അദ്ദേഹം എന്ന ഇദ്ദേഹം

ഉണ്ണിത്താൻ മുതലാളി (രാജൻ പി ദേവ് ) സ്വർണ്ണ കള്ളക്കടത്തു നടത്തുന്ന ബിസിനസ്സ്കാരൻ. അയാളുടെ പ്രധാന സഹായി ബെന്നി (സിദ്ധിക്ക് ) ഒരിക്കൽ സ്വർണ്ണം കടത്തുമ്പോൾ പോലീസ് പിടിയിൽ പെട്ടു. പത്ത് ലക്ഷത്തിന്റെ സ്വർണ്ണം ആണ് അയാൾ സൂക്ഷിച്ചിരുന്നത്. പക്ഷെ രണ്ടു ലക്ഷത്തിന്റെ സ്വർണ്ണം ആണ് അയാളുടെ കയ്യിൽ നിന്നും പിടിച്ചെടുത്തതെന്നു പോലീസ് പറഞ്ഞു. അപ്പോൾ ബാക്കി എട്ട് ലക്ഷത്തിന്റെ സ്വർണ്ണം അയാൾ മറ്റെവിടെയോ ഒളിപ്പിച്ചു വച്ചിട്ടുണ്ടെന്ന് ഉണ്ണിത്താൻ മുതലാളി വിശ്വസിച്ചു. ബെന്നി ജയിലിൽ നിന്നും മോചിതനാകുന്ന ദിവസം അവനെ കൂട്ടികൊണ്ടു വരാൻ ഉണ്ണിത്താൻ തന്റെ സഹായി മുത്തു (വിജയരാഘവൻ)വിനെയും കൂട്ടരെയും അയച്ചു. പക്ഷേ ബെന്നി അവരോടൊപ്പം പോകാൻ കൂട്ടാക്കിയില്ല. അവൻ നേരെ ചെന്നു കണ്ടത് ഉണ്ണിത്താൻ മുതലാളിയുടെ ഡ്രൈവർ ആയിരുന്ന സുഹൃത്ത് സെയ്‌ദാലിയെ (മാമുക്കോയ) ആണ്.

എട്ട് ലക്ഷത്തിന്റെ സ്വർണ്ണം എവിടെ ഒളിപ്പിച്ചു വച്ചു എന്നും ഉണ്ണിത്താൻ മുതലാളി അതിനു വേണ്ടി തിരക്കി നടക്കുന്നുണ്ടെന്നും സെയ്‌ദാലി ബെന്നിയോട് പറയുന്നു.  അത് പോലീസ്കാർ തട്ടിയെടുത്തതാണെന്നും തന്റെ കയ്യിൽ ഒന്നും ഇല്ലെന്നും ബാങ്കിൽ കുറച്ചു രൂപയുണ്ടെന്നും ബെന്നി പറയുന്നു. അക്കൗണ്ട് ക്ലോസ് ചെയ്ത് ആ പൈസയും കൊണ്ട് നാട് വിടാനാണ് ബെന്നിയുടെ തീരുമാനം.

ബാങ്കിൽ, തന്റെ കമ്പനിക്ക് വേണ്ടി അഞ്ച് ലക്ഷം രൂപ ക്യാഷ് പിൻവലിക്കുന്ന അനന്തകൃഷ്ണൻ സ്വാമി(ജഗതി)യെ ബെന്നി ശ്രദ്ധിച്ചു. അൽപ്പ സമയത്തിനുള്ളിൽ അയാളുടെ രൂപ ആരോ ഒരാൾ തട്ടിയെടുത്ത് ഓടുന്നു. സ്വാമി ഒച്ചയുണ്ടാക്കിയപ്പോൾ അയാളെ സഹായിക്കാൻ ബെന്നിയെത്തി. രൂപ തട്ടിയെടുത്തവനെ ബെന്നി പിന്തുടർന്ന് ബാഗ് പിടിച്ചു വാങ്ങി, ഒരു റിക്ഷയിൽ രക്ഷപെടാൻ തുടങ്ങവേ അവനും അതിൽ കയറിപ്പറ്റി. ആ റിക്ഷ ഒരു അപകടത്തിൽ പെടുന്നു. രണ്ടു പേർക്കും മുറിവുകൾ ഉണ്ടായി. അവന്റ പേര് ജോയ്സി പെരേര (ജഗദീഷ് ). അവന്റെ ഏക സഹോദരി നാൻസി ഒരു എമർജൻസി ഓപ്പറേഷന്റെ വക്കിലാണ്. അതിന് അയാൾക്ക് ഒരു ലക്ഷം രൂപ വേണം. ബാക്കി രൂപ എടുത്തുകൊള്ളാൻ അയാൾ ബെന്നിയോട് പറഞ്ഞു. ബോധം കെട്ട് വീണ ബെന്നിയെ തന്റെ വാടക വീട്ടിലെ ഉടമസ്ഥയും ഡോക്ടറുമായ മാർഗ്രറ്റിന്റെ അരികിൽ എത്തിച്ചു ജോയ്സി. തന്റെ വിവാഹ ദിവസം പ്രതിശ്രുതവരൻ ഫ്രഡ്‌ഡി (മനുവർമ്മ ) ഒരു ട്രക്ക് അപകടത്തിൽ മരണപ്പെട്ടത് തന്റെ കൺമുന്നിൽ കണ്ട നാൻസി സമനില തെറ്റി രോഗിയായി തീർന്നതാണ്.

സ്വാമിയുടെ കമ്പനി ഉടമസ്ഥൻ സതീശൻ(ടി പി മാധവൻ ) പോലീസിൽ പരാതി നൽകിയതിനെ തുടർന്ന് പോലീസ് എസ് പി ശ്രീകണ്ഠൻ നായർ (ജനാർദ്ദനൻ ), സർക്കിൾ ഇൻസ്‌പെക്ടർ ബാലചന്ദ്രൻ നായർ ( ഇന്നസെന്റ് ) എന്നിവർ കേസ് അന്വേഷണത്തിന്റെ ചുമതല ഏറ്റെടുത്ത് ചോദ്യം ചെയ്യൽ തുടങ്ങി. ബെന്നി ആ സമയത്ത് ബാങ്കിൽ ഉണ്ടായിരുന്നതിനാൽ പോലീസ് ന്യായമായും അയാളെ സംശയിച്ചു. എന്നാൽ ബെന്നിയുടെ ഫോട്ടോ കണ്ട സ്വാമി, മോഷ്ടിച്ചത് അവനല്ല എന്ന് പറഞ്ഞു. അങ്ങനെ അന്വേഷണം ജോയ്‌സിയിലേയ്ക്ക് തിരിഞ്ഞു. സെയ്‌ദാലിയുടെ കാറിൽ നാൻസിയെ ആശുപത്രിയിൽ നിന്നും ജോയ്‌സി കൊണ്ടു പോയത് കാരണം പോലീസ് സെയ്ദാലിയേയും ചോദ്യം ചെയ്തു. ഉണ്ണിത്താന്റെ ആൾക്കാരും സെയ്‌ദാലിയെയും ജോയ്‌സിയെയും അന്വേഷിച്ചു തുടങ്ങി. വഴിയിൽ വച്ച് സ്വാമി ജോയ്‌സിയെ കണ്ട് തിരിച്ചറിഞ്ഞു. അവിടെ നിന്നും എങ്ങനെയോ അവൻ ഓടി രക്ഷപെട്ടു. സെയ്‌ദാലിയെയും കൂട്ടി പോലീസ് ജോയ്സിയുടെ വീട്ടിൽ എത്തി. ജോയ്‌സി അവിടെ ഇല്ലാതിരുന്ന ആ സമയത്ത് ബെന്നി, നാൻസിയെയും കൊണ്ട് രക്ഷപെടാൻ ശ്രമിച്ചു. പക്ഷെ പോലീസ് അവനെ വളഞ്ഞു. നാൻസിയെ ഉപേക്ഷിച്ച ബെന്നി പണപെട്ടിയും കൊണ്ട് നദിയിൽ ചാടി രക്ഷപെടാൻ ശ്രമിക്കവേ പോലീസ് എസ് പി നിറയൊഴിച്ചു. അതൃപ്തരായ പോലീസ്കാർ നാൻസിയെ അറസ്റ്റ് ചെയ്തു.

വീട്ടിൽ ഏത്തിയ ജോയ്‌സി ആകെ കുഴപ്പത്തിലായി. ബെന്നി പണവും കൊണ്ട് കടന്നു കളഞ്ഞു. നാൻസി പോലീസ് കസ്റ്റഡിയിൽ.ജോയ്‌സിയുടെ കാമുകി മെഴ്‌സി (സുനിത ) മിഷൻ ആശുപത്രിയിൽ നഴ്സ് ആണ്. അവൻ അവളെ പോയി കണ്ട് സഹായം തേടുന്നു. ഇതിനിടയിൽ നഗരത്തിൽ വീണ്ടും ചില ബാങ്ക് കവർച്ചകളും കൊലപാതകങ്ങളും അരങ്ങേറുന്നു. എല്ലാം ചെയ്തത് ബോംബെയിൽ നിന്നും ഒളിച്ചോടി എത്തിയ മറ്റൊരു പെരേര. പക്ഷെ പോലീസ് സംശയിച്ചത് ജോയ്‌സി പെരെരയെ. ബോംബയിൽ നിന്നും ഏത്തിയ പെരേര(രഘുവരൻ )ബോംബെയിൽ നിന്നും വന്ന പോലീസ് ഉദ്യോഗസ്ഥൻ വിശ്വനാഥൻ ആണെന്ന് പറഞ്ഞ് എസ് പി ശ്രീകണ്ഠൻ നായരെ പോയി കാണുന്നു. പോലിസ് തന്നെ തിരിച്ചറിഞ്ഞിട്ടില്ല എന്ന് മനസ്സിലാക്കിയ പെരേര, ജോയ്‌സി പെരേരയെ ഇല്ലാതാക്കിയാൽ എല്ലാ കേസുകളിൽ നിന്നും തനിക്കു രക്ഷപ്പെടാൻ ആകുമെന്ന് വിശ്വസിച്ചു. പോലീസിൽ നിന്നും രക്ഷപെട്ട ബെന്നി പണവുമായി ജോയ്‌സിയെ തേടി അലഞ്ഞു. സെയ്‌ദാലി അവനെ നേരെ മെഴ്‌സിയുടെ അരികിൽ എത്തിച്ചു. മെഴ്‌സിയിൽ നിന്നും ജോയ്‌സി പോലീസിന് മുന്നിൽ കീഴടങ്ങാൻ പോകുന്നു എന്ന് മനസ്സിലാക്കി നേരെ അവിടെക്ക് പോയി. പോലീസ് സ്റ്റേഷന് മുന്നിൽ വച്ച് അവനെ തടഞ്ഞു.

കുറ്റവാളിയായ മറ്റൊരു പെരേര നടത്തിയ എല്ലാ മോഷണകുറ്റങ്ങളും പോലീസിന് കീഴടങ്ങിയാൽ ജോയ്‌സി പെരേരയുടെ മേൽ ചുമത്തപ്പെടും എന്ന് ബെന്നി അവനെ പറഞ്ഞു മനസ്സിലാക്കി. അപ്പോൾ അവിടെ കുറ്റവാളിയായ പെരേര എത്തി ജോയ്‌സിയെ കൊല്ലാൻ ശ്രമിച്ചു. ബെന്നി ബുദ്ധി പൂർവ്വം ജോയ്‌സിയെയും കൂട്ടി അവിടെ നിന്നും രക്ഷപെട്ടു. പോലീസ് കസ്റ്റഡിയിൽ ആയിരുന്ന നാൻസിക്ക് പെട്ടെന്ന് അസുഖം വന്നത് കൊണ്ട് ഗവണ്മെന്റ് ആശുപത്രിയിൽ അഡ്മിറ്റ്‌ ചെയ്യുന്നു. ഉടനെ ഓപ്പറേഷൻ വേണം, മിഷൻ ആശുപത്രിയിലേയ്ക്ക് മാറ്റണം.

ബോംബെയിൽ നിന്നും വന്ന പോലീസ് കമ്മിഷണർ വിശ്വനാഥൻ (റിസബാവ ) എസ് പി ശ്രീകണ്ഠൻ നായരെ ചെന്നു കണ്ടു. എസ് പി അയാളെ ആദ്യം വിശ്വസിച്ചില്ല എങ്കിലും ഡോക്യുമെന്റ്സ് പരിശോധിച്ച ശേഷം തെറ്റ് തിരുത്തി. കുറ്റവാളി പെരേരയുടെ രേഖാ ചിത്രം കണ്ടപ്പോൾ ആദ്യം പോലീസ് വേഷത്തിൽ വന്നത് പെരേര ആയിരുന്നു എന്ന് എസ് പി മനസ്സിലാക്കി.