മധു അമ്പാട്ട്

പാലക്കാട്ട് ജില്ലയിലെ പ്രശസ്തമായ അമ്പാട്ട് കുടുംബത്തിലെ സുലോചനയുടെയും, പ്രശസ്ത മജീഷ്യനായിരുന്ന പ്രൊഫ. കെ.ഭാഗ്യനാഥിന്റേയും മകനായി 1949 മാര്‍ച്ച് 6ന് മധു അമ്പാട്ട് ജനിച്ചു. കേരളത്തിലെ ആദ്യത്തെ ജനകീയമന്ത്രിയായിരുന്ന അമ്പാട്ട് ശിവരാമ മേനോനാണ് മുത്തച്ഛൻ. മലയാളകവിതയെ സംസ്കൃതഭാഷയുടെ പിടിയിൽ നിന്നും വിമുക്തമാക്കിയ പച്ചമലയാളപ്രസ്ഥാനത്തിന്റെ നായകരിലൊരാളായിരുന്ന കവി കുണ്ടൂർ നാരായണമേനോന്റെ പ്രപൗത്രനുമാണ് മധു അമ്പാട്ട്.  ഒരു ഇംഗ്ലീഷ് പ്രഫസര്‍ ആയിരുന്ന അച്ഛൻ ഭാഗ്യനാഥ് ജോലി രാജിവച്ച് അറിയപ്പെടുന്ന മജീഷ്യനായി മാറിയിരുന്നു. മധു അമ്പാട്ട് ചിറ്റൂര്‍ ഗവണ്മെന്റ് സ്കൂളിലെ വിദ്യാഭ്യാസത്തിനു ശേഷം1970ല്‍ പാലക്കാട് വിക്ടോറിയ കോളേജില്‍ നിന്നും ഫിസിക്സില്‍ ബിരുദം നേടി. പിന്നിട് പൂനയിലെ ഫിലം ഇന്‍സ്റ്റിറ്റ്യൂട്ടില്‍ മൂന്നുവര്‍ഷത്തെ ഛായഗ്രാഹണപഠന കോഴ്സിനു ചേരുകയും തുടര്‍ച്ചയായി മൂന്നു വര്‍ഷവും സ്കോളര്‍ഷിപ്പിന് അര്‍ഹനാവുകയും, ഗോൾഡ് മെഡലുമായി ഛായാഗ്രഹണ കോഴ്സ് പൂർത്തിയാക്കുകയും ചെയ്തു. നല്ലൊരു ഫോട്ടോഗ്രാഫറും കൂടിയായിരുന്ന അച്ഛന്റെ പ്രോത്സാഹനമാണ് ഛായാഗ്രഹണം ഒരു തൊഴിലാക്കി മാറ്റാൻ മധു അമ്പാട്ടിനെ പ്രേരിപ്പിച്ചത്.

രാമു കാര്യാട്ടിന്റെ 'ഇൻഡസ്ട്രിയൽ എസ്റ്റേറ്റ്' എന്ന ഡോക്യുമെന്ററിക്ക് ഛായാഗ്രഹണം നിർവ്വഹിച്ച് കൊണ്ടാണ് പ്രൊഫഷണലായി തുടക്കമിടുന്നത്. തന്റെ കരിയറിന്റെ തുടക്കകാലത്ത് സുഹൃത്തും സഹപ്രവർത്തകനുമായ ഷാജി എൻ കരുണുമായിച്ചേർന്ന് അദ്ദേഹം മൂന്നു ചിത്രങ്ങളിൽ ഛായാഗ്രഹണം നിർവ്വഹിച്ചു.

ഏകദേശം 48 വർഷത്തെ സിനിമാ ജീവിതത്തിൽ  9 ഭാഷകളിലായി 250ലേറെ സിനിമകൾ പൂർത്തിയാക്കി, ഏറെ അവാർഡുകളും നേടി ഇന്ത്യയിലെ മികച്ച ഛായാഗ്രാഹകരിലൊരാളാവാൻ മധു അമ്പാട്ടിനു കഴിഞ്ഞു. മൂന്ന് പ്രാവശ്യം മികച്ച ഛായാഗ്രാഹകനുള്ള ദേശീയ അവാർഡും നാല് പ്രാവശ്യം കേരള സംസ്ഥാന സർക്കാരിന്റെ അവാർഡും കരസ്ഥമാക്കി. ഫീച്ചർ ഫിലിമുകൾക്ക് പുറമേ ഹ്രസ്വചിത്രങ്ങൾ, ഡോക്യുമെന്ററികൾ, സീരിയലുകൾ എന്നിവയൊക്കെ മധു അമ്പാട്ടിന്റെ ഛായാഗ്രഹണ കരിയറിൽ ഉൾപ്പെടുന്നു.

ഓപ്പോൾ, നമ്മവർ (തമിഴ്) എന്നീ സേതുമാധവൻ ചിത്രങ്ങൾ,   വൈശാലി, അമരം തുടങ്ങിയ ഭരതൻ ചിത്രങ്ങൾ, സ്വാതിതിരുനാൾ, മകരമഞ്ഞ് തുടങ്ങിയ ലെനിൻ രാജേന്ദ്രൻ ചിത്രങ്ങൾ, മണിരത്നത്തിനോടൊപ്പമുള്ള അഞ്ജലി, ശാരദാ രാമനാഥനു വേണ്ടി ചെയ്ത ശൃംഗാരം (തമിഴ്) , ഗിരീഷ് കാസറവള്ളി സംവിധാനം ചെയ്ത കന്നഡ ചിത്രമായ തബരാനെ കഥെ, പ്രേമാ കരന്തിന്റെ കന്നഡ ചിത്രമായ ഫണിയമ്മ, സലിം  അഹമ്മദിന്റെ ആദാമിന്റെ മകൻ അബു, പത്തേമാരി, പവിത്രന്റെ യാരോ ഒരാൾ, ഉപ്പ്, ജി വി അയ്യരുടെ സംസ്കൃതചിത്രമായ ആദി ശങ്കരാചാര്യ, രാജ്കുമാർ സന്തോഷിയുടെ ഹിന്ദി ചിത്രമായ ലജ്ജ എന്നിവ മധു അമ്പാട്ടിന്റെ ഏറ്റവും ശ്രദ്ധേയമായ വർക്കുകളിൽ ചിലതാണ്.

പ്രശസ്ത ഹോളിവുഡ് സംവിധായകൻ മനോജ് നൈറ്റ് ശ്യാമളൻ ആദ്യമായി സംവിധാനം ചെയ്ത Praying With Anger  എന്ന ചിത്രത്തിന്റെ ഛായാഗ്രാഹകൻ മധു അമ്പാട്ടായിരുന്നു. 1977ൽ പുറത്തിറങ്ങിയ സരിത എന്ന മലയാളചിത്രത്തിന്റെ നിർമാണപങ്കാളിയായിരുന്ന മധു അമ്പാട്ടുതന്നെയായിരുന്നു ആ ചിത്രത്തിന്റെ കഥാകൃത്തും.

2004ൽ പ്രശസ്ത ബോളിവുഡ് താരങ്ങളായ അതുൽ കുൽക്കർണി,  രതി അഗ്നിഹോത്രി, സൊനാലി കുൽക്കർണി, ഗുൽഷൻ ഗ്രോവർ എന്നിവർ അഭിനയിച്ച 1:1.6 An Ode to Lost Love എന്ന ഇംഗ്ലീഷ് ചിത്രത്തിലൂടെ മധു അമ്പാട്ട് ചലച്ചിത്ര സംവിധായകന്റെ അങ്കിയുമണിഞ്ഞു.

2013-ൽ നടന്ന ഇന്ത്യൻ സിനിമയുടെ നൂറാം വാർഷിക ആഘോഷങ്ങളിൽ "ലെജെന്റ്" എന്ന ബഹുമതി നൽകി ആദരിച്ച 41 പേരിൽ ഒരാൾ മധു അമ്പാട്ട് ആയിരുന്നു. 2020ലെ കേരള സംസ്ഥാന ചലച്ചിത്ര അവാർഡ് ജൂറി ചെയർമാൻ ആയിരുന്നു ഇദ്ദേഹം.

സിനിമയിൽ ഏറെ പ്രശസ്തിയാർജ്ജിച്ച നടി വിധുബാലയാണ് മധു അമ്പാട്ടിന്റെ സഹോദരി. അമൃത ടിവിയിലെ കഥയല്ലിത് ജീവിതമെന്ന പരമ്പരയിലൂടെ ടെലിവിഷൻ രംഗത്തും പ്രശസ്തയാണവർ.

മക്കളായ ദർശൻ, ഋത്വിൻ എന്നിവരും, ഭാര്യ ലതയുമടങ്ങുന്ന മധു അമ്പാട്ടിന്റെ കുടുംബം. ചെന്നെയിലാണ് സ്ഥിര താമസം.

നേട്ടങ്ങൾ:

ദേശീയ അവാർഡുകൾ-

1.1984 - മികച്ച ഛായാഗ്രാഹകൻ - ആദി ശങ്കരാചാര്യ (സംസ്കൃതം)

2. 2006 - മികച്ച ഛായാഗ്രാഹകൻ - ശൃംഗാരം (തമിഴ്)

3. 2010 - മികച്ച ഛായാഗ്രാഹകൻ - ആദാമിന്റെ മകൻ അബു (മലയാളം)

കേരള സംസ്ഥാന ചലച്ചിത്ര അവാർഡുകൾ-

1. 1978 - മികച്ച ഛായാഗ്രാഹകൻ - അശ്വത്ഥാമാവ്, സൂര്യന്റെ മരണം, യാരോ ഒരാൾ

2. 1987 - മികച്ച ഛായാഗ്രാഹകൻ - പുരുഷാർത്ഥം, സ്വാതിതിരുനാൾ

3.1990 - മികച്ച ഛായാഗ്രാഹകൻ - അമരം

4. 2020 - പ്രതേക ജൂറി അവാർഡ് - പനി, ആന്റ് ദ് ഓസ്കാർ ഗോസ് റ്റു