എം കെ വാര്യർ

കോട്ടയം ജില്ലയിലെ മുളക്കുളം പ്ലാപ്പള്ളിൽ വാര്യത്ത് കൃഷ്ണ വാര്യരുടെയും അമ്മുക്കുട്ടി വാരസ്യാരുടെയും മകനായി ജനിച്ചു.  മുളക്കുളം കൃഷ്ണ വാര്യർ' എന്നായിരുന്നു പൂർണ്ണനാമം. ചെറുപ്പത്തിൽ തന്നെ കലയോടുള്ള അടങ്ങാത്ത താല്പര്യം കാരണം അദ്ദേഹം നാടകരംഗത്തേക്ക് എത്തിപ്പെട്ടു. നാട്ടിലെ അമച്വർ നാടകങ്ങളിലൂടെ തുടങ്ങിയ യാത്ര പിന്നീട് കേരളത്തിലെ ഏറ്റവും പ്രശസ്തമായ പ്രൊഫഷണൽ നാടക സമിതികളിലേക്ക് നയിച്ചു. 

കെ.പി.എ.സിയുടെ സുവർണ്ണ കാലഘട്ടത്തിൽ ആ സമിതിയുടെ നെടുംതൂണുകളിൽ ഒരാളായിരുന്നു വാര്യർ. 'നിങ്ങളെന്നെ കമ്മ്യൂണിസ്റ്റാക്കി', 'അശ്വമേധം', 'ശരശയ്യ', 'മുടിയനായ പുത്രൻ' തുടങ്ങി എണ്ണമറ്റ നാടകങ്ങളിൽ അദ്ദേഹം ശ്രദ്ധേയമായ വേഷങ്ങൾ കൈകാര്യം ചെയ്തു. കെ.പി.എ.സിക്കു പുറമെ കൊല്ലം യവന, ചങ്ങനാശ്ശേരി ഗീഥ തുടങ്ങിയ സമിതികളിലും അദ്ദേഹം പ്രവർത്തിച്ചിട്ടുണ്ട്. 1978 -ൽ സമയമായില്ല പോലും എന്ന സിനിമയിൽ ഒരു വേഷം ചെയ്തുകൊണ്ടാണ് എം കെ. വാര്യർ ചലച്ചിത്രലോകത്തേക്ക് എത്തുന്നത്. തുടർന്ന് അഞ്ച് സിനിമകളിൽ കൂടി അഭിനയിച്ചു. 

എം കെ. വാര്യരുടെ ഭാര്യ ശാരദ. മക്കൾ ഇന്ദിര, സതി. 2016 ഫെബ്രുവരിയിൽ എം കെ. വാര്യർ അന്തരിച്ചു.