ഓ മൈ ഡാർലിംഗ്

ജോയ് - സാലി ദമ്പതികളുടെ മകളാണ് ജെനി . കോളേജിൽ പഠിച്ചു കൊണ്ടിരിക്കുന്ന ജെനിയും 24 കാരനായ ജോയലും തമ്മിൽ പ്രണയത്തിലാണ്. ജോയൽ ബി ടെക് കഴിഞ്ഞ് ജോലിക്കായി ശ്രമിച്ചു കൊണ്ടിരിക്കുന്നു എങ്കിലും ഒന്നും ശരിയാവുന്നില്ല. ഇതിന്റെ പേരിലും പലപ്പോഴായി വീട്ടിൽ നിന്നും സ്വന്തം ആവശ്യത്തിനായി പൈസ അടിച്ചു മാറ്റുന്നതിന്റെ പേരിലും മാതാപിതാക്കളായ ജോർജിനോടും മെറിറ്റയോടും കലഹിക്കുന്നുണ്ട്.

 ജോയലിന്റെയും ജെനിയുടെയും പ്രണയ ദിനങ്ങൾക്കിടയിൽ ജെനിയുടെ പിറന്നാൾ ദിവസം രാത്രി ജെനിയുടെ വീട്ടിലെത്തുന്ന ജോയൽ ജെനിയുമായി ശാരീരിക ബന്ധത്തിൽ ഏർപ്പെടുന്നു. പിന്നീട് ഇത് പല തവണ ആവർത്തിക്കുന്നു. ഒടുവിൽ ജെനി താൻ ഗർഭിണിയാണെന്ന് ജോയലിനെ അറിയിക്കുന്നു. എന്നാൽ കുഞ്ഞിനെ ഇല്ലാതാക്കാൻ ജോയൽ ആവശ്യപ്പെടുന്നു, പക്ഷേ, ജെനി സമ്മതിക്കുന്നില്ല.

ജെനിയുടെ ഗർഭകാലത്തിലെ ആഗ്രഹങ്ങൾ എല്ലാം ജോയൽ നടത്തി കൊടുക്കുന്നു. പലപ്പോഴായി വീട്ടിൽ കലഹിക്കുന്ന ജോയൽ പപ്പക്ക് സുഖമില്ലാത്ത അവസ്ഥയിൽ മാതാപിതാക്കൾക്ക് തന്നോടുള്ള സ്നേഹം തിരിച്ചറിഞ്ഞ് വർഷങ്ങളായി പിണങ്ങി കഴിയുന്ന അപ്പൂപ്പനെ വീണ്ടും കുടുംബത്തോട് ഒന്നിപ്പിക്കുന്നു , ഇതിനായി ജെനി ജോയലിനെ സഹായിക്കുന്നു.

നിരന്തരമായ പരിശ്രമത്തിനൊടുവിൽ ജോയലിന് ജോലി ലഭിക്കുന്നു. ആ ധൈര്യത്തിൽ ജെനിയുടെ വീട്ടിൽ വിവാഹ കാര്യം സംസാരിക്കാനെത്തുന്ന ജോയലിനോട് ജെനിക്ക് ഒരിക്കലും ഒരു അമ്മയാവാൻ കഴിയില്ലന്ന സത്യം ജെനിയുടെ മാതാപിതാക്കൾ പറയുന്നു. ഇതറിഞ്ഞ് ഞെട്ടിയ ജോയൽ ജെനിയുടെ മുറിയിൽ ചെല്ലുമ്പോൾ കൈ ഞരമ്പ് മുറിച്ച് കിടക്കുന്ന ജെനിയെ ആണ് കാണുന്നത്.