മഴകൊണ്ട് മാത്രം

മഴ കൊണ്ടു മാത്രം  മുളയ്ക്കുന്ന വിത്തുകള്‍

ചിലതുണ്ട് മണ്ണിന്‍ മനസ്സില്‍..

പ്രണയത്തിനാല്‍ മാത്രമെരിയുന്ന ജീവന്റെ

തിരികളുണ്ടാത്മാവിനുള്ളില്‍....  

(മഴ കൊണ്ടു മാത്രം )

ഒരു ചുംബനത്തിന്നായ് ദാഹം  ശമിക്കാതെ      

എരിയുന്ന പൂവിതള്‍ത്തുമ്പുമായി...

പറയാത്ത പ്രിയതരമാമൊരു വാക്കിന്റെ

മധുരം  പടര്‍ന്നൊരു ചുണ്ടുമായി...

വെറുതെ പരസ്പരം  നോക്കിയിരിക്കുന്നു,

നിറ മൗനചഷകത്തിനിരുപുറം  നാം ..

(മഴ കൊണ്ടു മാത്രം )

സമയകല്ലോലങ്ങള്‍ കുതറുമീ കരയില്‍ നാം,

മണലിന്റെ ആര്‍ദ്രമാം മാറിടത്തില്‍..

ഒരു മൗനശില്പം മെനഞ്ഞുതീര്‍ത്തെന്തിനോ

പിരിയുന്നു സാന്ധ്യവിഷാദമായി...

ഒരു സാഗരത്തിന്‍ മിടിപ്പുമായി...

(മഴ കൊണ്ടു മാത്രം)