പാർവതി തിരുവോത്ത്

Parvathi Thiruvoth
പാർവ്വതി
പാർവ്വതി ടി കെ
പാർവതി തിരുവോത്ത് കോട്ടുവട്ട

1988 ഏപ്രിലിൽ കോഴിക്കോട് ജനിച്ചു. അഭിഭാഷകരായ പി വിനോദ്കുമാറും ടി കെ ഉഷാകുമാരിയുമാണ്‌ മാതാപിതാക്കൾ. പാർവതിയുടെ സ്കൂൾ കാലത്ത് കുടുംബം തിരുവനന്തപുരത്തേയ്ക്ക് താമസം മാറ്റിയതിനാൽ പഠനം തിരുവനന്തപുരം പാങ്ങോട് കേന്ദ്രീയ വിദ്യാലയത്തിലായിരുന്നു. All Saints College-ൽ നിന്നും ഇംഗ്ലീഷ് സാഹിത്യത്തിൽ ബിരുദം നേടിയ പാർവതി വിദൂരവിദ്യാഭ്യാസം വഴി എം എ കഴിഞ്ഞു. നല്ലൊരു ഭരതനാട്യം നർത്തകികൂടിയായ പാർവതി ടെലിവിഷൻ അവതാരികയായിട്ടായിരുന്നു തന്റെ കരിയറിനു തുടക്കമിടുന്നത്. കിരൺ ടിവി അവതാരികയായിരിയ്ക്കുമ്പോളാണ്  സിനിമയിലേയ്ക്കുള്ള അവസരം ലഭിച്ചത്. 2006-ൽ ഔട്ട് ഓഫ് സിലബസ് എന്ന സിനിമയിലഭിനയിച്ചുകൊണ്ടാണ് പാർവതി തിരുവോത്ത് സിനിമാലോകത്തേയ്ക്ക് പ്രവേശിച്ചു. ആ വർഷം തന്നെ റോഷൻ ആൻഡ്രൂസിന്റെ നോട്ട്ബുക്ക്  എന്ന സിനിമയിലെ മൂന്നു നായികമാരിൽ ഒരാളായി. പിന്നീട് 2007-ൽ സത്യൻ അന്തിക്കാടിന്റെ വിനോദയാത്ര യിൽ ഒരു വേഷം ചെയ്തു.

 പാർവതി ആദ്യമായി പ്രധാന നായികവേഷം ചെയ്യുന്നത് 2007- ൽ ഇറങ്ങിയ കന്നഡ ചിത്രമായ "Milana" യിലാണ്. പുനീത് രാജ്കുമാർ നായകനായ ചിത്രം വലിയ സാമ്പത്തികവിജയം നേടിയിരുന്നു. ആ സിനിമയിലെ പാർവതിയുടെ അഭിനയം കന്നഡ പ്രേക്ഷകരുടെ പ്രശംസനേടി. തുടർന്ന് ആ വർഷം തന്നെ സിബിമലയിൽ - മോഹൻലാൽ ചിത്രമായ ഫ്ലാഷ്- ൽ നായികയായി. 2008- ൽ പൂ എന്ന തമിഴ് സിനിമയിൽ നായികയായി അഭിനയിച്ചു. ശ്രീകാന്തായിരുന്നു നായകൻ. മാരി എന്ന തമിഴ് പെൺകുട്ടിയെയാണ് പാർവതി അവതരിപ്പിച്ചത്. പാർവതിയുടെ അഭിനയം നിരൂപക പ്രശംസ നേടുകയും ആ വർഷത്തെ മികച്ച തമിഴ് നടിയ്ക്കുള്ള ഫിലിംഫെയർ അവാർഡ് കരസ്ഥമാക്കുകയും ചെയ്തു. മികച്ച പുതുമുഖ നടിയ്ക്കുള്ള വിജയ് ടിവി അവാർഡും മാരി പാർവതിയ്ക്കു നേടിക്കൊടുത്തു. 2009-ൽ "Male Barali Manju Irali"എന്ന കന്നഡ സിനിമയിൽ നായികയായി. ആ സിനിമയിൽ പാർവതി സ്വന്തം ശബ്ദത്തിൽ ഡബ്ബു ചെയ്തു. ഈ സിനിമയിലെ  അഭിനയവും കന്നഡ സിനിമാലോകത്തിന്റെ പ്രശംസ പിടിച്ചുപറ്റി. 2011-ലാണ് പാർവതി പിന്നീട് മലയാള സിനിമയിലഭിനയിയ്ക്കുന്നത്. ലിജൊ ജോസ് പെല്ലിശ്ശേരിയുടെ സിറ്റി ഓഫ് ഗോഡ്  എന്ന സിനിമയിലായിരുന്നു അഭിനയിച്ചത്. സിനിമ സാമ്പത്തിക വിജയം നേടിയില്ലെങ്കിലും തമിഴ് അഭയാർത്ഥിയായ പാർവതിയുടെ അഭിനയം ശ്രദ്ധിയ്ക്കപ്പെട്ടു. 2013- ൽ "Maryan"എന്ന തമിഴ് ചിത്രത്തിൽ ധനുഷിന്റെ നായികയായി അഭിനയിച്ചു. അഞ്ജലിമേനോൻ സംവിധാനം ചെയ്ത് 2014- ൽ റിലീസായ ബാംഗ്ളൂർ ഡെയ്സ്  എന്ന സിനിമയിലെ കഥാപാത്രമാണ് പാർവതിയെ മലയാളത്തിൽ ശ്രദ്ധേയയാക്കിയത്. കാലുകൾ തളർന്ന് വീൽചെയറിൽ ഇരിക്കുന്ന സാറ എന്ന കഥാപാത്രമായി മികച്ചപ്രകടനം കാഴ്ച്ചവെച്ചു. ആ വർഷത്തെ മികച്ച സപ്പോർട്ടിംഗ് ആക്ട്രസിനുള്ള ഫിലിം ഫെയർ അവാർഡ് സാറയിലൂടെ പാർവതിയ്ക്ക് ലഭിച്ചു.

 2015-ൽ ഇറങ്ങിയ എന്ന് നിന്റെ മൊയ്തീൻ എന്ന സിനിമയിൽ പൃഥ്വിരാജിന്റെ നായികയായി അഭിനയിച്ചു. മൊയ്തീനിന്റെയും കാഞ്ചനമാലയുടെയും പ്രണയകഥ പറഞ്ഞ സിനിമയിൽ കാഞ്ചനമാലയായുള്ള പാർവതിയുടെ അഭിനയം പ്രേക്ഷക പ്രീതിയും നിരൂപക പ്രശംസയും നേടി. ആ വർഷം തന്നെ ദുൽഖർ സൽമാന്റെ നായികയായി അഭിനയിച്ച ചാർളിയും  പാർവതിയ്ക്ക് പ്രേക്ഷക പ്രീതിനേടിക്കൊടുത്തു. 2015-ലെ മികച്ച നടിക്കുള്ള സംസ്ഥാന ചലച്ചിത്ര പുരസ്ക്കാരം ഈ രണ്ടു സിനിമകളിലെ അഭിനയത്തിലൂടെ പാർവതി നേടിയെടുത്തു. 2017--ൽ ഇറങ്ങിയ ടേക്ക് ഓഫ്  എന്ന സിനിമയിലെ അഭിനയം പാർവതിയ്ക്ക് IFFI Best Actor Award (Female) നേടിക്കൊടുത്തു. വലിയ വിജയമായിത്തീർന്ന ടേക്ക് ഓഫ് ഇന്ത്യൻ ഇന്റർനാഷണൽ ഫിലിം ഫെസ്റ്റിവെലിൽ പ്രദർശിപ്പിച്ചിരുന്നു. ടേക്ക് ഓഫിലെ അഭിനയത്തിന് ദേശീയ ചലച്ചിത്രപുരസ്ക്കാരത്തിന് പാർവതിയുടെ പേര് നിർദ്ദേശിയ്ക്കപ്പെട്ടിരുന്നു. പാർവതി തിരുവോത്ത് 2018-ൽ മൈ സ്റ്റോറികൂടെ എന്നീ രണ്ടു ചിത്രങ്ങളിലാണ് മലയാളത്തിൽ അഭിനയിച്ചത്. 2019- ൽ  ഉയരെവൈറസ്  എന്നീ സിനിമകളിൽ അഭിനയിച്ചു. ഉയരെയിൽ ആസിഡ് ആക്രമണത്തിന് വിധേയയായ എയർ ഹോസ്റ്റ്സായി പാർവതിയുടെ അഭിനയം പ്രേക്ഷക പ്രശംസയ്ക്കും നിരൂപക പ്രശംസയ്ക്കും ഒരുപോലെ അർഹമായി. 2017-ൽ "Qarib Qarib Singlle"എന്ന ഹിന്ദി ചിത്രത്തിൽ ഇർഫാൻ ഖാന്റെ നായികയായി അഭിനയിച്ചു. സിനിമയ്ക്കുപുറത്തുള്ള ഇടപെടലുകൾ കൊണ്ട് ശ്രദ്ധേയയാണ് പാർവതി. സിനിമയിലെ വനിത കൂട്ടായ്മ ഡബ്ല്യുസിസിയുടെ സ്ഥാപക അംഗങ്ങളിൽ ഒരാളാണ്. സിനിമാമേഖലയിൽ സ്ത്രീകൾ നേരിടുന്ന ചൂഷണങ്ങളെ പ്രതിരോധിക്കുകയാണ് ഡബ്ല്യുസിസിയുടെ ഉദ്ധേശ്യം.