സിദ്ദിഖ്

എറണാകുളം ജില്ലയിലെ പുല്ലേപ്പടിയിൽ കറപ്പനൂപ്പിൽ ഇസ്മായിൽ ഹാജിയുടെയും സൈനബയുടെയും രണ്ടാമത്തെ മകനായി ജനിച്ചു. കലൂർ ഗവ. ഹൈസ്കൂൾ, കളമശ്ശേരി സെന്‍റ് പോൾസ് കോളജ്, മഹാരാജാസ് കോളജ് എന്നിവിടങ്ങളിലെ വിദ്യാഭ്യാസത്തിനുശേഷം സിദ്ദിഖ് എറണാകുളം പുല്ലേപ്പടി ദാറുൽ ഉലൂം സ്കൂളിൽ ക്ലർക്കായി ജോലിക്ക് കയറി. ഇതിനൊപ്പം കൊച്ചിൻ കലാഭവന്‍റെ മിമിക്രി ട്രൂപ്പിലും അംഗമായിരുന്നു.

ഫാസിലിന്റെ അസിസ്റ്റന്റ് ഡയറക്ടറായിട്ടാണ് സിദ്ദിഖ് സിനിമയിൽ അരങ്ങേറുന്നത്. 1986 -ൽ പപ്പൻ പ്രിയപ്പെട്ട പപ്പൻ എന്ന ചിത്രത്തിന് ലാൽ -നോടൊപ്പം കഥ, തിരക്കഥ, സംഭാഷണം എന്നിവ രചിച്ചുകൊണ്ട് രചനാരംഗത്ത് തുടക്കം കുറിച്ചു. 1989 -ൽ ലാലിനോടൊപ്പം ചേർന്ന് റാംജി റാവ് സ്പീക്കിംഗ് എന്ന ചിത്രം സംവിധാനം ചെയ്തുകൊണ്ട് ചലച്ചിത്ര സംവിധാനരംഗത്ത് തുടക്കം കുറിച്ചു. സിദ്ദീഖ്-ലാൽ കൂട്ടുകെട്ട് ഇൻ ഹരിഹർ നഗർ (1990), ഗോഡ്‌ഫാദർ (1991), വിയറ്റ്നാം കോളനി (1992), കാബൂളിവാല (1994) എന്നീ സൂപ്പർ ഹിറ്റ് ചിത്രങ്ങൾ സംവിധാനം ചെയ്തു. കൂടാതെ മക്കൾ മാഹാത്മ്യം, മാന്നാർ മത്തായി സ്പീക്കിംഗ്, ഫിംഗർപ്രിന്റ്,, കിംഗ് ലയർ എന്നീ ചിത്രങ്ങളുടെ തിരക്കഥയും നാടോടിക്കാറ്റ്, അയാൾ കഥയെഴുതുകയാണ് എന്നിവയുടെ കഥയും ഈ കൂട്ടുകെട്ടിൽ നിന്നും പിറന്നതായിരുന്നു. പിന്നീട് ഇരുവരും വേർപിരിഞ്ഞു. അതിനുശേഷം സിദ്ദിഖ് ഹിറ്റ്ലർ, ഫ്രണ്ട്സ്, ക്രോണിക്ക് ബാച്ചിലർ എന്നിവയുൾപ്പെടെ എട്ട് ചിത്രങ്ങൾ സംവിധാനം ചെയ്തു. അദ്ദേഹം കഥ, തിരക്കഥ, സംവിധാനം നിർവഹിച്ചവയെല്ലാം ഹാസ്യ പ്രമേയമുള്ള ചിത്രങ്ങളാണ്.

2023 ആഗസ്റ്റിൽ സിദ്ദിഖ് അന്തരിച്ചു. സിദ്ദിഖിന്റെ ഭാര്യ സാജിത, മക്കൾ സൗമ്യ, സാറ, സുകൂൺ.