ജവാനും മുല്ലപ്പൂവും

പഴന്തോട്ടം ഗവൺമെൻ്റ്  ഹയർ സെക്കൻ്ററി സ്കൂളിലെ അദ്ധ്യാപികയാണ് ജയശ്രീ. അതെ സ്കൂളിൽ തന്നെയാണ് മകൾ ദിയയും പഠിക്കുന്നത്. പഠിപ്പിക്കുന്ന കാര്യത്തിലെന്ന പോലെ പാഠ്യേതര പ്രവർത്തനങ്ങളിലും താത്പര്യമുള്ളയാളാണ് ടീച്ചർ. അതു കൊണ്ടു തന്നെ, സ്കൂളിലെ പല പ്രവർത്തനങ്ങളുടെയും ചുമതല ടീച്ചറുടെ ചുമലിലാവും.  അവയൊക്കെ സസന്തോഷം അവർ ഏറ്റെടുക്കുകയും ചെയ്യും. ഇതു കാരണം വീട്ടിലെത്തിയാലും ടീച്ചർ പലപ്പോഴും തിരക്കിലായിരിക്കും. അതിൽ ഭൂരിഭാഗം സമയവും ക്ലാസുകളും മീറ്റിംഗുകളുമായി കമ്പ്യൂട്ടറിൻ്റെ മുന്നിലും.   ഗെയിം കളിച്ചു വീഡിയോ കണ്ടും മകൾ ദിയയും ധാരാളം സമയം ഫോണിലും കമ്പ്യൂട്ടറിലും ചെലവഴിക്കുന്നുണ്ട്.

പതിനഞ്ചു വർഷത്തെ സേവനം മതിയാക്കി നാട്ടിലെത്തിയ പട്ടാളക്കാരനാണ്  ജയശ്രീയുടെ ഭർത്താവായ ഗിരി. ഇപ്പോൾ അയാൾ ഒരു ബാങ്കിലെ സെക്യൂരിറ്റി ജീവനക്കാരനായി ജോലി ചെയ്യുന്നു. ഭാര്യയുടെയും മകളുടെയും തുടർച്ചയായ കമ്പ്യൂട്ടർ ഉപയോഗത്തിലും ഫോൺ ഉപയോഗത്തിലും അസ്വസ്ഥനാണയാൾ. ഭാര്യയുടെ തിരക്കുകളുടെ കാരണം മനസ്സിലാക്കാതെ,   അവരെ കുറ്റപ്പെടുത്തുന്നതും അയാളുടെ പതിവാണ്. അതിനു പുറമെ സംശയരോഗവും അയാളെ പിടികൂടിയിട്ടുണ്ട്.

ഒരിക്കൽ കുട്ടികളുടെ ഡ്രാമ സെലക്ഷൻ ക്യാമ്പിൽ പങ്കെടുക്കാൻ ഗിരിയും മകളും തിരുവനന്തപുരത്തിനു പോകുന്നു രാത്രിയിൽ ക്രിസ്മസ് പ്രോഗ്രാമിനു വേണ്ടി ജയശ്രീ ഇൻ്റർനെറ്റിൽ നിന്ന്   ചിത്രങ്ങളും വീഡിയോകളും ഡൗൺലോഡ് ചെയ്യുന്നതിനിടയിൽ കമ്പ്യൂട്ടർ ഹാക്ക്ഡ് ആയി ഒരു അശ്ലീല സൈറ്റിൽ വന്നു നില്ക്കുന്നു. അവർ എന്തു ചെയ്തിട്ടും സൈറ്റ് ക്ലോസ് ചെയ്യാൻ കഴിയുന്നില്ല. കമ്പ്യൂട്ടർ റിസ്റ്റാർട്ട് ചെയ്തു കഴിഞ്ഞും അതേ സൈറ്റിലേക്ക് പോകുന്നു. തുടർന്ന് "നിങ്ങൾ ഒരു സൈബർ ക്രൈം ചെയ്തു. പെനാലിറ്റി അടയ്ക്കണം" എന്ന രീതിയിൽ മെസേജ് വരുന്നു. ഹാക്കിംഗ് ആണെന്നറിയാതെ, പരിഭ്രാന്തയായ ജയശ്രീ ,ഡെബിറ്റ് കാർഡ് വച്ച് പണമടയ്ക്കാൻ നോക്കുന്നെങ്കിലും കഴിയുന്നില്ല.

വല്ലാത്ത പരിഭ്രാന്തിയിലും ചിന്താക്കുഴപ്പത്തിലുമായ ജയശ്രീ പിറ്റേന്നു രാവിലെ സൈബർ സെക്യൂരിറ്റി വിദഗ്ധനായ സാജൻ പീറ്ററെ വിളിക്കുന്നു. നേരത്തെ സ്കൂളിൽ ക്ലാസെടുക്കാൻ വന്നിട്ടുണ്ട് സാജൻ. താൻ  തിരക്കിലാണെന്നും അതു കഴിഞ്ഞ് എത്താമെന്നും സാജൻ പറയുന്നു.

സാജൻ ജയശ്രീയുടെ വീട്ടിൽ എത്തുമ്പോഴേക്കും രാത്രിയാവുന്നു. ഇതേ സമയം, ക്യാമ്പിൽ സെലക്ഷൻ കിട്ടിയ മകളെ അവിടെ ഹോസ്റ്റലിൽ ആക്കിയിട്ട് ഗിരി നാട്ടിലേക്ക് മടങ്ങുന്നു. കമ്പ്യൂട്ടറിലെ പ്രശ്നം പരിഹരിക്കാൻ എത്തിയ സാജൻ്റെ സ്വഭാവം പതുക്കെ മാറുന്നു. പ്രശ്നം പരിഹരിക്കുന്നതിനു പകരം അയാൾ ജയശ്രീയെ പ്രലോഭിപ്പിക്കാൻ ശ്രമിക്കുന്നു. ആദ്യമൊക്കെ ഗതികേട് കാരണം ജയശ്രീ അതിനോട് പ്രതികരിക്കുന്നില്ല. ഏതാണ്ടിതേ സമയം ഗിരി വീടിനു പിറകിലെത്തുന്നു.