മുന്തിരിവള്ളികൾ തളിർക്കുമ്പോൾ

പഞ്ചായത്ത് സെക്രട്ടറിയായ ഉലഹന്നാൻ എന്ന മധ്യവയസ്‌കൻ തന്റെ ദിനചര്യകളിൽ മാറ്റമേതുമില്ലാതെ യാന്ത്രികമായ ജീവിതം നയിക്കുന്നു.ഭാര്യ അന്നമ്മയെ അയാൾ ശ്രദ്ധിക്കാറുണ്ടായിരുന്നില്ല. കട്ടിലിന്റെ ഇരുവശങ്ങളിലുമായി അവർ ജീവിതം തള്ളിനീക്കി.ഒരു പഴയ സുഹൃത്തിന്റെ നിർബന്ധത്തിന് വഴങ്ങി ഉലഹന്നാൻ തന്റെ കോളേജ് പൂർവവിദ്യാർത്ഥി സംഗമത്തിൽ പങ്കെടുക്കുകയും അവിടെ വെച്ച് തന്റെ മുൻ കാമുകിയായ ഇന്ദുലേഖയെ കണ്ടുമുട്ടുകയും ചെയ്യുന്നതോടെ അയാളുടെ ജീവിതത്തിൽ മാറ്റങ്ങളുണ്ടാകുന്നു.ഉലഹന്നാൻ ജീവിതത്തിൽ രസം കണ്ടെത്താൻ തീരുമാനിക്കുന്നു. ഉലഹന്നാൻ തന്റെ സ്ഥിരം മദ്യപാന സദസ്സിൽ വച്ച് സുഹൃത്തുക്കളോട് സംസാരിക്കുന്നതിനിടയിൽ വേണുക്കുട്ടൻ എന്ന കൂട്ടുകാരൻ തന്റെ ചില കാമുകിമാരെ പരിചയപ്പെടുത്താമെന്നും ചില വിദ്യകൾ പഠിപ്പിക്കാമെന്നും വാഗ്ദാനം ചെയ്യുന്നു. 

അതിനിടയിൽ, ഉലഹന്നാൻ തന്റെ ഓഫീസിലെ ജൂലി എന്ന പെൺകുട്ടിയുമായി ഒരു ബന്ധം ആരംഭിക്കുന്നു. അവളുടെ പല കാമുകന്മാരിൽ ഒരാളാണ് താണെന്നറിഞ്ഞതോടെ ആ ബന്ധത്തിൽ നിന്നും പിൻവാങ്ങുന്നു.

ഒരിക്കൽ ജേക്കബ് എന്ന സുഹൃത്ത് അന്നമ്മ പാടുന്ന വീഡിയോ ഉലഹന്നാനെ കാണിച്ചപ്പോൾ അന്നമ്മയ്ക്ക് പാടാനറിയുമെന്ന കാര്യം മറന്നുപോയ ഉലഹന്നാൻ അമ്പരന്നു.അയാൾ പഴയ കാല ഓർമകളിലേക്ക് പോകുന്നു. പിറ്റേന്ന് പള്ളിയിൽ വച്ച് അന്നമ്മയെ നോക്കിക്കൊണ്ട് തന്റെ ഭാര്യയെ വളരെക്കാലമായി താൻ ഗൗനിക്കുന്നില്ലെന്നു അയാൾ തിരിച്ചറിയുന്നു. പിന്നീടങ്ങോട്ട് അയാൾ സ്നേഹത്തോടെയും ശ്രദ്ധയോടെയും ഭാര്യയുമായി ഇടപഴകാൻ തുടങ്ങുന്നു.

ഒരു ദിവസം മകൾ ജിനിയുടെ അലമാരയിൽ നിന്നും അന്നമ്മ ഒരു സമ്മാനം കണ്ടെടുക്കുകയും മകളുടെ പെരുമാറ്റത്തിലെ അസ്വഭാവികത ഉലഹന്നാനോട് പങ്കുവെക്കുകയും ചെയ്യുന്നു. മകളെ ചോദ്യം ചെയ്താൽ അതവളുടെ പഠനത്തെ ബാധിക്കുമെന്ന് പറഞ്ഞ ഉലഹന്നാൻ മകളുടെ കൂട്ടുകാരുമായി സംസാരിക്കുകയും മകൾക്ക് ഒരാളുമായി അടുപ്പമുണ്ടെന്ന് മനസിലാക്കുകയും ചെയ്യുന്നു. ഒരു ദിവസം മകൾ സ്കൂളിൽ നിന്നും ഹോട്ടലിലേക്ക് പോകുന്നത് കണ്ട അയാൾ അവളെ പിന്തുടരുന്നു.