സി എൻ കരുണാകരൻ

തൃശ്ശൂർ ജില്ലയിലെ ഗുരുവായൂരിലെ 
ബ്രഹ്മകുളത്ത് 1940 ലാണ്  സി എൻ കരുണാകരൻ ജനിച്ചത്. 

സ്ക്കൂളിൽ പഠിക്കാൻ മിടുക്കനല്ലായിരുന്ന അദ്ദേഹം സഹപാഠികളുടെ ഇടയിൽ ശ്രദ്ധിക്കപ്പെടുന്നതിനു വേണ്ടിയാണ് ചിത്രം വര തുടങ്ങിയത്. സ്ക്കൂൾ വിദ്യാഭാസം പൂർത്തിയാക്കാതെ പന്ത്രണ്ടാം വയസ്സിൽ മദ്രാസ് സ്ക്കൂൾ ഓഫ് ആർട്സിൽ ചേരുന്നതിനു വേണ്ടി മദ്രാസിലേക്ക് വണ്ടി കയറി. പെയ്‌ന്റിങ്ങിലായിരുന്നു താൽപര്യം. 

പക്ഷെ പത്താം ക്ലാസ് ഇല്ലാത്തതു കൊണ്ട് അതിനു ചേരാനായില്ല. ഡിസൈനിങ് കോഴ്സിനാണ് ചേർന്നത്. ഒന്നാം റാങ്കോടെ പ്രവേശന പരീക്ഷയും സ്വർണ്ണമെഡലോടെ ഡിസൈനിങ് കോഴ്സും പാസായി. രചനയിലെ മികവു കണ്ട് പിന്നീട് അദ്ദേഹത്തിന് പെയ്‌ന്റിങിൽ പ്രവേശനം ലഭിച്ചു. അവിടെയും ഒന്നാം റാങ്കോടെ പാസ്സായി.

എം.കെ.കെ. നായരുടെ പ്രേരണയിൽ കലാപീഠത്തിൻ അദ്ധ്യാപകനായി ചേർന്നെങ്കിലും അധികകാലം അതിൽ തുടരാനായില്ല. പിന്നീട് എറണാകുളത്ത് എം.ജി.റോഡിൽ ചിത്രകൂടം എന്ന കലാപ്രദർശന ശാല തുടങ്ങി. കേരളത്തിലെ ആദ്യത്തെ സ്വകാര്യ കലാപ്രദർശന ശാലയായിരുന്നു ചിത്രകൂടം. 1973 മുതൽ 1977 വരെ ഈ പ്രദർശനശാല പ്രവർത്തിച്ചു.
ഇതിനിടയിൽ ചലച്ചിത്ര കലാസംവിധാനത്തിലേക്ക് തിരിഞ്ഞ ഇദ്ദേഹം 1972 ൽ അടൂർ ഗോപാലകൃഷ്ണൻ സംവിധാനം ചെയ്ത സ്വയംവരം എന്ന ചലച്ചിത്രത്തിലൂടെ സഹ കലാസംവിധായാകനായി ചലച്ചിത്രമേഖലയിൽ അരങ്ങേറ്റം നടത്തി. തുടർന്ന് 1979 അശ്വത്ഥാമാവ് എന്ന ചലച്ചിത്രത്തിൽ സ്വതന്ത്ര കലാസംവിധായാകനായ ഇദ്ദേഹം 1980 ൽ പ്രകൃതി മനോഹരി, 1984 ൽ അക്കരെ, 1986 ൽ പുരുഷാർത്ഥം, 1988 ൽ ഒരേ തൂവൽ പക്ഷികൾ, 1989 ൽ ആലീസിന്റെ അന്വേഷണം തുടങ്ങിയ  ചലച്ചിത്രങ്ങൾക്കും കലാസംവിധാനം നിർവ്വഹിച്ചു.അതോടൊപ്പം  അശ്വത്ഥാമാവ് എന്ന ചിത്രത്തിൽ ഇദ്ദേഹം അഭിനയിക്കുകയുമുണ്ടായി.

ഇതോടൊപ്പം ആനുകാലികങ്ങളിൽ വരച്ചും കമേഴ്സ്യൽ ചിത്രരചനയിലേർപ്പെട്ടും മുന്നോട്ടുപോയിരുന്ന അദ്ദേഹത്തിന്റെ പെയ്‌ന്റിങ്ങുകളും മെറ്റൽ, സിമന്റ് റിലീഫുകളും ശ്രദ്ധിക്കപ്പെട്ടു തുടങ്ങി. അതോടെ ഇദ്ദേഹത്തിന്റെ ചിത്രങ്ങളുടെ അച്ചടിപ്പകർപ്പുകൾക്ക് വലിയ സ്വീകാര്യത കിട്ടി. തുടർന്ന് ഇദ്ദേഹം 50 ലേറെ ഏകാംഗ ചിത്രപ്രദർശനങ്ങൾ ലോകത്തിന്റെ വിവിധ ഭാഗങ്ങളിലായി നടത്തി. ഇതിൽ അമേരിക്കൻ പര്യടനത്തിന്റെ ഭാഗമായി അതിഥി ഇന്ത്യൻ റെസ്റ്റാറന്റിലും വിർജ്ജീനിയ കലാ പ്രദർശന ശാലയിലും വാഷിംഗ്ടൺ ഇന്ത്യൻ എംബസിയിലുമെല്ലാം നടത്തിയ അദ്ദേഹത്തിന്റെ ചിത്രകലാ പ്രദർശനങ്ങൾ എടുത്തു പറയേണ്ടവയാണ്.

1956 ൽ മദ്രാസ് സർക്കാ‍രിന്റെ ഏറ്റവും നല്ല വിദ്യാർത്ഥിക്കുള്ള പുരസ്കാരം, 1964 ൽ 
മദ്രാസ് ലളിതകലാ അക്കാദമി പുരസ്കാരം, 1971, 1972, & 1975 ൽ കേരള ലളിതകലാ അക്കാദമി പുരസ്കാരം, 2000 ൽ പി.ടി. ഭാസ്കര പണിക്കർ പുരസ്കാരം, 2003 ൽ 
മലയാറ്റൂർ രാമകൃഷ്ണൻ പുരസ്കാരം, 2005 ൽ കേരള ലളിതകലാ അക്കാദമി ഫെല്ലോഷിപ്പ് തുടങ്ങി നിരവധി പുരസ്ക്കാരങ്ങൾ ഇദ്ദേഹത്തെ തേടി വന്നിട്ടുണ്ട്. 
 
കേരള ലളിതകലാ അക്കാദമിയുടെ 
അദ്ധ്യക്ഷപദവി അലങ്കരിച്ചിട്ടുള്ള ഇദ്ദേഹം 2013 ഡിസംബർ 14 ആം തിയതി തന്റെ 73 ആം വയസ്സിൽ ഹൃദയാഘാതം മൂലം അന്തരിച്ചു.