പനിനീർകാവടി പൂക്കാവടി

പനിനീർകാവടി പൂക്കാവടി

പവിഴക്കാവടി പാൽക്കാവടി

മകരപ്പുലരിക്കു വർണ്ണമേകി

മാനവമൈത്രിതൻ ഗീതിപാടി

മലയാളക്കരയാകെ വരവായിടും ദിനം

തൃപ്പുലിയൂരിലെ പൊൻകാവടി

തൃപ്പുകളാർന്നിടും തേൻകാവടി

കരകളിലാമോദം കുളിർമഴപെയ്യുമ്പോൾ

കരളുകളൊന്നെന്നപോലെ

ഹരിയുടെ തിരുമുൻപിൽ ശരണം തേടുമ്പോൾ

ഹരിയുടെ തിരുമുൻപിൽ ശരണം തേടുമ്പോ-

ളരികിലുണ്ടെന്നതു പോലെ, അവ-

നരികിലുണ്ടെന്നതു പോലെ

[തൃപ്പുലിയൂർ തിരുനടയിൽ കാവടിതൻ മേളം

കൺകുളിരെക്കാണുവാൻ വേലായുധനും മോഹം]

കൊടിമരകഥചൊല്ലും താമരച്ചാലുണ്ടേ

അഴകിൽ പാലാഴിപോലെ

അതുകണ്ടണയുന്നോരഗതികൾതൻ മനം

അതുകണ്ടണയുന്നോരഗതികൾതൻ മന-

മലിയുകയായ് മഞ്ഞുപോലെ, അഴ-

ലലിയുകയായ് മഞ്ഞുപോലെ