എ കെ സുകുമാരൻ
1938 -ൽ കണ്ണൂർ ജില്ലയിലെ തളാപ്പിൽ ജനിച്ചു. 1954 -ൽ കോഴിക്കോട് ആകാശവാണിയില്‍ ആദ്യമായി പാടിക്കൊണ്ട് എ കെ സുകുമാരൻ തന്റെ സംഗീത ജീവിതത്തിന് തുടക്കമിട്ടു. 1956 -ല്‍ എച്ച്.എം.വി. ആര്‍ട്ടിസ്റ്റായ എ കെ സുകുമാരന്റെ റെക്കോഡുകള്‍ക്ക് കേരളത്തില്‍ അക്കാലത്ത് ആരാധകര്‍ ഏറെയുണ്ടായിരുന്നു. തോപ്പിൽ ഭാസിയുടെ മൂലധനം എന്ന നാടകത്തില്‍ ഉള്‍പ്പെടെ ഒട്ടേറെ പ്രൊഫഷണല്‍/അമെച്ചര്‍ നാടകങ്ങളിൽ പാടിയ അദ്ധേഹം കോഴിക്കോട് അബ്ദുള്‍ ഖാദര്‍, ബാബുരാജ്, എ.ടി. ഉമ്മര്‍ എന്നിവര്‍ക്കൊപ്പം ഒട്ടേറെ വേദികളില്‍ പാടിയിട്ടുണ്ട്.. ബാബുരാജിന്റെ സംഗീത സംവിധാനത്തിൽ കടത്തുകാരൻ എന്ന സിനിമയിൽ എസ് ജാനകിയോടൊപ്പം "മണിമുകിലേ മണിമുകിലേ... എന്ന ഗാനം പാടിക്കൊണ്ടാണ് എ കെ സുകുമാരൻ ചലച്ചിത്രഗാന രംഗത്തേയ്ക്കെത്തുന്നത്. അതിനുശേഷം ജന്മഭൂമി, കുഞ്ഞാലിമരയ്ക്കാർ, തളിരുകൾ എന്നീ ചിത്രങ്ങളിൽക്കൂടി പാടി. ഒരുകാലത്ത് ഗാനമേള വേദികളിലെ നിറസാന്നിധ്യമായിരുന്ന സുകുമാരൻ സിനിമാപാട്ടുകളെക്കാള്‍ തിളങ്ങിയത് ലളിതഗാന ശാഖയിലാണ്. 22 ഗാനങ്ങള്‍ എച്ച്.എം.വി.യില്‍ റെക്കോഡ് ചെയ്ത് പുറത്തിറക്കി.
കേരളത്തിനകത്തും പുറത്തുമായി ആയിരത്തിലധികം വേദികളില്‍ ഗാനമേളകള്‍ അവതരിപ്പിച്ച എ കെ സുകുമാരൻ 1980 മുതല്‍ 16 വര്‍ഷത്തോളം സൗദി അറേബ്യയിലായിരുന്നു. അവിടെ വെച്ച് അദ്ധേഹത്തിന്റെ ശബ്ദനാളിക്ക് 1990 -ല്‍ അസുഖം ബാധിക്കുകയും പാടുവാനുള്ള ശബ്ദം നഷ്ടപ്പെടുകയും ചെയ്തു. പിന്നെ കുറേക്കാലം പാടാനാവാതെയിരുന്ന സുകുമാരന് പിന്നീട് 1999 -ല്‍ ശസ്ത്രക്രിയക്ക് ശേഷമാണ് ശബ്ദം തിരിച്ചുകിട്ടുന്നത്. സംഗീതനാടക അക്കാദമി / യു.എ.ഇ. ഫുജ്‌റ ആര്‍ട്ട് ലവേഴ്‌സ് അസോസിയേഷന്‍ / പാലക്കാട് സ്വരലയ / വടകര മ്യുസീഷ്യന്‍ വെല്‍ഫെയര്‍ അസോസിയേഷന്‍ തുടങ്ങിയ പുരസ്‌കാരങ്ങൾ അദ്ധേഹത്തിന് ലഭിച്ചിട്ടുണ്ട്. 2018 -ൽ എ കെ സുകുമാരൻ വാർദ്ധക്യ സഹജമായ അസുഖങ്ങളാൽ അന്തരിച്ചു.