കറുത്ത പക്ഷികൾ

തമിഴ് നാട്ടിൽ നിന്നും മൂന്നു മക്കളുമായി കേരളത്തിലേക്കെത്തിയ മുരുകൻ വസ്ത്രങ്ങൾ ഇസ്തിരിയിട്ടാണ് ഉപജീവനമാർഗം കണ്ടെത്തിയിരുന്നത്. ഭാര്യ അസുഖം ബാധിച്ചു മരിച്ച ശേഷം മുരുകൻ ഒറ്റയ്ക്കാണ് മക്കളെ നോക്കിയിരുന്നത്. മൂന്നു മക്കളിൽ ഇളയ കുട്ടി മല്ലി ജന്മനാ അന്ധയായിരുന്നതിനാൽ മരിക്കുന്നതിന് മുൻപ് അമ്മയെ കാണാൻ കഴിഞ്ഞിരുന്നില്ല. മകൾക്ക് കാഴ്ച ശക്തി ലഭിക്കണമെന്നത് അമ്മയുടെ വലിയ ആഗ്രഹമായിരുന്നു. ഡോക്ടർ പറഞ്ഞ പ്രകാരം കണ്ണ് മാറ്റി വയ്ക്കലല്ലാതെ കാഴ്ച്ച ലഭിക്കാൻ മറ്റു മാർഗങ്ങളില്ലാത്തിനാലും ശസ്ത്രക്രിയയ്ക്ക് വലിയ തുക വേണ്ടി വരുമെന്നതിനാലും മുരുകൻ നിസ്സഹായനായിരുന്നു. കാഴ്ചയില്ലാത്ത മകൾക്ക് വേണ്ടി അവൾക്ക് കാണാൻ കഴിയാത്തതിനെപ്പറ്റിയൊക്കെ അവൾ ചോദിക്കുമ്പോഴെല്ലാം തന്നെ ക്ഷമയോടെ മുരുകൻ വിവരിച്ചു കൊടുക്കുകയും വളരെ തുച്ഛമായ വരുമാനം കൊണ്ട് മറ്റു രണ്ടു മക്കളെയും സ്കൂളിലയച്ചു പഠിപ്പിക്കുകയും ചെയ്തു.

മുരുകൻ ജോലിക്ക് പോയിരുന്ന സമ്പന്നമായ കുടുംബത്തിലെ അംഗമായ സുവർണ്ണ മുരുകനോടും കുട്ടികളോടും സ്നേഹത്തോടെയും കരുണയോടെയുമാണ് പെരുമാറിയിരുന്നത്. അസുഖ ബാധിതയായി മരണത്തെ കാത്തു കഴിഞ്ഞിരുന്ന സുവർണ്ണയ്ക്ക് മല്ലിയോട് പ്രത്യേക സ്നേഹമുണ്ടായിരുന്നു. മരണ ശേഷം തന്റെ കണ്ണുകൾ മല്ലിക്ക് ദാനം ചെയ്യാൻ സുവർണ സമ്മതം നൽകുന്നു. അത് കേട്ട് സുവർണയുടെ ആയുസിന് വേണ്ടിയാണോ മരണത്തിനു വേണ്ടിയാണോ പ്രാർത്ഥിക്കേണ്ടതെന്ന് ആശയക്കുഴപ്പമുണ്ടായി മുരുകന്റെ കുടുംബത്തിന്. എന്നാൽ മുരുകൻ പുനർജ്ജന്മമലയെന്ന ഒരു മലയിലേക്ക് സുവർണയെ കൂട്ടിക്കൊണ്ട് പോയി സുവർണയ്ക്ക് വേണ്ടി പ്രാർത്ഥിക്കുകയാണ് ചെയ്തത്. അവിടുത്തെ ഗുഹയിൽ പ്രദക്ഷിണം ചെയ്താൽ വ്യാധികൾ മാറുമെന്നായിരുന്നു വിശ്വാസം.