നിലാവിന്റെ നാട്ടിൽ

 ഒരു വിരുന്ന് സൽക്കാരത്തിൽ പങ്കെടുക്കുന്നതിനായി കുറച്ചകലെയുള്ള ഒരു ഹോട്ടലിലേക്ക് പുറപ്പെടാനൊരുങ്ങുകയാണ് രമേഷ് കുമാറും (പ്രേം നസീർ) ഭാര്യ ലക്ഷ്മിയും (സീമ).  രണ്ടോ മൂന്നോ വയസ്സുള്ള മകളെ ഒപ്പം കൂട്ടാതെയാണ് യാത്രയെന്നതിനാൽ, തങ്ങൾ തിരിച്ചെത്തുന്നതുവരെ കുട്ടിയെ പരിചരിക്കുന്നതിന് ഒരു ആയയെ രമേഷ് ഏർപ്പാടാക്കുന്നു. ബിരുദപഠനം കഴിഞ്ഞ് നിൽക്കുന്ന മേരി എന്ന പെൺകുട്ടി (ഷൈല ശങ്കർ) അതിൻപ്രകാരം ആയയായി അവിടെ എത്തുന്നു. കുഞ്ഞിനെ അവളുമായി ഇണക്കത്തിലാക്കിയ ശേഷം, കുഞ്ഞിനെ ഉറക്കി സന്ധ്യയോടെ രമേഷും ലക്ഷ്മിയും ഹോട്ടലിലേക്ക് പുറപ്പെടുന്നു. 
       അവർ പോയശേഷം മേരി ആ വലിയ വീടിന്റെ നാനാഭാഗങ്ങളിൽ ചുറ്റിനടന്നും, പുസ്തകത്താളുകൾ മറിച്ചുമൊക്കെ സമയം ചെലവഴിക്കാൻ ശ്രമിക്കുന്നുവെങ്കിലും ആ വീട്ടിലെ അന്തരീക്ഷവും ഏകാന്തതയും വീടിന് പുറത്തുനിന്ന് ഇടയ്ക്കിടെ കേൾക്കുന്ന  ശബ്ദങ്ങളുമെല്ലാം അവളെ അലോസരപ്പെടുത്തുന്നു. ജനാലച്ചില്ലിലൂടെ അവ്യക്തമായ ഒരു രൂപം കണ്ട് അവൾ ഭയചകിതയാവുന്നു.   
       ഇതിനിടയിൽ മേരിയുടെ കാമുകൻ ജോണി (ലാലു അലക്സ്) അവളെക്കാണാൻ ആ വീട്ടിലെത്തുന്നു. തന്നെ ഭയപ്പെടുത്താൻ വീടിനു ചുറ്റും നടന്നതിനും, ശബ്ദമുണ്ടാക്കിയതിനും, അൽപം മുൻപ് ജനാലയ്ക്കൽ വന്നതിനുമൊക്ക അവൾ അയാളെ ശകാരിക്കുന്നു. അത് താനല്ലയെന്ന് അയാൾ പറയുന്നത് മേരി വിശ്വസിക്കുന്നില്ല. ആ വീട്ടിലെ ഏകാന്തതയിൽ നിന്നൊരു ആശ്വാസത്തിന് അൽപനേരം അയാളോടൊപ്പം സംസാരിച്ചിരിക്കാൻ അവൾ തീരുമാനിക്കുന്നുവെങ്കിലും പിന്നീട് കുറച്ചുസമയത്തിനു ശേഷം അവൾ അയാളെ നിർബന്ധപൂർവം പുറത്താക്കി വാതിലടക്കുന്നു. മനസ്സില്ലാമനസ്സോടെ പുറത്തിറങ്ങുന്ന ജോണി തിരിച്ചുപോവാതെ ആ വീടിന്റെ പരിസരത്ത് ചുറ്റിത്തിരിയുന്നു.  

     രമേഷിന്റെ സുഹൃത്തും ഒരു മനശാസ്ത്രജ്ഞനുമായ ഡോക്ടർ വേണുവാണ് (എം.ജി.സോമൻ) രമേഷിനെയും ലക്ഷ്മിയെയും ഡിന്നറിനായി ഹോട്ടലിലേക്ക് ക്ഷണിച്ചിരിക്കുന്നത്. പ്രശസ്തനായ ചിത്രകാരനും ലക്ഷ്മിയുടെ ആദ്യ ഭർത്താവുമായിരുന്ന ബാലു (ഭരത് ഗോപി) നിലവിൽ ഡോക്ടർ വേണുവിന്റെ ചികിത്സയിലാണ്. മനോരോഗിയായിരുന്ന ബാലു ലക്ഷ്മിയെയും കുഞ്ഞിനെയും കൊല്ലാൻ ശ്രമിക്കുകയും തുടർന്ന് അവരുടെ ബന്ധം വിവാഹമോചനത്തിൽ കലാശിക്കുകയും,  പിന്നീട്, ലക്ഷ്മി തന്റെ മുറച്ചെറുക്കനായ രമേഷിന്റെ ഭാര്യയാവുകയും ചെയ്യുകയായിരുന്നു.   ഹോട്ടലിൽ വച്ച് വേണുവും രമേഷും ലക്ഷ്മിയും തമ്മിലുള്ള സംസാരത്തിൽ  ഒരു വിഷയമായി ബാലുവും കടന്നുവരുകയും അയാളെക്കുറിച്ചുള്ള ഓർമ്മകൾ ലക്ഷ്മിയിൽ അസ്വസ്ഥത ഉളവാക്കുകയും ചെയ്യുന്നു. 

  അതേസമയം, ആ വലിയ വീടിനുള്ളിൽ പ്രത്യേകിച്ചൊന്നും ചെയ്യാനില്ലാതെ വിരസമായി വിണ്ടും സമയം ചെലവഴിക്കേ, വാതിലിൽ അരോ തുടർച്ചയായി മുട്ടുന്ന ശബ്ദം കേട്ട് അത് ജോണിയാണെന്നുറപ്പിച്ച് ഒരിക്കൽക്കൂടി വാതിൽ തുറക്കുന്ന മേരിയെ സ്തബ്ധയാക്കിക്കൊണ്ട്, ബോധരഹിതനായ ജോണിയുടെ രക്തരൂഷിതമായ ശരീരം കതകിൽ ചാരി വീടിനകത്തേക്ക് വീഴുന്നു. തൊട്ടുപിന്നാലെ അകത്തേക്ക് പ്രവേശിക്കുന്ന ബാലു, ഇവിടെ ഒരു വലിയ ബഹളം കേട്ട് അതെന്താണെന്ന് അന്വേഷിച്ച് വന്നയാളാണ് താനെന്ന് മേരിയോട് സ്വയം പരിചയപ്പെടുത്തുന്നു. ബോധരഹിതനായ ജോണിയെ ശുശ്രൂഷിക്കാൻ മേരിയോടൊപ്പം അയാളും കൂടുന്നുവെങ്കിലും, അവൾക്ക് അപരിചിതനായ അയാളുടെ പെരുമാറ്റത്തിലും പ്രവൃത്തികളിലും പിന്നീട് അസ്വാഭാവികത തോന്നിത്തുടങ്ങുന്നതോടെ മേരിയെ ഭയം ഗ്രസിക്കുന്നു.