കടുവാക്കുളം ആന്റണി

കർഷകരായ തൊമ്മന്റെയും അന്നമ്മയുടെയും എട്ട് മക്കളിൽ അവസാനത്തെ മകനായി ആലപ്പുഴ കുട്ടനാട്ടിൽ 1936 നവംബർ 9 ആം തിയതിയാണ് കടുവാക്കുളം ആന്റണി ജനിച്ചത്.

ആന്റണിയുടെ രണ്ടാമത്തെ വയസ്സിൽ ഇദ്ദേഹത്തിന്റെ കുടുംബം കോട്ടയം ജില്ലയിലെ കടുവാക്കുളത്തേയ്ക്ക് താമസം മാറ്റി. ചെറുപ്പത്തിൽ തന്നെ തമാശകൾ പറയുവാനും ആസ്വദിയ്ക്കുവാനുമുള്ള കഴിവുണ്ടായിരുന്ന ആന്റണിക്ക് അഭിനേതാവാകണം എന്നായിരുന്നു  ആഗ്രഹം. 

വലുതായ ശേഷം ഒരു സ്വകാര്യ പണമിടപാടു സ്ഥാപനം നടത്തിയിയിരുന്ന ഇദ്ദേഹം ഒപ്പം പല അമച്ച്വർ നാടക സമിതികളിലും അഭിനയിച്ചിരുന്നു. എൻ എൻ പിള്ളയോടൊപ്പം വിശ്വകേരളകലാ സമിതി, നാഷണൽ തിയ്യറ്റർ എന്നിവയിൽ പ്രവർത്തിച്ചിരുന്ന ഇദ്ദേഹത്തെ നടൻ ജോസ്പ്രകാശാണ് സിനിമാ ലോകത്തേക്ക് എത്തിച്ചത്.

1961 ൽ മെറിലാന്റിനെ ഭക്തകുചേല ആയിരുന്നു ആന്റണിയുടെ ആദ്യ ചിത്രം. 1968 ൽ മലയാളത്തിലെ ആദ്യ മുഴുനീള ഹാസ്യചിത്രമായ വിരുതൻ ശങ്കുവിൽ പ്രധാനപ്പെട്ട ഒരു കഥാപാത്രം അവതരിപ്പിച്ച ഇദ്ദേഹം തുടർന്ന് മുന്നൂറിലധികം സിനിമകളിൽ അഭിനയിച്ചു. 1960-70 കാലത്തെ പ്രധാന ഹാസ്യ താരങ്ങളിൽ ഒരാളായിരുന്ന ഇദ്ദേഹം 2000 ൽ ഉണ്ണിമായ എന്ന സിനിമയിലാണ് അവസാനമായി അഭിനയിച്ചത്.

2001 ഫെബ്രുവരി 4 ആം തിയതി ഇദ്ദേഹം തന്റെ 65 ആം വയസ്സിൽ അന്തരിച്ചു. നടി ബിയാട്രീസ് ആന്റണിയാണ് ഭാര്യ. സോണിയ ആന്റണി, ടോമിദാസ് ആന്റണി എന്നിവരാണ് മക്കൾ.