ശരപഞ്ജരം

ധനികയും എസ്റ്റേറ്റുകളുടെ ഉടമയുമായ സൗദാമിനിയുടെ (ഷീല)  രണ്ടാം ഭർത്താവാണ് ചന്ദ്രശേഖരൻ (ജയൻ). ആദ്യ ഭർത്താവിലുള്ള മകൾ ദേവി (പ്രിയ) അമ്മയും രണ്ടാനച്ഛനുമായി നീരസത്തിലാണ്.

വർഷങ്ങൾക്കു മുൻപ്, ദേവിയുടെ ബാല്യത്തിൽ, കാര്യസ്ഥനായ സിദ്ധയ്യനാണ് (നെല്ലിക്കോട് ഭാസ്കരൻ) കുതിരയെ നോക്കാനായി ചന്ദ്രശേഖരനെ സൗദാമിനിയുടെ ബംഗ്ലാവിലെത്തിക്കുന്നത്.  രോഗിയായ ഭർത്താവു (പി കെ എബ്രഹാം)  കാരണം വിരസമായ ദാമ്പത്യം നയിക്കുന്ന  സൗദാമിനി ചന്ദ്രശേഖരനിൽ അനുരക്തയാവുന്നു. അയാൾക്കും അതു മനസ്സിലാവുന്നുണ്ട്. 

ഒരിക്കൽ അപ്രതീക്ഷിതമായി ചന്ദ്രശേഖരൻ സൗദാമിനിയെ ശാരീരികമായി കീഴടക്കുന്നു. അതേ സമയത്തു തന്നെ അവരുടെ ഭർത്താവ് കുഴഞ്ഞു വീണു മരിക്കുന്നു. രണ്ടിനും ദൃക്സാക്ഷിയായ മകൾ ദേവി അമ്മയുമായി അകലുന്നു.

ചന്ദ്രശേഖരനെ സൗദാമിനി വിവാഹം കഴിക്കുന്നു.  അയാൾ ധനമോഹിയും സ്ത്രീലമ്പടനുമാണെന്ന് അറിയുന്നതോടെ സൗദാമിനിയുടെ ജീവിതം സംഘർഷങ്ങളുടെ ശരപഞ്ജരത്തിലാകുന്നു.

സിദ്ധയ്യൻ്റെ മകനും തൻ്റെ ബാല്യകാല സുഹൃത്തുമായ പ്രഭാകരനുമായി (സത്താർ) ദേവി അടുപ്പത്തിലാവുന്നു.  അവരുടെ വിവാഹം നടത്താനുള്ള സൗദാമിനിയുടെ തീരുമാനത്തെ ചന്ദ്രശേഖരൻ എതിർക്കുന്നു. പ്രഭാകരനെ കാണാതാവുന്നു.