർഷം എഴുതാൻ പോകുന്ന ആകെയുള്ള 12 കുട്ടികളേയും വിജയിപ്പിക്കാൻ മാഷിനു ആകുമോ? ഇതിന്റെ ഉത്തരമെന്താണു എന്നാണു ക്ലൈമാക്സിൽ പ്രേക്ഷകർ കാണാൻ കൊതിക്കുന്നതും....

ചിത്രത്തിൽ ഒളിഞ്ഞുകിടക്കുന്ന മറ്റൊരു സസ്പൻസ്, എന്തിനാണു എവിടുന്നോ ഒരു മാഷ് ഇതുപോലെ ഒരു കുഗ്രാമത്തിൽ എത്തി അവിടെ നന്നാക്കാൻ ശ്രമിക്കുന്നത് എന്നതാണു. ആരാണു യഥാർത്ഥത്തിൽ ഈ മാഷ്? - എന്നതിന്റെ ഉത്തരവും ഒരു സസ്പൻസായി സംവിധായകൻ ചിത്രത്തിൽ അവതരിപ്പിക്കുന്നുണ്ട്.