ഷെഫീക്കിന്റെ സന്തോഷം

ദുബായിൽ അക്കൗണ്ടൻ്റായി ജോലി ചെയ്യുന്ന ഷഫീക്കി(ഉണ്ണി മുകുന്ദൻ )ൻ്റെ, നാട്ടിലെ ഉറ്റ ചങ്ങാതിയാണ് ഓട്ടോ ഡ്രൈവറായ അമീർ (ബാല). അമീറിൻ്റെ അയല്ക്കാരനായ റഷീദിൻ്റെ (ഹരീഷ് പേങ്ങൻ) മകളും ബാല്യകാലസഖിയുമായ സൈനു(ദിവ്യ പിള്ള)വുമായി ഷെഫീക്കിൻ്റെ വിവാഹം നേരത്തേ  തീരുമാനിച്ചതാണ്. 

അമീറിന്റെ വീട്ടിലേക്ക് ഒരു നടവഴി മാത്രമാണുള്ളത്. അക്കാരണം കൊണ്ടു തന്നെ അയാൾക്കു വരുന്ന വിവാഹാലോചനകളെല്ലാം മുടങ്ങുന്നു. വഴി വീതി കൂട്ടാൻ പറമ്പ് വിട്ടു നല്കാൻ റഷീദ് തയാറല്ല. ഇതിൻ്റെ പേരിൽ ഇരു വീട്ടുകാരും തമ്മിൽ വഴക്കും വക്കാണവും പതിവാണ്.

വിവാഹത്തിനായി നാട്ടിൽ വന്ന ഷഫീക്ക്, പണ്ട് തൻ്റെ മൂലക്കുരു ചികിത്സിച്ചു ഭേദമാക്കിയ ഡോക്ടർക്ക് (മനോജ് കെ ജയൻ)  ദുബായിൽ നിന്നു വാങ്ങിയ ഹുക്ക സമ്മാനമായി നല്കുന്നു. 

 വിവാഹനിശ്ചയം നടക്കുന്ന ദിവസം ഷഫീക്കിനെ അന്വേഷിച്ചെത്തുന്ന പൊലീസ് അയാളെ കസ്റ്റഡിയിലെടുക്കുന്നു.അയാൾ ഡോക്ടർക്ക് സമ്മാനിച്ച ഹുക്കയിലെ പുകയിലയിൽ മയക്കുമരുന്നുണ്ടെന്ന സംശയത്തിലാണ് ഷഫീക്കിനെയും ഒപ്പം ഡോക്ടറെയും പോലീസ് പിടികൂടുന്നത്. പിടിച്ചെടുത്ത പുകയില പരിശോധനയ്ക്കായി ലാബിലേക്ക് അയയ്ക്കുന്ന പൊലീസ്, അതിൻ്റെ ഫലം വരുന്നതുവരെ ഷഫീക്കിനെയും  ഡോക്ടറെയും നിബന്ധനകളോടെ പോകാനനുവദിക്കുന്നു.

ഇതിനിടയിൽ, മയക്കുമരുന്നു കേസിൽ പ്രതിയായ ആളുമായിട്ടുള്ള വിവാഹം ശരിയല്ലെന്നുള്ള തീരുമാനത്തിൽ മഹല്ല് കമ്മറ്റി എത്തിച്ചേരുന്നു.  അതംഗീകരിക്കുന്ന റഷീദ്, ഇറച്ചിവെട്ടുകാരനായ നൗഷാദുമായി (അനൂപ് പന്തളം) മകളുടെ വിവാഹം ഉറപ്പിക്കുന്നു. 

താൻ ഷഫീക്കിനെയേ വിവാഹം കഴിക്കൂ എന്ന് സൈനു വാശി പിടിക്കുമ്പോൾ അയാൾ തൂങ്ങിച്ചാകാൻ ഒരുമ്പെടുന്നു. അബദ്ധത്തിൽ കുടുക്ക് കഴുത്തിൽ മുറുകുമ്പോൾ, അയാളെ അമീർ രക്ഷിക്കുന്നു. വാപ്പയുടെ ആത്മഹത്യാശ്രമത്തെത്തുടർന്ന് നൗഷാദുമായുള്ള വിവാഹത്തിന് സൈനു സമ്മതിക്കുന്നു. ഷഫീക്കിൻ്റെ സുഹൃത്തും മഹല്ല് കമ്മിറ്റി അംഗവുമായ അൻവർ (ഷഹീൻ സിദ്ധീക്ക്) വിവാഹത്തിൽ നിന്നു പിൻമാറാൻ ആവശ്യപ്പെട്ട് നൗഷാദിനെ ഭീഷണിപ്പെടുത്തുന്നു.

വിവാഹദിവസം പള്ളിയിൽ നിക്കാഹ് നടക്കുന്നതറിഞ്ഞ് എത്തിയ ഷഫീക്ക് അവിടുത്തെ ചടങ്ങ് കണ്ടു ഞെട്ടുന്നു.