മേൽവിലാസം

ഗാർഡ് ഡ്യൂട്ടിയിലിരിക്കെ ക്യാപ്റ്റൻ മോഹന വർമ്മയെ വധിക്കുകയും ക്യാപ്റ്റൻ ബി.ഡി കപൂറിനെ വധിക്കാൻ ശ്രമിക്കുകയും ചെയ്തുവെന്ന കുറ്റത്തിന് സവാർ രാമചന്ദ്രൻ നേരിടുന്ന വിചാരണയിലൂടെയാണ് ചിത്രമാരംഭിക്കുന്നത്. സംശയത്തിന്റെ ആനുകൂല്യത്തിലൂടെ രക്ഷപ്പെടാനുള്ള അവസരം ഉണ്ടായിട്ടും രാമചന്ദ്രൻ അതുപയോഗിക്കാതെ ആദ്യമേ തന്നെ കുറ്റസമ്മതം നടത്തുന്നു. എന്നാൽ കൊല ചെയ്യാനുള്ള കാരണം മാത്രം അയാൾ വെളിപ്പെടുത്തുന്നില്ല.

തുടർന്ന് രാമചന്ദ്രന് വേണ്ടി ഹാജരായ ക്യാപ്റ്റൻ വികാസ് റോയ് സത്യം കണ്ടെത്തുന്നതിനായി സാക്ഷി വിസ്താരം തുടരുന്നു. സമർത്ഥവും സൂക്ഷ്മവുമായ വികാസ് റോയുടെ നിരീക്ഷണങ്ങളും സാക്ഷിവിസ്താരവും വാദികളുടേതുൾപ്പടെ പലരുടെയും പ്രവർത്തികളിലെ നിയമ ലംഘനങ്ങളും നീതികേടുകളും വെളിവാക്കുന്നതായിരുന്നു. ക്യാപ്റ്റൻ ബി.ഡി കപൂറും ക്യാപ്റ്റൻ വർമ്മയും വച്ചു പുലർത്തിയിരുന്ന കൊടിയ ജാതി വിവേചനവും അവരുടെ ഹീനമായ പ്രവർത്തികളും രാമചന്ദ്രനോട് കാട്ടിയിരുന്ന നീതി നിഷേധവും അവിടെ അനാവരണം ചെയ്യപ്പെട്ടു. നിരന്തരം ജാതി അധിക്ഷേപങ്ങൾക്കിരയാകേണ്ടി വന്ന രാമചന്ദ്രന്  ബി.ഡി കപൂറിന്റെ വീട്ടുജോലിക്കാരൻ ആകേണ്ടി വരികയും അസുഖ സമയത്ത് ചികിത്സ നിഷേധിക്കപ്പെടുകയും ചെയ്തിരുന്നു.

കൃത്യനിർവഹണത്തിൽ ഒരിക്കലും ഒരുപേക്ഷയും വരുത്തിയിട്ടില്ലാത്ത, സൈനിക ജീവിതത്തിൽ പരാതികൾക്കിട നൽകിയിട്ടില്ലാത്ത സവാർ രാമചന്ദ്രൻ ഒടുവിൽ അവർക്ക് നേരെ നിറയൊഴിക്കാനുണ്ടായ സാഹചര്യത്തെപ്പറ്റി തുറന്നു പറയാൻ തയ്യാറാവുന്നു.