ആനന്ദഭൈരവി

കഥകളി വിദ്വാനായ വാസുദേവപ്പണിക്കരുടെ സ്ത്രീ വേഷങ്ങളിൽ അയാളുടെ മകൻ അപ്പു തന്റെ അമ്മയെ കണ്ടു. മകൻ ആഗ്രഹിക്കുമ്പോഴൊക്കെയും മരിച്ചു പോയ അവന്റെ അമ്മയുണ്ടാക്കിയ ശൂന്യതയിൽ സ്ത്രീ വേഷങ്ങൾ നിറഞ്ഞാടിക്കൊണ്ട് വാസു മകന്റെ അമ്മയായി. അമ്മയാകുന്ന അച്ഛനും മൂന്നു മുത്തശ്ശിമാർക്കുമൊപ്പം സ്നേഹലാളനകളേറ്റ് അപ്പു വളർന്നു.

വികൃതിക്കുട്ടിയായിരുന്ന അപ്പു ഒരിക്കൽ നാട്ടിലെ ഭാഗവതർ പാടുന്നത് തെറ്റാണെന്ന് പറഞ്ഞ് ഭാഗവതരെ പരിഹസിച്ചു. ഭാഗവതർക്കുണ്ടായ പിഴവുകൾ ഒരു ജ്ഞാനിയെപ്പോലെ വിശദീകരിക്കുകയും ഭാഗവതരെ പാടിക്കേൾപ്പിക്കുകയും ചെയ്തു. ആരിൽ നിന്നും പഠിക്കാതെ തന്നെ ചെറു പ്രായത്തിൽ അവനുണ്ടായ ജ്ഞാനവും കഴിവും കണ്ട് ഏവരും അമ്പരന്നു. അദ്‌ഭുതബാലനായി വിശേഷിപ്പിക്കപ്പെട്ട അപ്പുവിന്റെ സംഗീതകച്ചേരികൾ രാജ്യമെമ്പാടും പ്രശസ്തമായി. പിന്നീട് കച്ചേരികളുമായി വിദേശ രാജ്യത്തേക്ക് അവനെ എത്തിക്കുന്നതിനായി സ്ഥലം എം.ൽ.എ ഒരു സഹായിയെ ഏർപ്പാടു ചെയ്തു കൊടുക്കുകയും അപ്പുവിന്റെ ദിനചര്യകൾ അയാളുടെ നിയന്ത്രണതിലാവുകയും ചെയ്തു.

അപ്രതീക്ഷിതമായി ഒരു ദിവസം ബോധരഹിതനായ അപ്പു ആശുപത്രിയിൽ പ്രവേശിപ്പിക്കപ്പെടുന്നു.