ആദിയിലാകാശവും

 

ആദിയിലാകാശവും ഭൂമിയും അലതല്ലും
ആഴിയും വിരചിച്ച സർഗ്ഗവേദനാനാളം
ആയിരം തിരികളിൽ പകർന്നതത്രേ ഞങ്ങൾ
ആ മഹാപ്രതിഭ തൻ ഗോപുരവിളക്കുകൾ

ആദിയില്ലന്തമില്ലാ സർഗ്ഗഗീതം
ആ സർഗ്ഗഗീതം
ആലപിച്ചീടുമനശ്വരർ ഞങ്ങൾ
അനശ്വരർ ഞങ്ങൾ

ആഴികൾ ഞങ്ങൾ തൻ ആനന്ദധാര
രാവുകൾ ഞങ്ങൾ തൻ നൊമ്പരധാര
താരകൾ ഞങ്ങൾ തന്നുൾക്കുളിർധാര
താരുകൾ സങ്കല്പ സംഗീതധാര

ഇന്ദ്രധനുസ്സിന്റെ പീലിക്കിരീടം
ഞങ്ങൾ തൻ മാനസം ചൂടും കിരീടം
കാലമീക്കൈകളിൽ കാഞ്ചനവീണ
താളലയങ്ങൾ തളിർത്തിടും വീണ