കെട്ട്യോളാണ് എന്റെ മാലാഖ

കഠിനാധ്വാനിയായ ഒരു യുവകർഷകനാണ് സ്ലീവാച്ചൻ (ആസിഫ് അലി). വീട്ടിൽ വയസ്സായ അമ്മ (മനോഹരി ജോയ്) മാത്രമേയുള്ളൂ. വിവാഹിതരായ സഹോദരിമാർ സമീപത്ത് താമസിക്കുന്നു. അവർ  സ്ലീവാച്ചന് വിവാഹാലോചനകൾ നടത്തുന്നുണ്ടെങ്കിലും അയാൾ താത്പര്യം കാണിക്കുന്നില്ല. 

ഒരു ദിവസം വീട്ടിലെത്തിയ സ്ലീവാച്ചൻ കാണുന്നത് അമ്മ അടുക്കളയിൽ ബോധംകെട്ടുകിടക്കുന്നതാണ്. അമ്മയെ വീട്ടിൽ ഒറ്റയ്ക്കാക്കുന്നത് ശരിയല്ലെന്നു തോന്നിയ സ്ലീവാച്ചൻ വിവാഹം കഴിക്കാൻ തീരുമാനിക്കുന്നു.

സ്ത്രീസൗഹൃദങ്ങളോ പ്രണയ, ലൈംഗിക അനുഭവങ്ങളോ ഇല്ലാത്ത സ്ലീവാച്ചന് ദാമ്പത്യത്തെക്കുറിച്ച് ആശങ്കയുണ്ട്. അതു കൊണ്ടു തന്നെ റിൻസി(വീണ നന്ദകുമാർ) യുമായുള്ള വിവാഹം തീരുമാനിക്കുന്നതോടെ അയാൾ അസ്വസ്ഥനാകുന്നു.

വിവാഹരാത്രിയിൽ തന്നെ സ്ലീവാച്ചൻ കുടിച്ചു ബോധംകെട്ട നിലയിലാണ് റിൻസിയുടെ അടുത്തെത്തുന്നത്. തുടർന്നും,  കിടപ്പറയിൽ, പല കാരണങ്ങൾ പറഞ്ഞ് അയാൾ  റിൻസിയുടെ താത്പര്യങ്ങളിൽ നിന്ന് ഒഴിഞ്ഞു മാറുന്നു.   അതിൻ്റെ കുറ്റബോധത്തിൽ, പകൽനേരങ്ങളിലും റിൻസിയിൽ നിന്ന് അയാൾ  അകന്നു നില്ക്കുന്നു.  സംശയം തോന്നിയ റിൻസി അയാളോട് സംസാരിക്കാൻ ശ്രമിച്ചിട്ടും ഫലമുണ്ടാകുന്നില്ല.

ഭാര്യയെ ലൈംഗികമായി കീഴ്പെടുത്തുന്ന ഭർത്താക്കൻമാർക്കേ വിലയുണ്ടാകൂ എന്ന മട്ടിൽ കൂട്ടുകാരിൽ ചിലർ സ്ലീവാച്ചനെ ഉപദേശിക്കുന്നു. അതു വിശ്വസിച്ച അയാൾ  രാത്രിയിൽ  മദ്യപിച്ച് കിടപ്പറയിലെത്തി റിൻസിയെ ബലമായി കീഴ്പ്പെടുത്തി ലൈംഗികവേഴ്ച നടത്തുന്നു. പരിക്കേറ്റ റിൻസി ആശുപത്രിയിലാവുന്നു.

താൻ ചെയ്തതിൻ്റെ ഗൗരവം അയാൾക്ക് പിന്നീടാണ് ബോധ്യമാവുന്നത്. വീട്ടുകാരും കൂട്ടുകാരും അയാളെ കുറ്റപ്പെടുത്തുകയും കളിയാക്കുകയും ചെയ്യുന്നു. 

സുഖം പ്രാപിച്ചു വരുന്ന റിൻസിയോട് അടുക്കാനും മാപ്പു പറയാനും സ്ലീവാച്ചൻ  ശ്രമിക്കുന്നെങ്കിലും അവൾ വഴങ്ങുന്നില്ല. പിരിയാം എന്ന നിലപാടിലാണ് അവൾ. ഒടുവിൽ അയാളും അതേ  തീരുമാനത്തിലെത്തുന്നു.