ധനം

വീടും പറമ്പും പണയപ്പെടുത്തിയും അല്ലാതെയും അച്ഛൻ വാങ്ങിയ  വീട്ടാക്കടങ്ങൾ കാരണം ബുദ്ധിമുട്ടിലായ ശിവശങ്കരൻ കടക്കാരുടെ കണ്ണിൽപെടാതെ മുങ്ങി നടക്കേണ്ട അവസ്ഥയിലാണ്. വിവാഹം കഴിഞ്ഞു  താമസം മാറിയ ചേട്ടൻ ബാലൻ വീട്ടിലെ കാര്യങ്ങളൊന്നും നോക്കാറില്ല. കടങ്ങളെല്ലാം വീട്ടണമെന്നതും നല്ലൊരു വീടുണ്ടാക്കണമെന്നതും ശിവശങ്കരൻ്റെ വളരെക്കാലമായുള്ള ആഗ്രഹമാണ്. പല ജോലികളും മാറി മാറി നോക്കി ഇപ്പോൾ മെഡിക്കൽ റെപ്രസൻ്റേറ്റീവ് ആയി പണിയെടുക്കുകയാണയാൾ. എങ്ങനെയും പണമുണ്ടാക്കണം എന്ന ചിന്തയാണ് ശിവശങ്കരന്.  അയാളുടെ ഉറ്റ ചങ്ങാതിയും ടാക്സി ഡ്രൈവറുമായ അബുവിനോട് അയാൾ എപ്പോഴും അതു പറയാറുമുണ്ട്.

രാത്രിയിൽ ഒരു ശവം വടകരയിലേക്ക്  കൊണ്ടുപോകാൻ അബു ശിവശങ്കരനെ കൂട്ടിനുവിളിക്കുന്നു. വടകരയിൽ നിന്നു തിരികെ വരുന്ന വഴി കാർ കേടായതിനാൽ രണ്ടുപേരും  വഴിയിൽ  രാത്രി കഴിച്ചുകൂട്ടുന്നു. അതിനിടയിൽ  തൊട്ടടുത്ത കടൽപാലത്തിനടുത്ത് ചിലരെ അവർ  കാണുന്നു. ബോംബെയിൽ നിന്ന് അടുത്ത ദിവസം എത്തുന്ന  കള്ളക്കടത്ത് സ്വർണത്തെക്കുറിച്ചുള്ള വിവരം കൈമാറാൻ വന്നവരായിരുന്നു അത്. അവരുടെ സംഭാഷണം ശിവശങ്കരനും അബുവും കേൾക്കുന്നു.

കസ്റ്റംസിനെ അറിയിച്ചാൽ പിടിക്കുന്ന സ്വർണത്തിൻ്റെ  വിലയുടെ 20 ശതമാനം പാരിതോഷികമായി കിട്ടുമെന്ന് ശിവശങ്കരൻ പറയുന്നു. വളരെ ആലോചിച്ച ശേഷം അവർ കസ്റ്റംസിൽ വിവരമറിയിക്കുന്നു. തുടർന്ന് കസ്റ്റംസ് ഒരു കോടിയുടെ സ്വർണവേട്ട നടത്തുന്നു. 

ട്രഷറിയിൽ നിന്ന് പാരിതോഷികമായ 20 ലക്ഷം രൂപയും വാങ്ങി പുറത്തിറങ്ങുന്ന ശിവശങ്കരനെയും അബുവിനെയും ആരോ  കാറിടിച്ചുകൊല്ലാൻ ശ്രമിക്കുന്നു. രക്ഷപ്പെട്ട അവർ,  പണം പിറ്റേന്ന് ബാങ്കിൽ അക്കൗണ്ട് തുടങ്ങി നിക്ഷേപിച്ചിട്ടു പോകാം എന്നു തീരുമാനിക്കുന്നു. അതനുസരിച്ച് ശിവശങ്കരനെ ഒരു ഹോട്ടലിലാക്കി അബു വീട്ടിലേക്ക് പോകുന്നു.

ഇതിനിടയിൽ, കസ്റ്റംസിലെ ഒറ്റുകാർ വഴി ശിവശങ്കരനെ തിരിച്ചറിഞ്ഞ കള്ളക്കടത്തുകാർ അയാളെ കണ്ടെത്താനുള്ള ശ്രമത്തിലാണ്. അവരുടെ നേതാവായ സ്റ്റീഫൻ സേവ്യറുടെ ഹോട്ടലിലാണ് ശിവശങ്കരൻ താമസിക്കുന്നത്. യാദൃച്ഛികമായി സേവ്യർ ശിവശങ്കരനെക്കാണുന്നു. തുടർന്ന്, അയാളുടെ ഗുണ്ടകൾ ശിവശങ്കരനെത്തേടി ഹോട്ടലിലെത്തുന്നു. അവിടെ നിന്നു രക്ഷപ്പെടുന്ന ശിവശങ്കരൻ പിന്തുടർന്നെത്തുന്ന സേവ്യറുടെ വെടിയേറ്റ് കടലിൽ വീഴുന്നു.

ക്ഷയിച്ചു പോയ മഠത്തിൽ വാര്യത്തെ പെൺകുട്ടിയാണ് തങ്കം. അവളുടെ ചേച്ചി ലക്ഷ്മിയുടെ ഭർത്താവും പോലീസുകാരനുമായ രാജപ്പൻ വിടനും  താന്തോന്നിയുമാണ്. തങ്കത്തെയും ഭാര്യയാക്കാനാണ് അയാളുടെ ശ്രമം. അമ്പലത്തിലെ പൂ കെട്ടലും കഴകവുമാണ് വാര്യരുടെയും മക്കളുടെയും ഏക വരുമാനം. 

ഒരു ദിവസം ഡ്യൂട്ടി കഴിഞ്ഞുവീട്ടിലെത്തുന്ന രാജപ്പൻ തങ്കത്തെ കയറിപ്പിടിക്കുന്നു.  ഒളിക്കാൻ അവൾ തട്ടിൻ പുറത്തേക്ക് കയറുന്നു. പെട്ടെന്നാരോ അവളുടെ വാ പൊത്തുന്നു. ശിവശങ്കരനായിരുന്നു അത്. വെടികൊണ്ട മുറിവിലെ വേദന കാരണം അയാൾ വീണുപോകുന്നു. താൻ കള്ളനല്ലെന്നും രക്ഷപ്പെടാൻ അവിടെക്കയറി ഒളിച്ചതാണെന്നും അയാൾ പറയുന്നു. അയാളോട് അലിവ് തോന്നിയ തങ്കം വീട്ടിലാരോടും പറയുന്നില്ല. അവളയാൾക്ക് ഭക്ഷണവും വെള്ളവും കൊടുക്കുന്നു. പിന്നെ മുറിവിലെ വെടിയുണ്ട നീക്കാനും സഹായിക്കുന്നു.

ലക്ഷക്കണക്കിനു പണം കൈയിലുണ്ടായിട്ടും മൂന്നു ദിവസമായി ഒരിറ്റു വെള്ളവും ആഹാരവുമില്ലാതെ കഴിയേണ്ടി വന്ന ശിവശങ്കരൻ ജീവിതമെന്നാൽ പണമല്ലെന്ന് തിരിച്ചറിയുന്നു. ക്രമേണ അയാളുടെ മുറിവ് കരിയുന്നു. പക്ഷേ അബുവിനെക്കുറിച്ചും തൻ്റെ കുടുംബത്തെക്കുറിച്ചുമുള്ള ആശങ്ക അയാളെ നീറ്റുന്നു. ഇതിനിടയിൽ രാജപ്പൻ വാര്യത്തുണ്ടാക്കുന്ന പ്രശ്നങ്ങളും അയാളെ നേരിടാൻ കഴിയാതെ  നില്ക്കുന്ന വാര്യരുടെയും മക്കളുടെയുടെയും നിസ്സഹായതയും അയാൾ കാണുന്നു.

ശിവശങ്കരനെത്തിരക്കി അയാളുടെ വീട്ടിലെത്തുന്ന സേവ്യർ ബാലനെ ഭീഷണിപ്പെടുത്തുന്നു. ശിവശങ്കരൻ എവിടുണ്ടെന്ന് തനിക്കറിയില്ലെന്നും അബുവിന് അറിയാമായിരിക്കുമെന്നും അയാൾ പറയുന്നു. അബുവിനെ പിടികൂടി ചോദിച്ചെങ്കിലും ഫലമുണ്ടാകുന്നില്ല.  സേവ്യർ  അയാളെ വെറുതെ വിടുന്നു. അയാളുടെ നീക്കങ്ങൾ പിന്തുടർന്ന് ശിവശങ്കരനെ കണ്ടെത്തുകയാണ് സേവ്യറുടെ ഉദ്ദേശ്യം.

തങ്കത്തിൻ്റെ കൈയിൽ ശിവശങ്കരൻ കൊടുത്തു വിട്ട കത്തു കിട്ടിയ അബു അയാളെക്കാണാൻ രാത്രിയിൽ വാര്യത്തെ കുളിക്കടവിലെത്തുന്നു. ശിവശങ്കരൻ പണം അബുവിന്റെ കൈയിൽ കൊടുക്കുമ്പോൾ അബു അതു നിരസിക്കുന്നു. അയാൾക്ക്  നാടു വിടാനുള്ള ട്രെയിൻ ടിക്കറ്റുമായി പിറ്റേന്ന് രാത്രി വരാം എന്നു പറഞ്ഞ് അബു പോകുന്നു.

വാര്യം വിട്ടു പോകാനൊരുങ്ങുകയാണ് ശിവശങ്കരൻ. അമ്പലത്തിലെ ദീപാരധനക്കിടയിൽ  അച്ഛനും ചേച്ചിയും കാണാതെ തങ്കം അയാളുടെ അടുത്തെത്തുന്നു. അയാൾ പോകുന്നതിൽ ദുഃഖിതയാണവൾ.  തന്നെക്കൂടി ഈ നരകത്തിൽ നിന്നു രക്ഷിക്കാമോ എന്ന ചോദ്യത്തിനു മുന്നിൽ, ഇറങ്ങുന്നത് ജീവിതത്തിലേക്കോ മരണത്തിലേക്കോ എന്നറിയാത്ത  അയാളുടെ നെഞ്ച് നീറിപ്പൊള്ളുന്നു.

ആരോ  വന്നതറിഞ്ഞ് തങ്കം താഴെക്കു പോകുന്നു. രാജപ്പനായിരുന്നു അത്. അയാൾ തങ്കത്തെ കീഴ്പ്പെടുത്താൻ നോക്കുന്നു. താഴെയെത്തുന്ന ശിവശങ്കരൻ അവളെ രക്ഷിക്കുന്നു. ഇതിനിടയിൽ വീട്ടിലെത്തുന്ന വാര്യരോട് അയാൾ കാര്യങ്ങൾ പറയുന്നു. പിന്നെ താൻ തങ്കത്തിനെക്കൊണ്ടുപോകാൻ തിരികെ വരുമെന്നു പറഞ്ഞ് അയാൾ റെയിൽവേ സ്റ്റേഷനിലേക്ക് പുറപ്പെടുന്നു.