മുകുന്ദൻ ഉണ്ണി അസ്സോസ്സിയേറ്റ്സ്

 ഏറെ നാൾ ജൂനിയർ വക്കീലായിരുന്നിട്ടും ജീവിതത്തിൽ ഒന്നുമാകാൻ സാധിക്കാത്ത മുകുന്ദനുണ്ണി (വിനീത് ) സീനിയറിന്റെ ഓഫീസും തന്റെ കാമുകിയെയും ഉപേക്ഷിച്ച് സ്വന്തമായി പ്രാക്ടീസ് ആരംഭിക്കുന്നു.  എന്നാൽ കുറച്ചു നാൾ കൊണ്ട് തന്നെ, വാദിക്കാനുള്ള കേസുകൾ കണ്ടെത്തുക അത്ര എളുപ്പമല്ലന്ന് അയാൾ മനസ്സിലാക്കുന്നു. യാദൃശ്ചികമായി അമ്മയുടെ ചികിത്സക്കായി നഗരപ്രാന്തത്തിലുള്ള ഒരു ആശുപത്രിയിൽ എത്തുന്ന അയാൾക്ക് നഗരത്തിലെ മോട്ടോർ വാഹന അപകട കേസുകളുടെ നല്ലൊരു പങ്കും ആ ആശുപത്രി വഴിയാണ് വരുന്നതെന്ന് മനസ്സിലാവുന്നു.  അവിടത്തെ ജോലിക്കാരായ അറ്റൻഡർ സലീം (അൽത്താഫ് ) അക്കൗണ്ടിംഗ് സ്റ്റാഫ് മീനാക്ഷി (ആർഷ ബൈജു) എന്നിവരെ പാട്ടിലാക്കി കേസുകളുടെ വഴി മനസ്സിലാക്കുന്ന മുകുന്ദനുണ്ണി, ഇപ്രകാരം വരുന്ന കേസുകളിൽ ഏറിയ പങ്കും വേണു വക്കീലിന്റെ (സുരാജ്) കുത്തകയാണന്ന് തിരിച്ചറിയുന്നു. അവയിൽ ചിലത് കൈക്കലാക്കാൻ അയാൾ ശ്രമം നടത്തുന്നുവെങ്കിലും വിജയിക്കുന്നില്ല. പോലീസിന്റെയും ഇൻഷൂറൻസ് കമ്പനിയുടെയും പിന്തുണ വേണു വക്കീലിനാണ്. എന്നിരുന്നാലും തന്റെ സഹചാരിയായ വക്കീൽ റോബിന്റെയും (സുധി കോപ്പ ) അറ്റൻഡർ സലീമിന്റെയും സഹായം കിട്ടുന്നതോടെ തന്ത്രങ്ങൾ മെനഞ്ഞ് കുറേയേറെ കേസുകൾ മുകുന്ദനുണ്ണി കൈക്കലാക്കുന്നു. ഇതു കണ്ട വേണു വക്കീൽ അയാളുമായി സൗഹൃദം സ്ഥാപിക്കാൻ ശ്രമിക്കുന്നെങ്കിലും മുകുന്ദനുണ്ണി അതിനോട് താൽപര്യം കാണിക്കുന്നില്ല. സ്ഥലത്തെ പ്രമുഖ രാഷ്ട്രീയ നേതാവിന്റെ (സുധീഷ്) ഉടമസ്ഥതയിലുള്ള ഈ ആശുപത്രിയുടെ സുരക്ഷാ ക്രമീകരണങ്ങളുടെ ചുമതല കൈക്കലാക്കുക വഴി കൂടുതൽ കേസുകൾ  വേണു വക്കീലിലേക്ക്  എത്തിച്ചേരുന്നത് മുകുന്ദനുണ്ണിയെ പ്രകോപിതനാക്കുന്നു.  വേണുവിനെ ഏതുവിധേനയും ഒഴിവാക്കാൻ അയാൾ തീരുമാനിക്കുന്നു.