101 വെഡ്ഡിംഗ്സ്

തികഞ്ഞ ഗാന്ധിയനായ മുൻഷി കൃഷ്ണപിള്ളയുടെ മദ്യവിരുദ്ധപ്രവർത്തനങ്ങൾ മൂലം നാട്ടിലെ മദ്യഷാപ്പുകൾ അടച്ചു പൂട്ടുകയും വാറ്റു കേന്ദ്രങ്ങൾ തകർക്കപ്പെടുകയും മദ്യപന്മാർക്ക് കൃഷ്ണപിള്ള ഒരു ശത്രുവായിത്തീരുകയും ചെയ്തു. എന്നാൽ കൃഷ്ണപിള്ളയുടെ ഈ ഗാന്ധിയൻ രീതികൾ കൊണ്ട് കഷ്ടപ്പാട് അനുഭവിക്കുന്നത് അയാളുടെ മകൻ കൃഷ്ണകുട്ടിയാണ്. സ്ക്കൂൾ വിദ്യാർത്ഥിയായ കൃഷ്ണൻ കുട്ടിയുടെ സ്ക്കൂളിലെ മുതിർന്ന ക്ലാസ്സിലെ വികൃതിയായ പയ്യനാണ് ആന്റപ്പൻ. ആന്റപ്പന്റെ അപ്പന്റെ ഷാപ്പ് പൂട്ടിക്കാനാണ് കൃഷ്ണപിള്ള നിരാഹാരം കിടക്കുന്നത്. ആന്റപ്പന്റെ അപ്പനെ പോലീസു പിടിച്ചതിലും മർദ്ധിച്ചതിലും ആന്റപ്പൻ പകരം തീർക്കുന്നത് കൃഷ്ണകുട്ടിയെ മർദ്ധിച്ചുകൊണ്ടാണ്. ആന്റപ്പന്റെ മർദ്ധനമേൽക്കാനായിരുന്നു കൃഷ്ണൻ കുട്ടീയുടെ വിധി. എന്നാൽ തന്നേക്കാൾ ശരീരമുള്ള ആന്റപ്പനെ എതിർക്കാൻ കഴിയാതിരുന്ന കൃഷ്ണൻ കുട്ടി പള്ളിയിലെ ഒരു അമ്പ് പെരുന്നാൾ ദിവസം പ്രദക്ഷിണത്തിനു കൊണ്ട്പോകുന്ന സ്വർണ്ണത്തിന്റെ അമ്പ് ആന്റപ്പന്റെ ബാഗിൽ ഒളിപ്പിച്ചുവെക്കുന്നു. പള്ളിയിലെ അമ്പ് മോഷണത്തിനു ആന്റപ്പൻ ജയിലിലാകുന്നു. കൃഷ്ണപിള്ളയും കുടൂംബവും ഗുജറാത്തിലേക്ക് ട്രാൻസ്ഫർ ആയി പോകുന്നു.
കാലമേറേ കഴിഞ്ഞ് കൃഷ്ണപിള്ളയും കുടുംബവും നാട്ടിൽ തിരിച്ചെത്തുന്നു. കൃഷ്ണപിള്ള തന്റെ നിരാഹാര സത്യാഗ്രഹ പരിപാടികൾ തുടരുന്നു. കൃഷ്ണൻ ക്കുട്ടി (കുഞ്ചാക്കോ ബോബൻ) എന്നാൽ, ഈ കാലഘട്ടത്തിലെ യുവത്വത്തിന്റെ പ്രതിനിധിയെന്നോണം അച്ഛന്റെ രീതികളെ പാടെ തള്ളിക്കളഞ്ഞ ആർഭാടമായി ജീവിക്കാൻ ആഗ്രഹിക്കുന്ന ചെറുപ്പക്കാരനാണ്. സുഹൃത്ത് റിക്കി(വിജീഷ്)യുമൊത്ത് പല തരികിട പരിപാടികളും നടത്തുന്നു. ഇതിനിടയിൽ സ്ഥലത്തെ പ്രമുഖ അബ്കാരിയായ വെട്ടിച്ചിറ ഭാസി (സുനിൽ സുഖദ)യുടെ സ്പിരിറ്റ് കടത്തലുകളും പല അവിഹിതമായ ഇടപാടുകളും അയാളുടെ മകൾ അഭിരാമി മുൻഷി കൃഷ്ണപിള്ളക്ക് ചോർത്തിക്കൊടുക്കുന്നു. അബ്കാരിയുടേ മകളാണെങ്കിലും അഭിരാമി ഗാന്ധിസത്തിൽ വിശ്വസിക്കുന്നവളും സാമൂഹ്യപ്രവർത്തകയുമാണ്. അവരുടേ നേതൃത്വത്തിൽ കസ്തൂർബാ ആശ്രമം സേവന പ്രവർത്തനങ്ങൾ നടത്തുന്നുണ്ട്. എന്നാൽ കൃഷ്ണപിള്ളക്ക് കിട്ടുന്ന ഈ വാർത്തകൾ കൃഷ്ണൻ കുട്ടി മനസ്സിലാക്കുകയും അത് വെട്ടിച്ചിറ ഭാസിയെ അറിയിക്കുകയും അയാളിൽ നിന്ന് പണം പാരിതോഷികമായി കൈപ്പറ്റുകയും ചെയ്യുന്നു.

101 പേർക്ക് സമൂഹവിവാഹം നടത്താൻ കസ്തൂർബാ ആശ്രമം തീരുമാനിക്കുകയും അതിന്റെ നടത്തിപ്പ് അഭിരാമി ഏൽക്കുകയും അതോടൊപ്പം താനും ആ വിവാഹത്തിൽ പങ്കെടുക്കുകയും ചെയ്യുമെന്ന് അഭിരാമി പ്രഖ്യാപിക്കുന്നു. അഭിരാമിയെ കണ്ട് ഇഷ്ടപ്പെട്ട മുൻഷി കൃഷ്ണപിള്ളയും കുടൂംബവും മകൻ കൃഷ്ണൻ കുട്ടീക്ക് വേണ്ടീ അഭിരാമിയെ ആഗ്രഹിക്കുന്നു. സമൂഹവിവാഹത്തിൽ തന്റെ മകനെ വിവാഹം ചെയ്യണമെന്ന് അഭിരാമിയോട് അഭ്യർത്ഥിക്കുന്നു. എന്നാൽ ഒരു സാമൂഹ്യപ്രവർത്തകയെ വേണ്ടെന്ന് കൃഷ്ണൻ കുട്ടി വാശിപിടിക്കുന്നു. എന്നാൽ ഈ ആവശ്യം നടപ്പാക്കാൻ കൃഷ്ണപിള്ള നിരാഹാരം കിടക്കുന്നു. ഒടുവിൽ ഗത്യന്തരമില്ലാതെ കൃഷ്ണൻ കുട്ടീ സമ്മതിക്കുന്നു. അതിനു വേണ്ടി കസ്ത്രൂബാ ആശ്രമത്തിലേക്ക് സുഹൃത്ത് റിക്കിക്കൊപ്പം പോകുന്നു. ഈ വിവാഹത്തിൽ നിന്ന് പിന്മാറാൻ വേണ്ടി കൃഷ്ണൻ കുട്ടിയും റീക്കിയും മറ്റൊരാള കണ്ടു പിടിച്ച് കൃഷ്ണൻ കുട്ടി എന്ന പേരിൽ രജിസ്ട്രർ ചെയ്യിക്കുന്നു. നൃത്താദ്ധ്യാപകനായ ജ്യോതിഷ് (ജയസൂര്യ) ആയ്യിരുന്നു അത്. നിരവധി വിവാഹാലോചനകൾ മുടങ്ങിപ്പോയ ജ്യോതിഷ് ഈ തട്ടിപ്പിനു സമ്മതിക്കുന്നു. ജ്യോതിഷും കൃഷ്ണൻ കുട്ടിയും സംഘവും കസ്തൂബാ ആശ്രമത്തിൽ വന്നു താമസിക്കുന്നു.

ഇതിനിടയിൽ നിരവധി ജയിൽ വാസങ്ങൾ കഴിഞ്ഞ് പുറത്തിറങ്ങിയ ആന്റപ്പൻ(ബിജു മേനോൻ) നഗരത്തിലെ ക്വൊട്ടേഷൻ ഗുണ്ടാപ്രവർത്തകനായി. ചെറുപ്പത്തിലേ തന്നെ ജയിലിലേക്ക് പറഞ്ഞയച്ച കൃഷ്ണൻ കുട്ടിയോട് പ്രതികാരം ചെയ്യുകയാണ് ആന്റപ്പന്റെ ലക്ഷ്യം. സാന്ദർഭികമായി കസ്തൂർബാ ആശ്രമത്തിലെ സമൂഹവിവാഹത്തെക്കുറിച്ചറിയുകയും അതിനൊടൊപ്പം കിട്ടുന്ന സ്വർണ്ണവും പണവും കൈക്കലാക്കാനും വേണ്ടി ആന്റപ്പനും കൂട്ടരും  പദ്ധതി തയ്യാറാക്കി കസ്തൂർബാ ആശ്രമത്തിൽ വരുന്നു.

എന്നാൽ താൻ അന്വേഷിക്കുന്ന കൃഷ്ണൻ കുട്ടിയാണ് ഇതെന്ന് അറിയാതെ ആന്റപ്പനും താൻ പേടിക്കുന്ന ആന്റപ്പനാണ് ഇതെന്ന് അറിയാതെ കൃഷ്ണൻ കുട്ടിയും പരസ്പരം ചങ്ങാത്തത്തിലാകുന്നു. ഇതിനിടയിൽ അഭിരാമി ആരെന്ന് മനസ്സിലാക്കിയ കൃഷ്ണൻ കുട്ടി ജ്യോതിഷിനെ ഇതിൽ നിന്നും മാറ്റി അഭിരാമിയെ വിവാഹം കഴിക്കാൻ ആഗ്രഹിക്കുന്നു. അതിൽ കുപിതനായ ജ്യോതിഷ്, കൃഷ്ണൻ കുട്ടിക്കെതിരെ ആന്റപ്പനു ക്വൊട്ടേഷൻ കൊടുക്കുന്നു. അതിനിടയിലാണ് തന്നെ കൊല്ലാൻ നടക്കുന്ന തന്റെ പഴയ ശത്രു ആന്റപ്പനാണ് ഇപ്പോൾ തന്റെ ചങ്ങാതിയായിരിക്കുന്ന ഈ ആന്റപ്പനെന്ന് കൃഷ്ണൻ കുട്ടിയും ജ്യോതിഷും മനസ്സിലാക്കുന്നത്.

ഈ ഊരാക്കുടുക്കുകളിൽ നിന്നും രക്ഷപ്പെടാൻ പണ്ട് നിരപരാധിയായ ആന്റപ്പനെ മോഷ്ടാവാക്കിയപോലെ പല അബദ്ധങ്ങളും കൃഷ്ണൻ കുട്ടിക്ക് ചെയ്യേണ്ടിവരുന്നു. എന്നാൽ അതെല്ലാം കൃഷ്ണൻ കുട്ടീയുടെ നിയന്ത്രണത്തിൽ നിന്നും കൈവിട്ടുപോകുന്ന വലിയ ദുരന്തങ്ങളാകുന്നു.