ദി കുങ്‌ഫു മാസ്റ്റർ

ഡെറാഡൂണിൽ, വിംഗ് ചുൻ കുങ്ഫൂ എന്ന ആയോധനമുറയുടെ  പരിശീലകനാണ് ഋഷി റാം(ജിജി സ്കറിയ). അയാൾക്ക് അച്ഛനും ഭാര്യയും ചെറിയ മകനുമുണ്ട്. സഹോദരിയായ ഋതു റാമും (നീത പിള്ള)  ആയോധനകലയിൽ നിപുണയാണ്. ദൂരെയുള്ള ഒരു കോളജിലെ അദ്ധ്യാപിക കൂടിയാണ് ഋതു. 

ഡെറാഡൂൺ പൊലീസിന് നിത്യതലവേദനയായ, മയക്കുമരുന്നിനടിമകളായ ഒരു ഗുണ്ടാസംഘത്തിൻ്റെ തലവനാണ് ലൂയിസ് ആൻ്റണി(സനൂപ് ദിനേശ്).  സംഘാംഗങ്ങളെല്ലാവരും വിവിധ ആയോധനമുറകൾ പരിശീലിച്ചവരാണ്.  കൊള്ളയുടെയും ബലാൽസംഗത്തിൻ്റെയും ഒക്കെ  കേസുകൾ പലതുണ്ടെങ്കിലും, സാക്ഷി പറയാൻ ആരും ധൈര്യപ്പെടാത്തതിനാൽ, കേസുകളിൽ നിന്ന് ലൂയിസ് നിഷ്പ്രയാസം രക്ഷപ്പെടുന്നു. ഇതിനെത്തുടർന്ന്, ആ സംഘാംഗങ്ങളെക്കുറിച്ച് കൂടുതൽ വിവരങ്ങൾ ശേഖരിക്കാൻ പൊലീസ് ഋഷിയുടെ സഹായം തേടുന്നു. 

ഋഷി പോലീസിനെ സഹായിക്കുന്നു എന്നു മനസ്സിലാക്കിയ ലൂയിസ്, ഋതു ജോലി സ്ഥലത്തായിരിക്കുന്ന ദിവസങ്ങളിലൊന്നിൽ, ഋഷിയെയും കുടുംബത്തെയും ആക്രമിക്കുന്നു.