മൂന്നാംപക്കം

റെയിൽവേ ഉദ്യോഗസ്ഥനായി വിരമിച്ച തമ്പി മകന്റെ മരണ ശേഷം തന്റെ തറവാട്ടിൽ ഏകാന്ത വാസത്തിലായിരുന്നു. താനേറെ സ്നേഹിക്കുന്ന ചെറുമകൻ പാച്ചു ബാംഗ്ലൂരിലെ പഠനം പൂർത്തിയാക്കി സുഹൃത്തുക്കളുമായി എത്തുന്നുണ്ടെന്നറിഞ്ഞതോടെ തമ്പി ഉത്സാഹഭരിതനായി. ഭാര്യയുടെയും മകന്റെയും മരണശേഷമുണ്ടായ ഒറ്റപ്പെടലിൽ ഒരേയൊരു പ്രതീക്ഷയായിരുന്നു രക്തബന്ധങ്ങളിൽ അവശേഷിച്ച അവസാനത്തെ കണ്ണിയായ പാച്ചു. പാച്ചു ഏറ്റവും കൂടുതൽ കത്തുകളെഴുതിയിരുന്നത് മുത്തശ്ശനായ തമ്പിക്കും കാമുകിയായ ഭദ്രയ്ക്കുമാണ്.മുംബൈയിൽ താമസിച്ചിരുന്ന പാച്ചുവിന്റെ അമ്മയുമായി ചെറിയ ആശയവിനിമയങ്ങൾ മാത്രമാണുണ്ടായിരുന്നത്.

 പാച്ചുവിനും സുഹൃത്തുക്കൾക്കുമായി തമ്പി ആവേശത്തോടെ തറവാട്ടിൽ ഒരുക്കങ്ങൾ നടത്തി. തനിക്ക് കുഞ്ഞു സമ്മാനവുമായി വന്ന പാച്ചുവിനെയും പാച്ചുവിന്റെ കൂട്ടുകാരെയും സ്നേഹവായ്പ്പുകളോടെ തമ്പി സ്വീകരിച്ചു.തങ്ങളോട് എളുപ്പമിണങ്ങിയ മുത്തശ്ശനെ പാച്ചുവിന്റെ കൂട്ടുകാരും ഇഷ്ടപ്പെട്ടു.കുറുമ്പുകളും കളികളുമായി സന്തോഷത്തിന്റെ നാളുകളായിരുന്നു പിന്നീട്.സമീപപ്രദേശത്തെ കടലിൽ ഇടയ്ക്കിടെ കുളിക്കാൻ പോകുന്നതായിരുന്നു നാട്ടിലെത്തിയ ശേഷം പാച്ചുവിന്റെയും കൂട്ടുകാരുടെയും വിനോദങ്ങളിലൊന്ന്.പതിവുപോലെ കടലിൽ കുളിക്കാൻ പോയ ഒരു ദിവസം പാച്ചുവും കൂട്ടുകാരനും ശക്തമായ തിരമാലയിൽപ്പെട്ട് ഒഴുകിപ്പോയി. അതിൽ പാച്ചു മാത്രം തീരത്തേക്ക് തിരിച്ചു വന്നില്ല. അധികൃതർ വന്നു തിരച്ചിൽ നടത്തിയെങ്കിലും പാച്ചുവിനെ കണ്ടുകിട്ടിയില്ല. തകർന്നു പോയ തമ്പി ഇക്കാര്യം ഉൾക്കൊള്ളനാകാതെ പാച്ചു രക്ഷപ്പെട്ടു തിരിച്ചു വരുമെന്ന പ്രതീക്ഷയോടെ കാത്തിരുന്നു. ഭദ്രയ്ക്കും വിവരമറിഞ്ഞെത്തിയ പാച്ചുവിന്റെ അമ്മയ്ക്കും തമ്പി ഇതേ പ്രതീക്ഷകൾ നൽകി.