ശ്രീകർ പ്രസാദ്

1963 മാർച്ച് 12 നു ചെന്നൈയിൽ ജനനം. സിനിമയേപ്പറ്റി കുട്ടിക്കാലം മുതൽക്കു തന്നെ അറിയാമായിരുന്നെങ്കിലും മദ്രാസ് യൂണിവേഴ്‌സിറ്റിയിൽ നിന്നുള്ള ഇംഗ്ലീഷ് സാഹിത്യത്തിലെ ബിരുദത്തിനു ശേഷം പത്രപ്രവർത്തകൻ ആകാൻ മോഹിച്ച ശ്രീകറിന്റെ ജീവിതം മാറ്റിമറിച്ചത് ഒരു വെക്കേഷനാണ്. തന്റെ അച്ഛനും പ്രഗൽഭ ഫിലിം എഡിറ്ററുമായ അക്കിനേനി സഞ്ചീവിയുടെ സ്റ്റുഡിയോയിലേക്കായിരുന്നു ആ വെക്കേഷനിലെ അദ്ദേഹത്തിന്റെ യാത്ര. ഒരു മാസത്തോളം  നീണ്ടു നിന്ന ആ അവധിക്കാലം ശ്രീകർ പ്രസാദ് എന്ന ചിത്രസംയോജകന്റെ പിറവിക്ക് നാന്ദി കുറിച്ചു.

സിംഹസ്വപ്നം എന്ന തെലുഗു ചിത്രത്തിലൂടെയാണ് ശ്രീകർ പ്രസാദ് ആദ്യമായി എഡിറ്ററാകുന്നത്. രാഖ് എന്ന തന്റെ രണ്ടാം ചിത്രത്തിലൂടെ തന്നെ മികച്ച എഡിറ്റർക്കുള്ള ദേശീയ പുരസ്കാരം 1989 -ൽ അദ്ദേഹം കരസ്ഥമാക്കി. ഷാജി എൻ കരുൺ സംവിധാനം ചെയ്ത വാനപ്രസ്ഥം എന്ന ചിത്രത്തിനുൾപ്പടെ ഏഴു തവണ മികച്ച എഡിറ്റർക്കുള്ള ദേശീയപുരസ്കാരവും 2010 -ൽ കമീനേ, കേരളവർമ പഴശ്ശിരാജാ , കുട്ടിസ്രാങ്ക് എന്നീ ചിത്രങ്ങൾക്കായി സ്‌പെഷ്യൽ ജൂറി പുരസ്കാരവും ലഭിച്ചിട്ടുണ്ട്. 

1990 -ൽ പുറത്തിറങ്ങിയ വ്യൂഹം ആണ് ആദ്യമലയാളചലച്ചിത്രം. 1992 -ൽ പുറത്തിറങ്ങിയ യോദ്ധയിലൂടെ ആദ്യ കേരളസംസ്ഥാനപുരസ്‌ക്കാരത്തിനു അർഹനായി. അഞ്ചുതവണ മികച്ച എഡിറ്റർക്കുള്ള കേരളചലച്ചിത്രപുരസ്കാരം നേടിയിട്ടുണ്ട്.
ഇതിനു പുറമെ രണ്ട് തവണ ആന്ധ്ര പ്രദേശ് ചലച്ചിത്രപുരസ്‌കാരമായ നന്ദി അവാർഡ് ലഭിച്ചു. 
നിരവധി തവണ ഫിലിംഫെയർ അവാർഡ്, വിജയ് ടിവി അവാർഡ് എന്നിവയും ലഭിച്ചിട്ടുണ്ട്. 

ഇന്ത്യൻ സിനിമയ്ക്ക് നൽകിയ സമഗ്ര സംഭാവനയ്ക്കായി ലിംക ബുക്ക് ഓഫ് റെക്കോർഡ്സിൽ "പീപ്പിൾ ഓഫ് ദ ഇയർ - 2013" ആയി അദ്ദേഹത്തെ ഉൾപ്പെടുത്തി. ലിംക ബുക്ക് ഓഫ് റെക്കോർഡിലെ "കൂടുതൽ ഭാഷകളിൽ എഡിറ്റുചെയ്ത സിനിമകൾ" എന്ന റെക്കോർഡും പ്രസാദിന് ഉണ്ട്. ഇദ്ദേഹം ഇതുവരെ 17 ഭാഷകളിൽ നിന്നുമായി 150 -ൽ അധികം സിനിമകൾ എഡിറ്റ് ചെയ്തിട്ടുണ്ട്.

ബോളിവുഡ് ചിത്രമായ പിസയുടെ സംവിധായകൻ അക്ഷയ് അക്കിനേനി ആണ് മകൻ. അക്ഷയുടെ ഭാര്യ തമിഴ് താരദമ്പതികളായ പാർത്ഥിപന്റെയും സീതയുടെയും മകളായ കീർത്തനയാണ്. 
ഇന്ത്യൻ സിനിമയുടെ തന്നെ അമരക്കാരിൽ ഒരാളായ എൽ വി പ്രസാദ് അദ്ദേഹത്തിന്റെ പിതൃസഹോദരനാണ്.