റീമ കല്ലിങ്കൽ

Rima Kallingal

മലയാള ചലച്ചിത്ര താരം. 1984- ൽ തൃശ്ശൂർ ജില്ലയിലെ അയ്യന്തോൾ കല്ലിങ്കൽ വീട്ടിൽ കെ.ആർ. രാജന്റെയും ലീനാഭായിയുടെയും മകളായി ജനിച്ചു. കൂനൂർ സ്റ്റെയിൻസ് സ്കൂൾ , കോലഴി ചിന്മയ വിദ്യാലയ എന്നിവിടങ്ങളിൽ നിന്ന് പ്രാഥമിക വിദ്യാഭ്യാസം പൂർത്തിയാക്കി. ബാംഗ്ലൂർ ക്രൈസ്റ്റ് യൂണിവേഴ്സിറ്റിയിൽ  നിന്നും ജേർണലിസത്തിൽ ബിരുദം നേടി. ചെറുപ്പംമുതൽ ക്ലാസിക്കൽ നൃത്തം പഠിച്ചിട്ടുള്ള റിമ കലാമണ്ഡലം രംഗനായികയുടെ കീഴിൽ ഭരതനാട്യവും മോഹിനിയാട്ടവും അഭ്യസിച്ചു. ബംഗളൂരുവിൽ നിന്നും കണ്ടമ്പററി ഡാൻസ് പഠിച്ചു.Taekwondo, Chao എന്നീ ആയോധനമുറകൾ റിമ അഭ്യസിച്ചിട്ടുണ്ട്. ഏഷ്യാനെറ്റിന്റെ ഡാൻസ് റിയാലിറ്റിഷോയായ വൊഡാഫോൺ തകധിമിയിൽ റിമ സെമി ഫൈനലിസ്റ്റായിരുന്നു. മോഡലിംഗിൽ ശ്രദ്ധകേന്ദ്രീകരിയ്ക്കാൻ വേണ്ടി റിമ ബാംഗ്ലൂരിലേയ്ക്ക് താമസം മാറ്റിയിരുന്നു. അതിനുശേഷം മിസ് കേരള സൗന്ദര്യ മത്സരത്തിൽ പങ്കെടുക്കുകയും രണ്ടാം സ്ഥാനം നേടുകയും ചെയ്തു.

ഒരു മാഗസിന്റെ കവർ ഗേളായി റിമയുടെ ഫോട്ടോ കണ്ടിഷ്ടപ്പെട്ട സംവിധായകൻ ലാൽ ജോസ് Mazhai Varappoguthu എന്ന തമിഴ് സിനിമയിലേയ്ക്ക് റിമയെ തിരഞ്ഞെടുത്തു. പക്ഷേ ആ സിനിമ നടന്നില്ല. അതിനുശേഷമാണ് 2009-ൽ ശ്യാമപ്രസാദ് സംവിധാനം ചെയ്ത ഋതു വിൽ നായികയായി റിമ അഭിനയിയ്ക്കുന്നത്. ഋതുവിലെ വർഷ എന്ന കഥാപാത്രം റിമയ്ക്ക് ശ്രദ്ധേയമായ തുടക്കം നൽകി. തുടർന്ന് നിരവധി സിനിമകളിൽ റിമ കല്ലിങ്കൽ ശക്തമായ കഥാപാത്രങ്ങള് അവതരിപ്പിച്ചു. 2012-ൽ 22 ഫീമെയിൽ കോട്ടയം എന്ന സിനിമയിൽ റിമ അവതരിപ്പിച്ച ടെസ്സ എന്ന കഥാപാത്രം പ്രേക്ഷകപ്രീതിയും നിരൂപക പ്രശംസയും ഒരുപോലെ നേടി. നിദ്ര, 22 ഫീമെയിൽ കോട്ടയം എന്നീ ചിത്രങ്ങളിലെ അഭിനയത്തിന്  മികച്ച നടിക്കുള്ള 2012-ലെ കേരളസംസ്ഥാന ചലച്ചിത്ര പുരസ്ക്കാരത്തിനും റിമ അർഹയായി. മലയാളം സിനിമകൾ കൂടാതെ തമിഴ്, ഹിന്ദി സിനിമകളിലും റിമ അഭിനയിച്ചിട്ടുണ്ട്.

ടെലിവിഷൻ ചാനലുകളിലെ റിയാലിറ്റിഷോ അവതാരകയായും റിമ പ്രവർത്തിച്ചിട്ടുണ്ട്. 2014-ൽ റിമ "മാമാങ്കം" എന്ന പേരിൽ ഒരു ഡാൻസ് ഇൻസ്റ്റിറ്റ്യൂട്ട് കൊച്ചിയിൽ ആരംഭിച്ചു. ഇന്ത്യയിലും വിദേശത്തുമായി നിരവധി വേദികളിൽ റിമ കല്ലിങ്കൽ നൃത്തം അവതരിപ്പിച്ചിട്ടുണ്ട്. ജ്വല്ലറികൾ അടക്കമുള്ള പല സ്ഥാപനങ്ങളുടെയും പരസ്യ ചിത്രങ്ങൾക്ക് റിമ മോഡലായിട്ടുണ്ട്.

WCC (Women in Cinema Collective)യുടെ സ്ഥാപക അംഗം കൂടിയാണ് സാമൂഹികപ്രവർത്തകയായ റിമ കല്ലിങ്കൽ.

2013 നവംബർ 1 -നായിരുന്നു റിമ കല്ലിങ്കലിന്റെ വിവാഹം. സംവിധായകൻ ആഷിക് അബുവിനെയാണ് റിമ വിവാഹം ചെയ്തത്.