ഞാൻ പ്രകാശൻ

അധ്വാനിക്കാതെ എങ്ങനെ പണമുണ്ടാക്കാമെന്നും സുഖലോലുപനായി ജീവിക്കാമെന്നും ആലോചിച്ചു നടന്നിരുന്ന യുവാവാണ് പ്രകാശൻ.നഴ്സിംഗ് പഠിച്ചുവെങ്കിലും അത് പെണ്ണുങ്ങളുടെ പണിയാണെന്നും നാട്ടിൽ നഴ്സ് ആയി ജോലി ചെയ്യുന്നതിൽ കാര്യമില്ലെന്നും വിശ്വസിച്ച പ്രകാശൻ പണമുണ്ടാക്കാനായുള്ള കുറുക്കു വഴികൾ തേടിക്കൊണ്ടേയിരുന്നു.

പണക്കാരിയല്ലാത്തത് കൊണ്ട് താൻ പണ്ടുപേക്ഷിച്ച കാമുകി സലോമിക്ക് ജർമ്മനിയിൽ ഉയർന്ന ശമ്പളത്തിൽ നഴ്സിംഗ് ജോലി തരപ്പെട്ടു എന്നറിഞ്ഞപ്പോൾ അവളെ വിവാഹം ചെയ്ത് ജർമ്മനിക്ക് പോകാൻ പ്രകാശൻ പദ്ധതിയിടുന്നു. ജർമനിയിൽ എത്തിയ ശേഷം അവളെ ഉപേക്ഷിക്കാമെന്ന ഉദ്ദേശത്തോടെ പ്രണയം നടിച്ചു സലോമിയുടെ കൂടെ കൂടുകയും അവളുടെ വിസയ്ക്കുള്ള പണം തരപ്പെടുത്തിക്കൊടുക്കുകയും ചെയ്യുന്നു. എന്നാൽ സലോമി നാടകീയമായി ജർമ്മനിയിലേക്ക് കടന്ന് ഒരു ജര്മൻകാരനെ വിവാഹം ചെയ്യുന്നു.

പറ്റിക്കപ്പെട്ടുവെന്നറിഞ്ഞ പ്രകാശൻ ബാധ്യതകൾ തീർക്കാനായി ഒരു ഹോം നഴ്‌സ്‌ ആയി ജോലി ചെയ്യാൻ നിർബന്ധിതനാവുന്നു. ടീന എന്ന അർബുദ ബാധിതയായ, വികൃതിയായ സ്കൂൾ കുട്ടിയെ പരിചരിക്കുക ഒട്ടും എളുപ്പമല്ലായിരുന്നില്ല പ്രകാശന്. പരീക്ഷണങ്ങളുടെ ആദ്യ നാളുകൾക്ക് ശേഷം കുട്ടിയുമായി അടുത്തിടപഴകാൻ തുടങ്ങിയ പ്രകാശൻ അവളെ സന്തോഷിപ്പിക്കാനുള്ള ശ്രമങ്ങൾ നടത്തുന്നു. ഒരു ദിവസം അവൾക്ക് കഥ പറഞ്ഞു കൊടുക്കുന്നതിനിടയിൽ കുട്ടി അപ്രതീക്ഷിതമായി മരണപ്പെട്ടത് പ്രകാശനിൽ വലിയ ആഘാതമുണ്ടാക്കി.