പൂക്കാലം വരവായി

അഞ്ച് വയസ്സുകാരിയായ ഗീതുവിന്റെ മാതാപിതാക്കൾ വിവാഹമോചിതരായതിനാൽ രണ്ടു കൂട്ടരുടെയും വീടുകളിൽ മാറി മാറിയാണ് ഗീതു താമസിച്ചിരുന്നത്. രണ്ടു കുടുംബങ്ങൾക്കും പരസ്പരം ഇഷ്ടക്കേടുള്ളതിനാലും രണ്ടിടത്തേയും പരിചാരകരുടെയും ബന്ധുക്കളുടെയും ഇടയിൽ ആ കൊച്ചു കുട്ടി വീർപ്പുമുട്ടി. ഗീതുവിന്റെ സ്കൂൾ ബസിന്റെ ഡ്രൈവറായിരുന്ന നന്ദനുമായാണ് ഗീതുവിന് അടുപ്പമുണ്ടായിരുന്നത്. നന്ദൻ ആ കുഞ്ഞിനെ കേൾക്കുകയും സ്നേഹിക്കുകയും കൂട്ടുകൂടുകയും ചെയ്തു. സ്കൂൾ അവധി തുടങ്ങാറായപ്പോൾ സ്വന്തം വീട്ടിലേക്ക് പോകാതെ നന്ദന്റെ കൂടെ പോകാനായി ഗീതു വാശി പിടിച്ചു. ഗീതുവിനെ തന്റെ ഗ്രാമത്തിലേക്ക് കൊണ്ടു പോകാൻ നന്ദൻ നിർബന്ധിതനായി. അതേ സമയം കാണാതായ മകൾക്ക് വേണ്ടി അവളുടെ അച്ഛനും അമ്മയും അന്വേഷണം തുടങ്ങി.

നന്ദന്റെ വീട്ടുകാരിൽ നിന്നും മറ്റൊരിടത്തു നിന്നുമുണ്ടായിട്ടില്ലാത്ത സ്നേഹവും പരിചരണവും ഗീതുവിന് ലഭിച്ചു. നന്ദന്റെ ചേച്ചിയുടെ മരിച്ചു പോയ മകളുടെ സ്ഥാനത്ത് അവർ ഗീതുവിനെ കാണുകയും അമ്മയുടെ വാത്സല്യം നൽകുകയും ചെയ്തു. നന്ദന്റെ വീട്ടുകാരും നാട്ടുകാരുമൊക്കെ ഗീതുവുമായി അടുത്തു. അവസാനം മകളെത്തേടി അവളുടെ അച്ഛനും അമ്മയും അവിടെയെത്തി.