സന്തോഷ്

Santhosh K Nair

മലയാള ചലച്ചിത്ര നടൻ. സി എൻ കേശവൻ നായരുടെയും, പി രാജലക്ഷ്മി അമ്മയുടെയും മകനായി തിരുവനന്തപുരത്തു ജനിച്ചു. തിരുവനന്തപുരം സെന്റ് ജോസഫ് ഹയർ സെക്കന്ററി സ്കൂളിലായിരുന്നു സന്തോഷിന്റെ പ്രാഥമിക വിദ്യാഭ്യാസം. മഹാത്മാ ഗാന്ധി കോളേജിൽ നിന്നും അദ്ദേഹം മാത്തമാറ്റിക്സിൽ ഗ്രാജുവേഷൻ ചെയ്തു. വിദ്യാഭ്യാസ കാലത്ത് സന്തോഷിന് രാഷ്ട്രീയ പ്രവർത്തനവുമുണ്ടായിരുന്നു. 1980-ൽ എ ടി അബു സംവിധാനം ചെയ്ത രാഗം താനം പല്ലവി എന്ന ചിത്രത്തിലൂടെയാണ് സന്തോഷ് അഭിനയരംഗത്തേയ്ക്കെത്തുന്നത്. 1982-ൽ റിലീസ് ചെയ്ത ഇതു ഞങ്ങളുടെ കഥ എന്ന സിനിമയിലൂടെയാണ് ശ്രദ്ധിയ്ക്കപ്പെടുന്നത്.  തുടർന്ന് നൂറിലധികം സിനിമകളിൽ ചെറുതും വലുതുമായ വേഷങ്ങൾ അദ്ദേഹം ചെയ്തു.

ആദ്യ സിനിമ കഴിഞ്ഞ് പിൻനിലാവ്, നാണയം തുടങ്ങിയ സിനിമകളിലൊക്കെ അഭിനയിച്ച ഇദ്ദേഹത്തിന്റെ ഏപ്രിൽ 18, ഇവിടെ തുടങ്ങുന്നു എന്നീ സിനിമകളിലെ വില്ലൻ വേഷങ്ങൾ ശ്രദ്ധിക്കപ്പെട്ടു. 1985ൽ പതിനെട്ടോളം സിനിമകളിൽ ഇദ്ദേഹം അഭിനയിച്ചു. മിക്കതും വില്ലൻ വേഷങ്ങളായിരുന്നു. കൊതി തീരും വരെ, ഇത് നല്ല തമാശ എന്ന സിനിമകളിലെ നായകവേഷങ്ങളും ഇതിനിടയിൽ ചെയ്തു.1986 ൽ ഇറങ്ങിയ യുവജനോത്സവത്തിലെ നിസ്സാർ എന്ന പോസിറ്റീവ് റോൾ, ഇരുപതാം നൂറ്റാണ്ടിലെ ജാക്കിയുടെ വലംകയ്യായ ലോറൻസ് തുടങ്ങിയ വേഷങ്ങൾ ശ്രദ്ധിക്കപ്പെട്ടു. മുളമൂട്ടിൽ അടിമ, പെരുവണ്ണാപുരത്തെ വിശേഷങ്ങൾ, കടത്തനാടൻ അമ്പാടി, വിഷ്ണുലോകം, ഒരു അഭിഭാഷകന്റെ കേസ്സ്ഡയറി തുടങ്ങിയ സിനിമകളിൽ അദ്ദേഹം നല്ല വേഷങ്ങൾ അവതരിപ്പിച്ചിട്ടുണ്ട്. ഒരിടവേളയ്ക്ക് ശേഷം അദ്ദേഹത്തിന്റെ ശക്തമായൊരു കഥാപാത്രമെന്ന് പറയുന്നത് ചന്ദ്രോത്സവത്തിലെ നായകന്റെ സുഹൃത്തായ സഹദേവന്റെ വേഷമായിരിക്കും. മോഹൻലാൽ, മമ്മൂട്ടി, സുരേഷ്ഗോപി, രതീഷ്, ശങ്കർ, ജയറാം, റഹ്മാൻ, ബാലചന്ദ്രമേനോൻ എന്നിവരുടെയൊക്കെ വില്ലൻ ജോഡിയായി വന്നിട്ടുള്ള ഈ നടൻ നഗരങ്ങളിൽ ചെന്ന് രാപാർക്കാം, കമ്മത്ത് & കമ്മത്ത് എന്നീ സിനിമകളിൽ കോമഡി ഫ്ലേവറുള്ള വേഷങ്ങളും ചെയ്തിട്ടുണ്ട്. ചില ടെലിവിഷൻ പരമ്പരകളിലും സന്തോഷ് അഭിനയിച്ചിട്ടുണ്ട്.

സന്തോഷ് വിവാഹം ചെയ്തത് സ്കൂൾ ടീച്ചറായ ശുഭശ്രീയെയാണ്. സന്തോഷ് - ശുഭശ്രീ ദമ്പതികൾക്ക് ഒരു മകളാണൂള്ളത്. പേര് രാജശ്രീ എസ് നായർ.