സന്തോഷം

സുരേഷ് കുമാറിന്റെ മൂത്ത മകൾ ആദ്യ, ഹൈസ്കൂൾ ക്ളാസിൽ പഠിക്കുമ്പോഴാണ് അവളുടെ അമ്മ സിന്ധു രണ്ടാമത് ഒരു പെൺകുഞ്ഞിന് ജന്മം കൊടുക്കുന്നത്. പിന്നീടങ്ങോട്ട് അക്ഷരമോളുടെ എല്ലാ കാര്യങ്ങളും ശ്രദ്ധിക്കുന്നതും അവളെ പഠിപ്പിക്കുന്നതുമെല്ലാം ചേച്ചിയായ ആദ്യയാണ്. ഇപ്പോൾ അഞ്ചാം ക്ളാസിൽ പഠിക്കുന്ന അക്ഷരക്ക്, ചേച്ചി എല്ലാ കാര്യങ്ങളിലും തൻ്റെ സ്വന്തം അഭിപ്രായത്തിന് വിടാത്തതിൽ പരിഭവമുണ്ട്. എന്നാലും അച്ചനമ്മമാരുടെയും മുത്തശിയുടെയും പിന്തുണ ചേച്ചിക്കായതിനാൽ അവൾ പ്രതികരിക്കുന്നില്ല.

പഠിക്കാനും മറ്റു കാര്യങ്ങളിലും ക്ളാസിൽ ഒന്നാമതാണ് അക്ഷര സുരേഷ് . എന്നാലും എല്ലാ കാര്യങ്ങളിലും ഒരു സ്വാതന്ത്ര്യമില്ലായ്മ അനുഭവപെടുന്ന അക്ഷര ഇതിൽ നിന്ന് രക്ഷപെടാൻ എന്താണ് മാർഗമെന്ന് കൂട്ടുകാരുമായി ആലോചിക്കുന്നു. അങ്ങനെയിരിക്കെ ഒരു ദിവസം ഗിരീഷ് എന്ന ചെറുപ്പക്കാരൻ സുന്ദരിയായ ആദ്യയെ സ്വന്തമാക്കി വിവാഹം ചെയ്യണമെന്ന് ആഗ്രഹിച്ച് അക്ഷരയെയും കൂട്ടുകാരെയും സമീപിക്കുന്നു. ചേച്ചിയെ വിവാഹം കഴിച്ചയച്ചാൽ താൻ കൂടുതൽ സ്വതന്ത്രയായി മാറുമെന്നു വിചാരിക്കുന്ന അക്ഷര ഗിരീഷിനെ സഹായിക്കുന്നു. നിരന്തരമായ പരിശ്രമങ്ങൾക്കൊടുവിൽ ഗിരീഷും ആദ്യയും പ്രണയത്തിലാവുന്നു ... ഇതേ സമയം പഠന കാര്യങ്ങളിലും പാഠ്യേതരവിഷയങ്ങളിലും ചേച്ചിയുടെ ശ്രദ്ധ ഇല്ലാതാവുന്നതോടെ അക്ഷര പിന്നോക്കം പോവുന്നു. ഈ ഘട്ടത്തിൽ ചേച്ചിയോട് സഹായം അഭ്യർത്ഥിക്കുന്ന അക്ഷരയെ ആദ്യ സഹായിക്കുന്നില്ല. ഗിരീഷുമായുള്ള ബന്ധമാണ് ചേച്ചി തന്നെ ശ്രദ്ധിക്കാത്തതിന്റെ കാരണമെന്ന് കരുതി ചെറിയ തോതിൽ വിവാഹം മുടക്കാൻ വരെ ശ്രമം നടത്തുന്ന അക്ഷരയുടെ സങ്കടം മനസിലാക്കി ചേച്ചി അവസാനം തന്റെ വിവാഹത്തിനുമുമ്പുള്ള ദിവസങ്ങളിൽ അവളോട് പഴയതുപോലെ അടുത്തിടപഴകുന്നു.