കാഴ്ച

ഗുജറാത്തിലുണ്ടായ ഭൂകമ്പത്തിൽ കുടുംബത്തെ നഷ്ടപ്പെട്ട പവൻ എന്ന കുട്ടി ഒരു ഭിക്ഷാടന സംഘത്തിലകപ്പെട്ട് കേരളത്തിലേക്കെത്തുന്നു. അവിടെ നിന്നും ഓടി രക്ഷപ്പെട്ട അവനെ മാധവൻ എന്ന ഗ്രാമീണൻ കാണാനിടയാകുന്നു. കടുത്ത സിനിമാ പ്രേമി ആയിരുന്ന അയാൾ തന്റെ പ്രൊജക്ടറിലൂടെ നാട്ടിൻപുറത്തെ ആളുകൾക്കായി സിനിമ പ്രദർശിപ്പിച്ചാണ് ജീവിച്ചു പോന്നിരുന്നത്. അലഞ്ഞു തിരിയുന്ന ആ കൊച്ചു കുട്ടിയോട് ദയ തോന്നിയ മാധവൻ അവനെ കൂടെ കൂട്ടുകയും വീട്ടിൽ താമസിപ്പിക്കുകയും ചെയ്തു. അയാളും ഭാര്യ ലക്ഷ്മിയും സ്വന്തം മകനെപ്പോലെ അവനെ പരിപാലിച്ചു.സ്കൂൾ കുട്ടിയായ മകളും അവനെ അതിയായി സ്നേഹിച്ചു. ഭാഷയുടെ അതിരുകൾക്കപ്പുറത്ത് അവർ പരസ്പരം സ്നേഹം കൈമാറി.

അങ്ങനെയിരിക്കെ ഒരു വ്യാജ പരാതിയിന്മേൽ മാധവനെ പോലീസ് അറസ്റ്റ് ചെയ്യുന്നു. ഉടനെ തന്നെ അയാളെ വിട്ടയക്കുന്നുണ്ടെങ്കിലും കുട്ടിയെ ജുവനൈൽ ഹോമിലേക്ക് മാറ്റുകയാണുണ്ടായത്. അവനെ വീണ്ടെടുക്കാനുള്ള മാധവന്റെ ശ്രമങ്ങൾ നിയമപരമായ തടസങ്ങൾ മൂലം പരാജയപ്പെടുന്നു. ഒടുവിൽ കുട്ടിയെ അവന്റെ സ്വദേശമായ ഗുജറാത്തിലേക്ക് അയക്കാൻ തീരുമാനമാവുകയും മാധവൻ പവനുമായി ഗുജറാത്തിലേക്ക് യാത്ര തിരിക്കുകയും ചെയ്യുന്നു.