അഗ്നിക്ഷേത്രം

പ്രഗത്ഭനായ സർജനാണ് ഡോക്ടർ സുരേഷ് (പ്രേംനസീർ).  അമ്മയും (ത്യശ്ശൂർ എൽസി), സഹോദരി രാധയും (ചെമ്പരത്തി ശോഭന) അടങ്ങുന്ന കൊച്ചു കുടുംബമാണ് സുരേഷിന്റേത്.  ഗവണ്മെന്റ് ആശുപത്രിയിൽ സേവനമനുഷ്ഠിക്കുന്ന ഡോക്ടർ സുരേഷ് പണത്തിന്റെ മേൽ ആർത്തിയുള്ളവനല്ല.  പാവപ്പെട്ടവരിൽ നിന്നും പണം ഈടാക്കാതെയാണ് ഡോക്ടർ സുരേഷ് തന്റെ കർത്തവ്യം നിറവേറ്റുന്നത്.  സേവനമനുഷ്ഠിക്കാൻ ഡോക്ടർ സുരേഷ് രാത്രിയെന്നോ, പകലെന്നോ നോക്കാറില്ല, തന്റെ സേവനത്തിനായി ആര് എപ്പോൾ വന്നു വിളിച്ചാലും ഹാജരാകാൻ മടി കാണിക്കാറില്ല.  സുരേഷ് ഈയൊരു തീരുമാനത്തിലെത്താൻ കാരണം, സുരേഷിന്റെ അച്ഛന്റെ മരണമാണ്.  ദരിദ്ര കുടുംബത്തിൽപ്പെട്ട അദ്ദേഹം രോഗബാധിതനായി കിടക്കുമ്പോൾ ഗവണ്മെന്റ് ആശുപത്രിയിലെ ഡോക്ടർമാർ വീടുവരെ വന്ന് ഒരെത്ത് നോക്കാൻ പോലും സന്മനസ്സ് കാണിക്കാത്തത് കൊണ്ട് മരണത്തിന് കീഴടങ്ങുന്നു.  ആ അച്ഛന്റെ അന്ത്യാഭിലാഷം എന്തായിരുന്നെന്നാൽ, സുരേഷ് നല്ലപോലെ പഠിച്ച് ഡോക്ടർ ആയി, പാവപ്പെട്ടവർക്ക് ആതുര സേവനം അനുഷ്ഠിക്കണം എന്നായിരുന്നു.

സുരേഷിന്റെ അമ്മാവൻ പലപ്പോഴും സുരേഷിന് വേണ്ടിയുള്ള കല്യാണാലോചനയുമായി വരുമ്പോൾ അതൊക്കെ സുരേഷ് തള്ളിക്കളയുകയാണ് പതിവ്. ഇതിന് കാരണം, കാലിന് സ്വാധീനമില്ലാത്ത രാധയെ ഓർത്തിട്ടാണ്.  അവൾക്കൊരു വിവാഹ ജീവിതം എന്നത് സ്വപ്നം പോലെയാണെന്നുള്ളത് കൊണ്ട് തനിക്കും ഒരു വിവാഹ ജീവിതം വേണ്ടെന്നാണ് സുരേഷ് നിശ്ചയിച്ചിരിക്കുന്നത്.  കൂടാതെ മറ്റൊരു കാരണം കൂടിയുണ്ട് - ജ്യേഷ്ഠൻ വിവാഹം കഴിച്ചുവന്നാൽ പിന്നെ ജ്യേഷ്ഠന് അവളോടുള്ള സ്നേഹം ക്രമേണ കുറയുകയും, ഭാര്യയോടാവും എപ്പോഴും സ്നേഹം എന്നും, ചേട്ടത്തിക്ക് അവളോട് വെറുപ്പായിരിക്കുമെന്നും, ക്രമേണ അവളെ എല്ലാവരും വെറുത്ത് അവൾ ഒറ്റപ്പെട്ടു പോവുമെന്നും സുരേഷിന് വിവാഹാലോചന വരുമ്പോഴൊക്കെ രാധ പറയുന്നത് പതിവാണ്.  അതുകൊണ്ടാണ്, അവളെ ദുഃഖിപ്പിച്ചൊരു വിവാഹ ജീവിതം തനിക്ക് വേണ്ടെന്ന് സുരേഷ് തീരുമാനിക്കുന്നത്.  

ഒരു ദിവസം സുരേഷിന് സ്ഥലത്തെ ധനികനായ മുല്ലശ്ശേരി വിശ്വനാഥൻ മുതലാളിയുടെ (ജോസ്പ്രകാശ്) ഫോൺ വരുന്നു, മൂത്ത മകൾ ശ്രീദേവി (ശ്രീവിദ്യ) ബാഡ്മിൻറൺ കളിച്ചുകൊണ്ടിരിക്കുമ്പോൾ ബോധം കെട്ടുവീണു എന്നും, വീട് വരെ വന്ന് അവളെ ചെക്ക് അപ്പ് ചെയ്യണമെന്നും പറഞ്ഞ്.  ചെക്ക് അപ്പ് ചെയ്ത ശേഷം, പേടിക്കാൻ ഒന്നുമില്ലെന്നും, ക്ഷീണം കാരണമാണ് അങ്ങിനെ സംഭവിച്ചതെന്നും പറഞ്ഞ് ചില മരുന്നുകൾ എഴുതിക്കൊടുത്ത ശേഷം സുരേഷ് മടങ്ങുന്നു.  ശ്രീദേവിക്ക് ഒരു അനിയത്തിയുണ്ട്, ഗീത (രമാദേവി). വിശ്വനാഥൻ തന്റെ മക്കളെ പൊന്നുപോലെയാണ് നോക്കുന്നത്, മക്കൾക്ക് ഒരു ജലദോഷം വന്നാൽപ്പോലും അദ്ദേഹം പിടഞ്ഞു പോവും.  ശ്രീദേവിയെ ചെക്ക് അപ്പ് ചെയ്യാനായി സുരേഷ് അടുത്ത ദിവസവും വിശ്വനാഥന്റെ ബംഗ്ളാവിലേക്ക് ചെല്ലുന്നു.  ചെക്ക് അപ്പിന് ശേഷം മടങ്ങുമ്പോൾ വിശ്വനാഥൻ കൊടുക്കുന്ന പണം വാങ്ങാൻ സുരേഷ് വിസമ്മതിക്കുന്നു.  അപ്പോൾ ഗീത പറയുന്നു, പണം കൊടുത്ത് ആരെയും വിലയ്ക്ക് വാങ്ങാം എന്ന ഡാഡിയുടെ   വാദം പൊളിഞ്ഞു.  ശ്രീദേവി അപ്പോൾ സുരേഷിനെ പ്രണയിച്ചു തുടങ്ങിയിരിക്കുന്നു.

സുരേഷ് രാധയുടെ പിറന്നാളിന് സമ്മാനമായി കൊടുക്കാനുള്ള സാരി വാങ്ങുമ്പോൾ അവിടെ യാദൃശ്ചികമായി  ശ്രീദേവിയും, ഗീതയും കടന്നു വരുന്നു.  സുരേഷ് തിരഞ്ഞെടുത്ത സാരിക്ക് വിലക്കൂടുതലായതിനാൽ, ആ സാരി മാറ്റി വിലക്കുറവുള്ള സാരി വാങ്ങി സുരേഷ് തിരിച്ചു പോവുന്നു.  ശ്രീദേവി സുരേഷ് വേണ്ടെന്ന് വെച്ച ആ വിലക്കൂടുതലുള്ള സാരി വാങ്ങി സുരേഷിന്റെ വീട്ടിൽ ചെന്ന് രാധയ്ക്ക് സമ്മാനമായി കൊടുക്കുന്നു.  കാൽ സ്വാധീനമില്ലാത്ത രാധയോട് ശ്രീദേവിക്ക് അനുകമ്പ തോന്നുന്നു.  ശ്രീദേവിയുടെ സ്നേഹം നിറഞ്ഞ പെരുമാറ്റം രാധയെ സന്തോഷവതിയാക്കുന്നു.

ഡ്യൂട്ടി കഴിഞ്ഞ് വീട്ടിലെത്തുന്ന സുരേഷ്, രാധ ശ്രീദേവി സമ്മാനമായി നൽകിയ സാരിയുടുത്തു നിൽക്കുന്നത് കണ്ട് അതിശയിച്ച്, ഈ സാരി എവിടുന്നു കിട്ടി എന്ന് ചോദിക്കുമ്പോൾ, രാധ കാര്യങ്ങൾ വിവരിക്കുന്നു. ഇത് വാങ്ങേണ്ടിയിരുന്നില്ലെന്ന് സുരേഷ് പറയുമ്പോൾ, ശ്രീദേവി നല്ലവളാണെന്നും, അവർ തന്നെ കളിയാക്കിയില്ലെന്നുള്ളതും കൊണ്ടാണ് സാരി വാങ്ങിയതെന്നും  പറയുന്ന രാധ, കൂട്ടത്തിൽ, ഇതുപോലൊരു നല്ല മനസ്സുള്ള പെണ്ണിനെ ചേട്ടൻ കല്യാണം കഴിക്കുകയാണെങ്കിൽ തനിക്ക് ഒരുപാട് സന്തോഷമാവും എന്നുകൂടി പറയുന്നു. 

സുരേഷ് രാധയ്ക്ക് വേണ്ടി വാങ്ങിയ സാരി ശ്രീദേവിക്ക് സമ്മാനമായി നൽകുന്നു.  സുരേഷ് തിരിച്ചു പോവുമ്പോൾ ശ്രീദേവി കാറുമായി വന്ന്, സുരേഷിനെ കാറിൽ കയറ്റി കടൽത്തീരത്തേക്ക് കൊണ്ടുപോയി സുരേഷിനെ വിവാഹം കഴിക്കാൻ ആഗ്രഹിക്കുന്നു എന്ന് പറയുന്നു. അപ്പോൾ സുരേഷ് തന്റെ സമ്പാദ്യമായിട്ടുള്ളത് പ്രായമായ അമ്മയും, മുടന്തിയായ അനിയത്തിയും മാത്രമാണെന്നും, അനിയത്തി യാതൊരു കാരണവശാലും ദുഃഖിക്കരുതെന്നും പറയുമ്പോൾ, സുരേഷിന്റെ അനിയത്തി എന്നും എന്റെയും അനിയത്തിയായിരിക്കും എന്നുറപ്പ് നൽകുമ്പോൾ സുരേഷ് അവളെ വിവാഹം കഴിക്കാൻ തയ്യാറാവുന്നു.  ശ്രീദേവിയുടെ അച്ഛൻ അവൾക്ക് നല്ലൊരു വരനെ കണ്ടെത്തിയിട്ടുണ്ടെന്ന് പറയുമ്പോൾ, ശ്രീദേവി സുരേഷിനെ വിവാഹം കഴിക്കാൻ തീരുമാനിച്ച കാര്യം പറയുന്നു.  വിശ്വനാഥൻ ആദ്യം അത് എതിർക്കുന്നെങ്കിലും, ശ്രീദേവി സുരേഷിനെ മാത്രമേ വിവാഹം കഴിക്കുള്ളു എന്ന് ശഠിക്കുമ്പോൾ വിശ്വനാഥൻ ചെയ്‌വതെന്തന്നറിയാതെ മിഴിച്ചു നിൽക്കുന്നു. 

വിശ്വനാഥൻ സുരേഷിന്റെ തന്റെ ഓഫീസിൽ വിളിച്ച് തന്റെ മകളെ തനിക്ക് വിട്ടു തരണമെന്നും, പകരം എത്ര വേണമെങ്കിലും പണം തരാമെന്നും പറയുന്നു.  സുരേഷ് അത് സ്വീകരിക്കുന്നില്ലെന്ന് മാത്രമല്ല, ശ്രീദേവിയെ വിവാഹം കഴിക്കുന്നതിൽ നിന്നും പിന്തിരിയാൻ ഉദ്ദേശമില്ലെന്നും, ശ്രീദേവിക്ക് വേണമെങ്കിൽ തീരുമാനം മാറ്റം എന്നും പറയുന്നു.  അപ്പോൾ അങ്ങോട്ട് കയറി വരുന്ന ശ്രീദേവിയും തന്റെ തീരുമാനത്തിൽ ഉറച്ചു നിൽക്കുന്നതായി അറിയിക്കുന്നു.  അതാണ് ആഗ്രഹമെങ്കിൽ അത് നടത്തിത്തരാമെന്നും, പക്ഷേ വിവാഹ ശേഷം ശ്രീദേവി അച്ഛനുണ്ടെന്ന കാര്യം തന്നെ മറന്നേക്കണം എന്നും പറയുന്നു.  അടുത്ത ദിവസം ശ്രീദേവി താൻ ഈ വീട് വിട്ടുപോവുകയാണെന്നും, സുരേഷിന്റെ കുടുംബക്ഷേത്രത്തിൽ വെച്ച് തങ്ങൾ വിവാഹിതരാവാൻ പോവുകയാണെന്നും പറഞ്ഞ് കത്തെഴുതി വെച്ച് പോവുന്നു.  വിശ്വനാഥൻ തന്നെ മറന്നേക്കൂ എന്ന് പറയുന്നുണ്ടെങ്കിലും, ഏത് നേരവും ശ്രീദേവിയെ ഓർത്ത് അദ്ദേഹം ദുഃഖിക്കുകയാണ്.

മൂന്നു നാല് മാസങ്ങൾക്ക് ശേഷം  ഗീത ശ്രീദേവിയെക്കാണാൻ പോകുന്നു.  കുശലാന്വേഷങ്ങൾക്ക് ശേഷം ശ്രീദേവി അമ്മയാകാൻ പോകുന്ന വിവരം ഗീത അറിയുന്നു.  അച്ഛന് ശ്രീദേവിയെക്കാണാൻ ആഗ്രഹമുണ്ടെന്ന് പറയുമ്പോൾ സുരേഷിനെക്കൂടാതെ താൻ അങ്ങോട്ട് വരില്ലെന്ന് പറയുന്നു.  ചേച്ചിയും അനിയത്തിയും സന്തോഷമായിരിക്കുന്നത് കാണുന്ന രാധ തെറ്റിദ്ധരിക്കുന്നു - അവളെ ഇനി ആർക്കും വേണ്ട, എല്ലാരും അവളെ വെറുക്കാൻ തുടങ്ങും എന്ന് വിചാരിച്ച്.  രാധ തന്റെ പരിഭവം പറയുമ്പോൾ ഗീത അവളുമായി വാക്കുതർക്കത്തിലേർപ്പെടുന്നു.    കരഞ്ഞുകൊണ്ട് വീട്ടിലേക്ക് മടങ്ങുന്ന ഗീത അച്ഛനോട് ശ്രീദേവി അവിടെ ഒരു വേലക്കാരിയെപ്പോലെയാണ് കഴിയുന്നത് എന്ന് പറയുന്നു.  അത് കേൾക്കുന്ന വിശ്വനാഥൻ,  മകളെ ആ നരകത്തിൽ നിന്നും എങ്ങിനെ രക്ഷിക്കണം എന്ന് തനിക്കറിയാം എന്ന് പറയുന്നു.

മഹിളാസമാജത്തിന്റെ ഒരു കലാപരിപാടിക്കായി ചിലർ ക്ഷണിക്കാൻ വരുമ്പോൾ സുരേഷ് തനിക്ക് വരാൻ കഴിയില്ലെന്നും, ശ്രീദേവിയും അനിയത്തിയും വരും, അവരെ വീട്ടിൽ വന്ന് കൂട്ടിക്കൊണ്ടു പോവണമെന്നും പറയുന്നു.  പരിപാടി ദിവസം  ശ്രീദേവിയെയും രാധയെയും കൊണ്ടുപോവാൻ വരുമ്പോൾ രാധ നൃത്തം പ്രാക്ടീസ് ചെയ്യുന്നത് കാണുന്ന അവർ അവളെ കളിയാക്കുമ്പോൾ രാധ കരഞ്ഞുകൊണ്ട് താൻ പരിപാടിക്ക് പോവില്ലെന്ന് ശഠിക്കുന്നു.  അതിനാൽ സുരേഷിന്റെ അമ്മ ശ്രീദേവിയെ മാത്രം അവരോടൊപ്പം പറഞ്ഞുവിടുന്നു.  പരിപാടി കഴിഞ്ഞ് തിരിച്ചു വരുമ്പോഴും രാധ പിണക്കം നടിച്ചു കിടപ്പാണെന്നറിയുന്ന ശ്രീദേവി അവളെ സമാധാനിപ്പിക്കാൻ ചെന്നടുത്തിരിക്കുമ്പോൾ, രാധ പിണക്കം മാറാതെ കാലു കൊണ്ട് ചവിട്ടുന്നത് ശ്രീദേവിയുടെ വയറ്റിൽ തട്ടുന്നു.  നിറഗർഭിണിയായ അവർ വേദനയാൽ പുളയുമ്പോൾ സുരേഷ് ഓടിവന്ന് കാര്യം തിരക്കുന്നു.  അപ്പോൾ രാധയെ കാണിച്ചുകൊടുക്കാതെ, കാലുതെറ്റി വീണതാണെന്ന് ശ്രീദേവി കള്ളം പറയുന്നു.  രാധയ്ക്ക് പശ്ചാത്താപം തോന്നുന്നു.  സുരേഷ് ഉടൻ തന്നെ ശ്രീദേവിയെ ചെക്ക് അപ്പ് ചെയ്യുന്ന ഡോക്ടറെ വിളിക്കുന്നു.

രാധ ദൈവത്തോട് ശ്രീദേവിക്ക് ഒരാപത്തും സംഭവിക്കരുതേയെന്ന് പ്രാർത്ഥിക്കുന്നു. അപ്പോൾ സുരേഷ് വന്ന് ശ്രീദേവി ഒരാൺ കുഞ്ഞിന് ജന്മം നൽകിയ വിവരം അറിയിക്കുന്നു.  സുരേഷിന്റെ വീട്ടുകാർ ഗീതയേയും വിളിച്ച് ഈ കാര്യം അറിയിക്കുന്നു.  താൻ ഒരപ്പൂപ്പനായതറിഞ്ഞ് വിശ്വനാഥൻ സന്തോഷിക്കുന്നുണ്ടെങ്കിലും,  ശ്രീദേവി പ്രസവിച്ചത് സുരേഷിന്റെ വീട്ടിലായത് കൊണ്ട് അങ്ങോട്ട് വരാൻ താല്പര്യമില്ലെന്നും, ഗീത മാത്രം അങ്ങോട്ട് പോയി കണ്ടാൽ മതി എന്നും പറയുന്നു.  അതനുസരിച്ച് ഗീത മാത്രം കുഞ്ഞിനെപ്പോയി കാണുന്നു.  കുഞ്ഞിന് വിശ്വനാഥൻ കൊടുത്തയച്ച സ്വർണ്ണമാല ശ്രീദേവി നിരസിക്കുന്നു.  

ദിവസങ്ങൾ ഇഴഞ്ഞു നീങ്ങുന്നു, കുഞ്ഞ് നടക്കാൻ തുടങ്ങിക്കഴിഞ്ഞു.  ഒരിക്കൽ കുഞ്ഞിനേയും കൂട്ടി സുരേഷും, ശ്രീദേവിയും കടപ്പുറത്തേക്ക് പോകുന്നു.  അവിടെ ഉല്ലസിച്ചിരിക്കുന്നതിനിടയിൽ കുഞ്ഞ് കടലിലേക്കിറങ്ങിച്ചെല്ലുന്നത് രണ്ടുപേരും ശ്രദ്ധിക്കുന്നില്ല.  തിരമാലകൾ കുഞ്ഞിനെ കടലിലേക്ക് വലിച്ചുകൊണ്ടു പോവുന്നതിന് മുൻപ് ഭാഗ്യത്തിന് അവരുടെ ശ്രദ്ധയിൽപ്പെടുന്നു.  ഓടിച്ചെന്ന് കുഞ്ഞിനെ രക്ഷപ്പെടുത്തുമ്പോൾ ശ്രീദേവി സുരേഷിനോട് പറയുന്നു, കുഞ്ഞിന് നാൾ ദോഷമുണ്ടെന്നും അമ്പലത്തിൽപ്പോയി അർച്ചന കഴിക്കാൻ കുറെ നാളായി പറയാൻ തുടങ്ങി എന്നും.  അങ്ങിനെ അവർ കുഞ്ഞിനേയും കൊണ്ട് അമ്പലത്തിൽ പോകാൻ തീരുമാനിക്കുന്നു.  എന്നാൽ സുരേഷ് ആ കാര്യം മറന്ന്, അസുഖമായി കിടക്കുന്ന നഴ്സ് ശാന്തയുടെ മകനെ പരിശോധിക്കാൻ പോവുന്നു.

വരും ദിവസങ്ങളിലും സുരേഷ് നേരത്തെ വരാം എന്ന് പറയുന്നുണ്ടെങ്കിലും, അത് അപ്പാടെ മറന്ന് ശാന്തയുടെ കൂടെ അവളുടെ കുഞ്ഞിനെ ചികിത്സിക്കാനാണ് പോകുന്നത്.  സുരേഷിന്റെ ശാന്തയുമൊത്തുള്ള ഈ പോക്ക് കണ്ട്  ആശുപത്രിയിൽ എല്ലാരും പരിഹസിച്ചു ചിരിക്കുന്നത് രാധയുടെ കാതിലും എത്തുന്നു.  ചേട്ടന്റെ ഈ പോക്ക് ശരിയല്ലെന്നും, ചേട്ടനോട് ഇതിനെക്കുറിച്ച് ചോദിക്കുമെന്നും രാധ പറയുമ്പോൾ ശ്രീദേവി അത് പാടില്ലെന്ന് പറഞ്ഞ് വിലക്കുന്നു. എന്നാലും, സുരേഷിന്റെ ഈ പ്രവർത്തിയിൽ ശ്രീദേവിയും അസ്വസ്ഥയാണ്.

ഒരു വിഷു ദിവസം ഞങ്ങൾ ഒരുങ്ങിയിരിക്കും, വരാൻ മറക്കരുതെന്ന് ശ്രീദേവി സുരേഷിനെ യാത്രയാക്കുന്നു.  തീർച്ചയായും വരും എന്ന് വാക്കു കൊടുത്ത് സുരേഷ് ആശുപത്രിയിലേക്ക് പോവുന്നു.  എന്നാൽ അന്നും സുരേഷ് ശാന്തയുമൊപ്പം അവളുടെ കുഞ്ഞിനെ ശുശ്രുഷിക്കാൻ വേണ്ടി അവളുടെ വീട്ടിൽ പോവുന്നു.  ആ നേരത്ത് ശ്രീദേവി മുകളിലത്തെ മുറിയിൽ കുഞ്ഞിനെ ഉറക്കാൻ കിടത്തി താഴെ വന്ന് സുരേഷിന്റെ അമ്മയോടും, രാധയോടും സംസാരിച്ചിരിക്കുമ്പോൾ പുറത്ത് കുട്ടികൾ പടക്കം പൊട്ടിക്കുന്നതിനിടയിൽ അതിൽ ഒന്ന് കുഞ്ഞ് കിടക്കുന്ന മുറിയിലേക്ക് വീണ് തീ പിടിക്കുന്നു.  തുണി കരിയുന്ന മണം കേട്ട് എല്ലാരും ഓടി ചെല്ലുമ്പോൾ കുഞ്ഞിന് തീപ്പൊള്ളൽ ഏറ്റിരിക്കുന്നു.  സുരേഷിനെ വിളിക്കുമ്പോൾ സുരേഷ് ശാന്തയുമായി പോയെന്നാണ് മറുപടി വരുന്നത്.  അതിനാൽ മറ്റൊരു ഡോക്ടറെ വിളിച്ച് കുഞ്ഞിന് വേണ്ട പ്രാഥമിക ശുശ്രുഷകൾ നൽകുന്നു.  സുരേഷ് വീട്ടിലെത്തിയതും കാര്യങ്ങൾ അറിഞ്ഞ് ശ്രീദേവിയോട് കുഞ്ഞിനെ എന്തിന് ഒറ്റയ്ക്കാക്കി താഴെപ്പോയിരുന്നു എന്ന് കയർക്കുമ്പോൾ ശ്രീദേവി ഒന്നും മിണ്ടാതിരിക്കുന്നു.