ഡെന്നിസ് ജോസഫ്

ഡെന്നീസ് ജോസഫ് ,കോട്ടയം ജില്ലയിലെ ഏറ്റുമാനൂരിൽ 1957 ഒക്ടോബർ 20 ന് എം.എൻ.ജോസഫിന്റെയും ഏലിയാമ്മ ജോസഫിന്റെയും മകനായി ജനിച്ചു, ഏറ്റുമാനൂർ ഗവൺമെന്റ് ഹൈസ്കൂളിൽനിന്ന് സ്കൂൾ വിദ്യാഭ്യാസവും കുറവിലങ്ങാട് ദേവമാതാ കോളജിൽനിന്നു ബിരുദ പഠനവും പൂർത്തിയാക്കി. കൂടാതെ ഫാർമസിയിൽ ഡിപ്ലോമയും നേടിയിട്ടുണ്ട്.

"കട്ട് കട്ട് " എന്ന സിനിമാ മാസികയിൽ പത്രപ്രവർത്തകനായാണ് തുടക്കം. പിന്നീട് കുറച്ചുകാലം ഒരു പ്രസ് നടത്തിയിരുന്നു.1985 ൽ ജേസിയുടെ "ഈറൻ സന്ധ്യ" എന്ന ചിത്രത്തിനു തിരക്കഥയൊരുക്കിക്കൊണ്ട് ആണ് സിനിമാ പ്രവേശം. പിന്നീടു വന്ന നിറക്കൂട്ട്, ശ്യാമ, രാജാവിന്റെ മകൻ തുടങ്ങിയ ചിത്രങ്ങൾ ഡെന്നിസിനെ അക്കാലത്തെ ഏറ്റവും വിലപിടിപ്പുള്ള തിരക്കഥാകൃത്താക്കി മാറ്റി . ജോഷി, തമ്പി കണ്ണന്താനം എന്നീ സംവിധായകരൊത്ത് നിരവധി സിനിമകളിൽ പങ്കാളിയായി.മമ്മൂട്ടിയെയും മോഹൻലാലിനെയും സൂപ്പർതാരങ്ങളാക്കിയ  ഒരു പിടി  സൂപ്പർ ഹിറ്റ്  സിനിമകൾ അദ്ദേഹം എഴുതി .  "നിറക്കൂട്ടിലെ" രവിവർമയും "ന്യൂഡൽഹി"യിലെ കൃഷ്ണമൂർത്തി എന്ന ജികെയും മമ്മൂട്ടിയുടെ എക്കാലത്തെയും മികച്ച കഥാപാത്രങ്ങളായി.  അതു പോലെ  മോഹൻലാലിനെ  താര പദവിയിൽ  ഉറപ്പിച്ച   "രാജാവിന്റെ മകനിലെ" വിൻസെന്റ് ഗോമസ്   ഡെന്നിസ് ജോസഫിന്റെ മറ്റൊരു   മികച്ച സൃഷ്ടിയാണ്.

കോട്ടയം കുഞ്ഞച്ചൻ,സംഘം, നായർസാബ്, നമ്പർ 20 മദ്രാസ് മെയിൽ, ഇന്ദ്രജാലം, ആകാശദൂത് തുടങ്ങിയ  വമ്പൻ ഹിറ്റുകൾ  ഡെന്നിസിന്റെ തൂലികയിൽ നിന്ന്  ഉണ്ടായതാണ്.  അഞ്ചു സിനിമകൾ സംവിധാനം ചെയ്ത ഡെന്നിസിന്റെ  "മനു അങ്കിൾ " എന്ന ചിത്രം മികച്ച കുട്ടികളുടെ ചിത്രത്തിനുള്ള ദേശീയ -  സംസ്ഥാന ചലച്ചിത്ര അവാർഡും നേടിയിരുന്നു. മാതൃഭൂമി വിശേഷാൽപ്രതിയിൽ പ്രസിദ്ധീകരിച്ച "സിദ്ധി"യാണ് ആദ്യ ചെറുകഥ. പിന്നീട് ജോഷി മാത്യു സംവിധാനം ചെയ്ത "പത്താം നിലയിലെ തീവണ്ടി" കലാകൗമുദിയിൽ പ്രസിദ്ധീകരിച്ചിരുന്നു.2020 ൽ "നിറക്കൂട്ടുകളില്ലാതെ" എന്ന പേരിൽ ഓർമക്കുറിപ്പുകൾ പുറത്തിറങ്ങിയിട്ടുണ്ട്.

ഭാര്യ: ലീന. മക്കൾ: എലിസബത്ത്, റോസി, ജോസ്
2021 മെയ് 10 ന് ഹൃദയാഘാതത്തെ തുടർന്നു കോട്ടയത്തെ ഒരു സ്വകാര്യ ആശുപത്രിയിൽ   വച്ച് അന്തരിച്ചു .