വലം‌പിരി ചുരുൾമുടി

വലം പിരിച്ചുരുൾ മുടി മാടിയൊതുക്കീ
വാൽക്കൺനിൽ മഷിയെഴുതീ
വലതുകാൽ വെച്ചെന്റെ  മനസ്സിന്റെ മുറ്റത്ത്
വന്നു കയറും പ്രിയ സന്ധ്യേ
എന്റെ പ്രണയപരാഗില ശുഭസന്ധ്യേ
(വലം പിരി....)

മേടനിലാവിൻ പുടവ ചുറ്റി
മെയ്യാഭരണം ചാർത്തീ
നീൾ വിരൽത്തുമ്പിൽ നീഹാരമണിയുള്ള
വൈഡൂര്യമോതിരം ചാർത്തീ
കാതരയായ് നിൽക്കും നിന്നെക്കാണുമ്പോൾ
കരളിൽ പൂക്കുന്നു ശ്രീരാഗം
(വലം പിരി....)

ആരിയൻ നെല്ലിന്റെ കതിരുലയും
അഴകിൻ പാടത്തിലൂടെ
ആവണിക്കാറ്റിൻ പൂന്തേരിലണയും
ഉത്രാടരാത്രിയെപ്പോലെ
മോഹിനിയായ് നിൽക്കും നിന്നേക്കാണുമ്പോൾ
കനവിൽ വിരിയുന്നു ശൃംഗാരം
(വലം പിരി...)