അച്ഛനെ കൊന്നവൻ പുണ്യവാളൻ

 

അച്ഛനെ കൊന്നവൻ പുണ്യവാളൻ
എന്നുമക്കൈകൾ മുത്തി സ്തുതിക്ക
അച്ഛന്റെ ചിത്രത്തിൽ മഷി കുടഞ്ഞാലെന്റെ
അച്ചെയ്തി പൗരാവകാശം
വീടിന്റെ പൂമുഖ ചുമരിന്മേൽ തൂക്കിയ
താതന്റെ ച്ഛായാപടത്തിൽ
പൂമാല ചാർത്തുന്ന കൈ കൂപ്പി നിൽക്കുന്ന
ഭാവാലിതെന്തോരാഭാസം
ജീവിച്ചിരുന്നെങ്കിൽ ആ കണ്ണട മാറ്റാൻ
ആവശ്യപ്പെട്ടേനെ നമ്മൾ
എന്തെല്ലാം ഭ്രാന്തുകൾ ഹിന്ദുവും മുസ്ലിമും
ഒന്നെന്നാ കണ്ണുകൾ കണ്ടൂ
എന്തെല്ലാം ഭ്രാന്തുകൾ  ഈശ്വരൻ
അല്ലാഹുവൊന്നെന്നു ചൊല്ലുവാൻ
ലേശവും ലജ്ജ തോന്നീല്ല
അച്ഛന്റെ ചിത്രം വലിച്ചെറിയാം ദൂരെ
അച്ചെയ്തി പൗരാവകാശം
അച്ഛനെന്നിത്ര നാൾ നാം വിളിച്ചൊരാ
വൃദ്ധനെയാർക്കിനി വേണം
അച്ഛനെന്നിത്ര നാൾ നാം വിളിച്ചൊരാ
വൃദ്ധനെയാർക്കിനി വേണം