തടാകം

നവദമ്പതികളായ, ആർമി ഓഫീസർ രാജേന്ദ്രനും ശ്രീദേവിയും മധുവിധു ആഘോഷിക്കാനായി കാശ്മീരിലെത്തുന്നു. രാജേന്ദ്രൻ്റെ അമ്മാവനും അവിടുത്തെ ആശുപത്രിയിലെ ഡോക്ടറുമായ  ഡോ.നായരുടെ വീട്ടിലാണ് അവരുടെ താമസം. കാശ്മീരിൻ്റെ നയനാനന്ദകരമായ ഭംഗി ആസ്വദിച്ച് യുവമിഥുനങ്ങൾ ചുറ്റിക്കറങ്ങുന്നു. അവർക്കു വേണ്ടി ഡോ.നായർ ദാൽ തടാകത്തിലെ ബോട്ട് ഹൗസ് ബുക്കു ചെയ്യുന്നു.  ദാൽ തടാകത്തിലൂടെ ബോട്ടിൽ ബോട്ട് ഹൗസിലേക്ക് പോകുമ്പോൾ, ദൂരെ നിന്നു വരുന്ന ഒരു പാട്ടുകേട്ട്, അതുവരെ സന്തോഷവതിയായിരുന്ന ശ്രീദേവി പെട്ടെന്ന് അസ്വസ്ഥയാകുന്നു. ബോട്ട് ഹൗസിലെത്തുമ്പോഴേക്കും അവളുടെ അസ്വസ്ഥത കൂടുന്നു. മനസ്സിൽ കൂടി ഒരു യുവാവിൻ്റെയും ക്രൂരനായ ഒരു മനുഷ്യൻ്റെയും ചിത്രങ്ങൾ കടന്നു പോകുന്നു. അവൾ വല്ലാത്ത പരിഭ്രാന്തിയും അസ്വസ്ഥതയും കാണിക്കുന്നു. രാജേന്ദ്രൻ അവളോട് വിശ്രമിക്കാൻ പറയുമ്പോഴേക്കും അവൾ ബോധരഹിതയാകുന്നു. ഗർഭമാണെന്ന് സംശയിക്കുന്നെങ്കിലും ഡോ. നായരുടെ ആശുപത്രിയിലെ ഗൈനക്കോളജിസ്റ്റ് അതല്ലെന്ന് സ്ഥിരീകരിക്കുന്നു.

അന്നു രാത്രി, രാജേന്ദ്രൻ്റെ കൈയിലെ  പൂക്കൂട കണ്ട ശ്രീദേവി പൂക്കൂടയുമായി ഓടി വരുന്ന  യുവാവിനെ മനസ്സിൽ കാണുന്നു. "ജബ്ബാർ " എന്നു പറഞ്ഞ് അവൾ രാജേന്ദ്രനെ മുറുകെപ്പുണരുന്നു.  പെട്ടെന്നവൾ ഭയചകിതയായി മോഹാലസ്യപ്പെടുന്നു. ഡോ. നായരും രാജേന്ദ്രനും ചേർന്ന് ശ്രീദേവിയെ സൈക്യാട്രിസ്റ്റിനെ കാണിക്കുന്നു. അയാൾ ഹിന്ദിയിൽ സംസാരിക്കുമ്പോൾ, മലയാളം മാത്രമറിയാവുന്ന ശ്രീദേവി ഹിന്ദിയിൽ ഒഴുക്കോടെ മറുപടി പറയുകയും കശ്മീരിലും മറ്റും സ്ഥലങ്ങളിലും പോയ കാര്യം പറയുകയും ചെയ്യുന്നു.

മാനസികാഘാതമാണ് കാരണം എന്ന് ഡോക്ടർ പറയുന്നെങ്കിലും രാജേന്ദ്രന് അത് ബോധ്യമാകുന്നില്ല. അവൾ എങ്ങനെയാണ് ഹിന്ദി സംസാരിക്കുന്നതെന്നാണ് അയാളുടെ സംശയം. അയാൾ ഡോക്ടറെ വീണ്ടും കാണാൻ പോകുന്നു. അതേ സമയം, ശ്രീദേവിയെ അല്പം നടക്കാൻ നായർ ക്ഷണിക്കുന്നു. നടക്കുന്നതിനിടയിൽ, സംശയം തീർക്കാൻ, മുൻപ് എപ്പോഴെങ്കിലും കാശ്മീരിൽ വന്നിട്ടുണ്ടോ എന്നയാൾ അവളോട് ചോദിക്കുന്നു. ഇല്ല എന്നാണവളുടെ മറുപടി. പെട്ടെന്ന് പള്ളിയിൽ നിന്ന് വാങ്കുവിളി ഉയരുന്നതു കേട്ട ശ്രീദേവി അസ്വസ്ഥയും വിഭ്രാന്തയും ആകുന്നു. അവൾ വീട്ടിലേയ്ക്കോടുന്നു. പിറകെ എത്തുന്ന നായരും രാജേന്ദ്രനും കാണുന്നത് നമസ്കരിക്കുന്ന (മുസ്ലിം പ്രാർത്ഥന നടത്തുന്ന) ശ്രീദേവിയെയാണ്. 

ശ്രീദേവിയെ നാട്ടിലേക്ക് കൊണ്ടുപോകാമെന്ന് രാജേന്ദ്രൻ പറയുന്നെങ്കിലും നായർ അതു തടയുന്നു. ശ്രീദേവിയുടെ രോഗം ആ പ്രദേശവുമായി ബന്ധപ്പെട്ടതാണെന്നും അവിടെത്തന്നെ ചികിത്സിക്കുന്നതാണ് നല്ലതെന്നും അയാൾ പറയുന്നു. അവരുടെ സംഭാഷണം കേൾക്കുന്ന ശ്രീദേവി, തനിക്ക് ഭ്രാന്താണെന്ന് രാജേന്ദ്രൻ പറയുന്നതു കേട്ട് ഞെട്ടുന്നു. അയാൾ ജബ്ബാർ ആരാണെന്നു ശ്രീദേവിയോടു ചോദിക്കുന്നു. പക്ഷേ, അവൾക്ക്  ചോദ്യത്തിന്  ഉത്തരമില്ല. പഴയ പ്രണയം വല്ലതുമുണ്ടായിരുന്നോ എന്നയാൾ ചോദിക്കുമ്പോൾ അവൾ നിസ്സഹായായി തേങ്ങുന്നു. അന്നു രാത്രി ശ്രീദേവി ഉറക്കത്തിൽ എഴുന്നേറ്റ് പുറത്തേക്കു നടക്കുന്നു. നായരും രാജേന്ദ്രനും അവളെ പിന്തുടരുന്നു. തടാകത്തിൻ്റെ തീരത്തെത്തുന്ന ശ്രീദേവി 'സാബിറ' എന്നുറക്കെ വിളിക്കുന്നു. സാബിറ ആരാണെന്ന് നായർ ചോദിക്കുമ്പോൾ കൂട്ടുകാരിയാണെന്നും തൻ്റെ ബോട്ടുമായി പോയെന്നും അവൾ പറയുന്നു. രാജേന്ദ്രനും നായരും ചേർന്ന് ബലമായി അവളെ വീട്ടിലെത്തിക്കുന്നു.

ഭാര്യയുടെ വിചിത്രമായ പെരുമാറ്റത്തിൽ രാജേന്ദ്രൻ കൂടുതൽ അസ്വസ്ഥനും സംശയാലുവും ആകുന്നു. ശ്രീദേവി ഉറക്കത്തിൽ  ഇറങ്ങിപ്പോയതോടെ അയാളുടെ ആത്മനിയന്ത്രണം വിട്ടു പോകുന്ന അവസ്ഥയിലായിരുന്നു. ഇതിനിടെ, ഡോക്ടറുടെ നിർദ്ദേശപ്രകാരം സാബിറയെയും ജബ്ബാർ ഖാനെയും തിരക്കിപ്പോകുന്ന നായർ തടാകത്തിനടുത്തു വച്ച് സാബിറയെക്കാണുന്നു.  തൻ്റെ ബംഗ്ലാവിൽ കുറച്ചു പൂക്കൾ എത്തിക്കാൻ സാബിറയെ ചട്ടംകെട്ടി അയാൾ മടങ്ങുന്നു. പിറ്റേന്നു പൂവുമായെത്തുന്ന സാബിറ ശ്രീദേവിയെക്കണ്ട് അന്തം വിട്ടു പോകുന്നു. "നസീമ" എന്നവൾ വിളിക്കുമ്പോൾ ശ്രീദേവി അവളെ  സാബിറയായി തിരിച്ചറിയുന്നു.

ഞെട്ടിത്തരിച്ച് അവിടുന്ന് ഇറങ്ങി ഓടുന്ന സാബിറയെ രാജേന്ദ്രൻ പിന്തുടരുന്നു. എന്നാൽ അവളെ തടഞ്ഞുവയ്ക്കുന്ന രാജേന്ദ്രനെ നാട്ടുകാർ ആക്രമിക്കുന്നു. മലയാളിയായ റഹിം എന്നൊരാൾ രാജേന്ദ്രനെ രക്ഷിച്ച്  തൻ്റെ വീട്ടിൽ കൊണ്ടു പോകുന്നു. രാജേന്ദ്രൻ ജബ്ബാർഖാനെപ്പറ്റി ചോദിക്കുമ്പോൾ അയാൾ ഒഴിഞ്ഞു മാറുന്നു. അയാളുടെ ഭാര്യ സുലേഖയും ആ പേരുകേട്ട് അസ്വസ്ഥയാകുന്നു.  റഹിമിൽ നിന്നു സാബിറയുടെ താമസസ്ഥലം മനസ്സിലാക്കുന്ന രാജേന്ദ്രൻ അവിടേക്കു പോകുന്നു.

 സാബിറയുടെ വീട്ടിൽ കാണുന്ന പഴയ ഫോട്ടോ നസീമയുടേതാണെന്ന് സാബിറ പറഞ്ഞിട്ടും അത് ശ്രീദേവിയുടെതാണ് എന്നയാൾ തെറ്റിദ്ധരിക്കുന്നു. അതിനെച്ചൊല്ലി നായരും രാജേന്ദ്രനും തർക്കിക്കുന്നതിനിടയ്ക്ക് ജബ്ബാർ ഖാൻ അവിടെത്തുന്നു. ശ്രീദേവിയെക്കാണുന്ന അയാൾ നസീമയാണെന്നു കരുതി അവളുടെയടുത്തെത്തെത്തുന്നു. പെട്ടെന്ന് ഭയചകിതയായ ശ്രീദേവി ബോധംകെട്ടു വീഴുന്നു. അതേ സമയം, സാബിറയുടെ സഹോദരനായ ജബ്ബാർ ഖാൻ താൻ കണ്ടത് നസീമയെയാണെന്നു വിശ്വസിച്ച്  അസ്വസ്ഥനും വിഭ്രാന്തനുമാകുന്നു. അയാളെ നാട്ടുകാർ വീട്ടിൽ ബന്ധനസ്ഥനാക്കുന്നു.

ശ്രീദേവിയുടേത് ദ്വന്ദവ്യക്തിത്വം ആണെന്നും പണ്ട് അവിടെ ജീവിച്ചിരുന്ന നസീമയുടെ പുനർജന്മമാണെന്നും ഡോ.നായർക്കു തോന്നുന്നു. അയാളത് രാജേന്ദ്രനോടു പറയുന്നു. ശ്രീദേവിയിൽ നിന്ന് നസീമയെ പറിച്ചു മാറ്റാൻ നസീമ ആരാണെന്ന് ശ്രീദേവി അറിയണമെന്നും അതിന് റഹിമിൻ്റെയും സുലേഖയുടെയും സഹായം തേടാമെന്നും അയാൾ പറയുന്നു. രാജേന്ദ്രനും നായരും ശ്രീദേവിയുമായി റഹിമിൻ്റെ വീട്ടിലെത്തുന്നു. സുലേഖയെ കാണുന്ന  ശ്രീദേവി നസീമയായി മാറുന്നു; അവളെ പുണരുന്നു. നസീമയുടെ കഥ സുലേഖ പറയുമ്പോൾ നസീമയായ ശ്രീദേവിയും അതു മനസ്സിൽ കാണുന്നു.

കാശ്മീർ സന്ദർശിക്കാനെത്തുന്ന, സൂലേഖയുടെ സഹോദരനായ ജബ്ബാർ പൂക്കാരിയായ നസീമയെ പരിയപ്പെടുന്നു. ഒരിക്കൽ ജബ്ബാർ നസീമയുമായി സംസാരിക്കുന്നതു കണ്ട അവളുടെ മുറച്ചെറുക്കനായ ജബ്ബാർ ഖാൻ ജബ്ബാറിൻ്റെ കൈയിൽ മഴു കൊണ്ടു വെട്ടുന്നു. പക്ഷേ,  നസീമയും ജബ്ബാറും കൂടുതൽ അടുക്കുന്നു; അവർ  അനുരാഗബദ്ധരാകുന്നു. അവരുടെ അടുപ്പം നസീമയെ വിവാഹം കഴിക്കാൻ ആഗ്രഹിക്കുന്ന ജബ്ബാർഖാന് ഇഷ്ടമല്ല. ജബ്ബാറിനെയും നസീമയേയും പിന്തിരിപ്പിക്കാൻ സുലേഖയും സാബിറയും റഹീമും ശ്രമിക്കുന്നെങ്കിലും അവർ വഴങ്ങുന്നില്ല. സുലേഖയെ കാണാഞ്ഞിട്ട് തിരക്കിയെത്തുന്ന ജബ്ബാറിനെ ജബ്ബാർ ഖാൻ അടിച്ചവശനാക്കുന്നു. നസീമയെ അവളുടെ വാപ്പ വീട്ടുതടങ്കലിലാക്കുന്നു.