പടവെട്ട്

കായികതാരം ആയിരുന്നെങ്കിലും, പരിക്കേറ്റതു കാരണം അത് തുടരാൻ കഴിയാതെ അപകർഷതാ ബോധം പേറുന്ന രവി (നിവിൻപോളി ) എന്ന നായകന്റെ കാഴ്ചപ്പാടിലൂടെയാണ് കഥ വികസിക്കുന്നത്. ആത്മ വിശ്വാസം നഷ്ടപ്പെട്ട രവി, അമ്മയുൾപ്പെടെ എല്ലാവരോടും ശത്രുതാ മനോഭാവം പുലർത്തുകയും, പ്രത്യേകിച്ച് ജോലിക്കൊന്നും പോവാതിരിക്കുകയും ചെയ്യുന്ന ആളാണ്‌.  രവിയുടെ ബന്ധുവും അയൽവാസിയും ആയ മോഹനൻ (ഷൈൻ ടോം ചാക്കോ ) രവിയുമായി നല്ല രസത്തിൽ അല്ല. ചോർന്നൊലിക്കുന്ന സ്വന്തം വീട് നന്നാക്കാൻ, രവിയുടെ അമ്മ പഞ്ചായത്തിന്റെ സഹായം തേടുന്നുവെങ്കിലും പല തവണ അത് നിഷേധിക്കപ്പെടുന്നു. ഈ അവസരത്തിൽ, ഭരണ സമിതിയുടെ എതിർ ഭാഗത്തു നിൽക്കുന്ന കുയ്യാലി (ഷമ്മി തിലകൻ ) എന്ന രാഷ്ട്രീയ പ്രവർത്തകൻ, അവസരം മുതലാക്കുകയും രവിയുടെ വീട് മേയാൻ അയാളുടെ പാർട്ടിയുടെ സേവനം ലഭ്യമാക്കുകയും ചെയ്യുന്നു.

മോഹനന്റെ അച്ഛൻ, ഒരു കാട്ടുപന്നിയുടെ ആക്രമണത്തിൽ കൊല്ലപ്പെടുന്നതാണ് കുയ്യാലിക്ക് കിട്ടുന്ന അടുത്ത അവസരം. പഞ്ചായത്ത് ഭരണ സമിതിയുടെ പ്രവർത്തനങ്ങൾ, ശരിയായ ദിശയിൽ അല്ല എന്ന് നാട്ടുകാരെ ബോധ്യപ്പെടുത്തുന്ന കുയ്യാലി, അവരുടെ നന്മക്ക് എന്ന രീതിയിൽ പല തരത്തിലുള്ള പദ്ധതികൾ ആവിഷ്കരിക്കുകയും, അത് വഴി കർഷകരുടെ ഭൂമിയിലും സ്വത്തിലും ദൈനം ദിന ജീവിതത്തിൽ തന്നെയും ആധിപത്യം സ്ഥാപിക്കുകയും ചെയ്യുന്നു. പരിസ്ഥിതി വിരുദ്ധവും, ദൂര വ്യാപകമായ ദുഷ്ഫലങ്ങൾ ഉള്ളതുമായ കുയ്യാലിയുടെ പദ്ധതികൾക്കെതിരെ പ്രതികരിക്കാൻ രവി തയ്യാറാവുന്നു. തന്റെ മടിയും അപകർഷതയും വെടിഞ്ഞു സ്വന്തം ഭൂമിയിൽ പലതരം കൃഷികൾ തുടങ്ങുന്ന രവി, രാഷ്ട്രീയക്കാരുടെ ശത്രു ആവുന്നു. തന്റെ ഇലക്ഷൻ പ്രചരണം, തങ്ങൾ ആദ്യമായി ചെയ്ത സേവനമായ രവിയുടെ വീട്ടിൽ നിന്നാണ് അവസാനിപ്പിക്കുക എന്ന് കുയ്യാലി പ്രഖ്യാപിക്കുന്നതോടെ തുറന്ന പോരിനു വഴിയൊരുങ്ങുന്നു.