എന്നാലും ന്റെളിയാ

ദുബായിൽ ഒരേ അപാർട്ട്മെൻ്റിലെ അടുത്തടുത്ത ബ്ലോക്കുകളിൽ താമസിക്കുന്നവരാണ് ബാലകൃഷ്ണനും (സുരാജ് വെഞ്ഞാറുംമൂട് ) കരീമും (സിദ്ധീഖ്). ബാലകൃഷ്ണൻ ഒരു ഇൻഷുറൻസ് ഏജന്റാണ്.  ബിൽഡിംഗ് കോൺട്രാക്റ്ററാണ് കരിം.

കുറെ വർഷങ്ങളായി കുഞ്ഞുങ്ങളില്ലാത്ത ദുഃഖത്തിൽ കഴിയുന്ന ബാലകൃഷ്ണനും ഭാര്യ ലക്ഷ്മിയും (ഗായത്രി അരുൺ) അതിനു വേണ്ടി നടത്തിയ ചികിത്സകൾക്ക് ഫലമുണ്ടാകുന്നു. ഓവുലേഷൻ പിരീഡിൽ ഒരു 'രണ്ടാം മധുവിധു' വാകട്ടെ എന്ന് ഡോക്ടർ പറയുന്നു. ബാലകൃഷ്ണൻ രണ്ടു മൂന്നു ദിവസത്തേക്ക് ലീവെടുക്കുന്നു. എന്നാൽ, 'സ്വർഗ്ഗത്തിലെ കട്ടുറുമ്പുകാൻ' ലക്ഷ്മിയുടെ സഹോദരൻ  (ജോസുകുട്ടി ജേക്കബ്) എത്തുന്നതോടെ പദ്ധതികൾ പൊളിയുന്നു. ജോലി തേടി വിസിറ്റിംഗ് വിസയിൽ ദുബായിൽ എത്തിയ അളിയൻ  പണിയൊന്നുമാകാതെ ഒഴപ്പി നടക്കുന്നതിൽ ബാലകൃഷ്ണന്  നീരസമുണ്ട്.

കരീമിൻ്റെ ഭാര്യ സുൾഫി (ലെന) മകൾ ഇസ്മിയുടെ (അമൃത മേനോൻ)  കാര്യത്തിൽ അനാവശ്യമായ  ആശങ്കയും സംശയവുമുള്ളയാളാണ്.  മകൾ സ്ഥിരമായി മുറിയടച്ചിരിക്കുന്നതും ഫോണിൽ തുടർച്ചയായി സംസാരിക്കുന്നതും അവരുടെ ആധി കൂട്ടുന്നു. ഇസ്മി അന്യമതക്കാരനൊപ്പം പോകുമോ എന്ന ഭയമാണവർക്ക്. കരീം പക്ഷേ അതിനെയൊക്കെ വളരെ ലാഘവത്തോടെയാണ് കാണുന്നത്.

സുഹൃത്തിൻ്റെ മകൾ ജസ്നയുടെ മൈലാഞ്ചിക്കല്യാണത്തിനു പോകുന്ന കരിമും ഭാര്യയും, ജസ്ന കാമുകനൊപ്പം ഒളിച്ചോടിയതറിയുന്നു. അതോടെ സുൾഫിയുടെ ആധി വീണ്ടും കൂടുന്നു. മകൾ വിവേക് എന്നൊരാളുമായി സ്ഥിരമായി സംസാരിക്കാറുണ്ടെന്നും അതു വിലക്കാൻ അയാളുടെ മാതാപിതാക്കളോട് പറയണമെന്നും സുൾഫി പറയുന്നു. ഉദാസീനനായിരിക്കുന്ന കരിമിനെ സുൾഫി നിർബന്ധിച്ച് വിവേകിൻ്റെ വീട്ടിൽ കൊണ്ടു പോകുന്നു.

ബാലകൃഷ്ണൻ്റെ അപാർട്ട്മെൻ്റിലാണ് അവരെത്തുന്നത്. അയാളുടെ അളിയനാണ് വിവേക്. കാര്യങ്ങൾ പറഞ്ഞ് രണ്ടു കുടുംബങ്ങളും തമ്മിൽ തർക്കമാകുന്നു. കരിം വളരെ ശാന്തമായാണ് ഇടപെടുന്നതെങ്കിലും സുൾഫി ഒട്ടും മയമില്ലാതെയാണ് സംസാരിക്കുന്നത്. കുട്ടികളില്ലാത്തവർക്ക് അതുള്ളവരുടെ ദുഃഖം മനസ്സിലാകില്ല എന്ന് സുൾഫി പറഞ്ഞത്  ലക്ഷ്മിക്ക് വിഷമമാകുന്നു. അതോടെ ബാലകൃഷ്ണനും കയർത്തു സംസാരിക്കുന്നു.

എന്നാൽ പിന്നീട്  സുൾഫി ലക്ഷ്മിയോട് മാപ്പു പറയുന്നതോടെ അവർ തമ്മിൽ ഇണങ്ങുന്നു. കരിം ബാലകൃഷ്ണനോടും സൗഹൃദത്തിലാവുന്നു. കരിമും ബാലകൃഷ്ണനും മദ്യപിക്കുന്നു. എന്നാൽ മദ്യം അകത്തുചെന്നതോടെ, അതു വരെ ശാന്തനായിരുന്ന കരിമിൻ്റെ സ്വഭാവം മാറുന്നു. അയാൾ വിവേകുണ്ടാക്കുന്ന പ്രശ്നങ്ങളുടെ പേരിൽ ബാലകൃഷ്ണനെ തെറി വിളിക്കുകയും കൈയേറ്റം ചെയ്യുകയും ചെയ്യുന്നു. സുൾഫി കരിമിനെ  ബലമായി പിടിച്ച് സ്വന്തം അപ്പാർട്മെൻറിലെത്തിക്കുന്നു.

അവിടെ അവർ വിവേകിനെയും ഇസ്മിയെയും കാണുന്നു.