പുരുഷാർത്ഥം

നഗരത്തിൽ വളർന്ന,  ആധുനികതയെ ഇഷ്ടപ്പെടുന്ന ഭദ്ര വാസുദേവ് തൻ്റെ  ഭർത്താവിന്റെ മരണത്തിന്റെ ഓർമ്മകളാൽ വേട്ടയാടപ്പെടുകയാണ്.  അവരും മകൻ വിനീതും ജന്മനാട്ടിലേക്ക് യാത്ര ചെയ്യുന്നു. അവിടെ, ഭർത്താവിന്റെ മരണാനന്തര ചടങ്ങുകൾ ചെയ്യണമെന്നും  ഭർത്താവിൻ്റെ ആത്മാവിന് ശാന്തി കിട്ടാൻ പൂജ ചെയ്യണമെന്നും  അവൾ മനസ്സിലാക്കുന്നു.

ഭദ്ര യഥാർത്ഥത്തിൽ തന്റെ ഭർത്താവിന്റെ മരണത്തിന്  ഉത്തരവാദിയായിരിക്കാമെന്ന് തോന്നുന്ന രീതിയിലാണ് അവരുടെ പെരുമാറ്റം. ഭർത്താവിൻ്റെ പ്രേതസാന്നിധ്യം തന്നിൽ നിന്നകറ്റാൻ  രാമേശ്വരം ക്ഷേത്രത്തിൽ ഒരു പൂജ  നടത്താൻ അവർ തീരുമാനിക്കുന്നു. ആ യാത്രയിൽ വഴിയിൽ വച്ച് അവർ പൂർവകാമുകനായ നൈനാനെ  കണ്ടുമുട്ടുന്നു, അയാളുടെ  ഭാര്യയാണെങ്കിൽ ഭ്രാന്താശുപത്രിയിലും. 

ഗ്രാമത്തിലെ തീർത്തും മടുപ്പുണ്ടാക്കുന്ന അന്തരീക്ഷവും തൻ്റെ ജീവിതത്തിലെ വിരസതയും മറ്റും ഭദ്ര അയാളോട്  പറയുന്നു. നൈനാൻ തൻ്റെ പെരുമാറ്റത്തിലൂടെ ഭദ്രയെ സന്തോഷിപ്പിക്കുന്നു.  കൂടാതെ,  തൻ്റെ ഒരു ഭവനവായ്പയുമായി ബന്ധപ്പെട്ട പ്രശ്‌നത്തിനുള്ള പരിഹാരവും  ഈ ബന്ധം വഴി നേടിയെടുക്കാൻ അയാൾ  ശ്രമിക്കുന്നുണ്ട്. ചെറുപ്പക്കാരിയായ വിധവ മകനും കാമുകനുമൊത്ത് അങ്ങനെ ഭർത്താവിന്റെ ചിതാഭസ്മവുമായി ധനുഷ്‌കോടിയിലെത്തുന്നു.

 ഈ ബന്ധം വിനീതിന് തീര ഇഷ്ടമല്ല. ഇതു മൂലം അവൻ ഭദ്രയിൽ നിന്നും കൂടുതൽ അകലുന്നു. രാമേശ്വരത്തു വച്ച് അവൻ രഹസ്യമായി ബലിതർപ്പണം ചെയ്യുന്നു. പിന്നീട് എല്ലാവരുമായി ചേർന്ന് ബലിതർപ്പണം ചെയ്യുന്ന ചടങ്ങ് ആരംഭിക്കുമ്പോൾ വിനീതിന്  സങ്കടം വരുന്നു. ഭദ്ര വിനീതിനെ സമാധാനിപ്പിക്കാൻ ശ്രമിക്കുന്നു.  നൈനാനും അവനെ ആശ്വസിപ്പിക്കാൻ  ശ്രമിക്കുന്നു.

ബലിതര്‍പ്പണച്ചടങ്ങുകള്‍ക്കൊടുവില്‍ അച്ഛന്റെ സ്ഥാനത്തേക്ക് അമ്മ മനസ്സു കൊണ്ടു കണ്ടുവയ്ക്കുന്ന അങ്കിളിന് നേരെ ഒരുരുള ചോറു വലിച്ചെറിയുകയാണ് മകൻ. അതാണ് ഇരിക്കപ്പിണ്ഡം. 'പ്ലീസ് സ്‌മൈൽ' എന്ന് പറയുന്ന അങ്കിളിന്റെ മുഖത്തേക്കാണ് ആ ഉരുള പതിക്കുന്നത്.